ەلوردادا مەملەكەت باسشىسى اتىنان «جاڭا جىل رەسپۋبليكا تورىندە» اتتى رەسپۋبليكالىق شىرشا مەرەكەسى ءوتتى. وعان ەلىمىزدىڭ بارلىق وڭىرىنەن 100-دەن استام بالا جينالدى. شىرشاعا شاقىرىلعان بالالارعا مەملەكەت باسشىسى قاسىم-جومارت توقاەۆتىڭ اتىنان قۇتتىقتاۋ حات تابىس ەتىلدى.
«اينالايىن بالاقاي! سەنى جاڭا جىل مەرەكەسىمەن قۇتتىقتايمىن! وسى تاماشا مەيرام ءوزىڭدى قۋانىش پەن شاتتىققا بولەسىن! ءومىرىڭ جارقىن ساتتەرگە تولى بولسىن! كىتاپ وقى, سپورتپەن شۇعىلدان, تابيعاتتى ايالا جانە جاقسىلىق جاساۋعا ۇمتىل! ءبىلىمپاز, ەڭبەكقور, ادال ازامات بول! اسقاق ارماندارىڭ اقيقاتقا اينالسىن! ساعان زور دەنساۋلىق, تولاعاي تابىس تىلەيمىن!» دەپ جازدى پرەزيدەنت بالالارعا ارنالعان قۇتتىقتاۋىندا.
بالالارمەن بىرگە شىرشا شامىن جاعۋعا قر وقۋ-اعارتۋ ءمينيسترى عاني بەيسەمباەۆ قاتىستى.
«بۇگىن وزدەرىڭىز سىندى 6 ميلليوننان استام بالا جاڭا جىل مەرەكەسىن تويلاۋدا جانە رەسپۋبليكامىزدىڭ 20 وڭىرىنەن جۇزدەگەن بالا وسى پرەزيدەنت شىرشاسىنا قاتىسىپ, ۇلكەن مەرەكەلى تويدى بىرگە وتكىزۋدەمىز. جالپى سىزدەر وسى 3 كۇن بويى اسەم قالامىز – استانانىڭ ەڭ كورىكتى جەرلەرىن ارالادىڭىزدار. ونىڭ ىشىندە تاۋەلسىزدىك سيمۆولىنا اينالعان «بايتەرەككە» دە باردى دەپ ەستىپ وتىرمىن. مەملەكەت سىزدەردىڭ باقىتتى بالالىق شاقتى وتكىزۋىڭىز ءۇشىن ايانباي بارلىق مۇمكىندىكتى جاساپ جاتىر. ەندىگى جەردە, قۇرمەتتى جاس دوستار, سىزدەر دە ساباقتى 5-كە وقىپ, سانالى تاربيە الىپ, وسى ەلدىڭ بەدەلدى, مىقتى ازاماتى بولىپ وسۋىڭىزگە بارلىق ماقسات-مۇراتىڭىزدى ارناۋعا تيىسسىزدەر» دەدى مينيستر.
عاني بەيسەمباەۆ بالالارعا پرەزيدەنت قاسىم-جومارت توقاەۆ اتىنان سىيلىقتار تابىس ەتتى. ريۋكزاك ىشىندە پرەزيدەنتتىڭ قۇتتىقتاۋ اشىقحاتى, پلانشەت, تاتتىلەر جانە ەنتسيكلوپەديالىق كىتاپتار بار. شىرشا سالتاناتىنا قاتىسۋشىلاردىڭ ىشىندە 10 جاسار كاۋسار الماسقىزى دا بار. جەتىسۋ وبلىسى تالدىقورعان قالاسىنداعى №19 مەكتەپ-گيمنازيانىڭ 5-سىنىپ وقۋشىسى بۇل شارا ءۇشىن ارنايى ءوز قولىمەن 100 راۋشان گۇلىنەن ءساندى كويلەك تىگىپتى. وتباسى ۇلگىسىندەگى بالالاردى قولداۋ ورتالىعىنىڭ تاربيەلەنۋشىسى, ماڭعىستاۋ وبلىسىنان كەلگەن ۆيكتور باياركين پرەزيدەنتتەن شاقىرتۋ العانى ءۇشىن العىسىن ءبىلدىردى. 3-سىنىپ وقۋشىسى كاراتەمەن اينالىسادى جانە دومبىرادا وينايدى.
«شىرشا تويىنا قاتىسقانىم ءۇشىن اسا قۋانىشتىمىن. ونىڭ ۇستىنە بىزگە كوپتەگەن سىيلىق بەرىلدى. وسىنداي شەكسىز قۋانىش سىيلاعان پرەزيدەنتكە جانە بارشا قاتىسۋشىعا راقمەت ايتامىن!» دەيدى ول.
بالالارعا ەلوردانىڭ ۇزدىك شىعارماشىلىق ۇجىمدارى, مارجان اراپباەۆا, قاراقات ءابىلدينا, ەرجان ماكسيم سىندى تانىمال انشىلەر ونەر كورسەتتى. «استانا وپەرا» مەملەكەتتىك وپەرا جانە بالەت تەاترىنىڭ سوليستەرى «كۇلبيكەش» سپەكتاكلىنىڭ قويىلىمىن تارتۋ ەتتى.
