اقپان ايىنىڭ باسىندا استانا قالاسىندا گرەك-ريم, ەركىن جانە ايەلدەر كۇرەسىنەن قازاقستان چەمپيوناتى ءوتىپ, وعان وڭىرلەردەن 600-دەن استام بالۋان كەلدى. ءبىز بالۋانداردىڭ بابىن بايقاپ, كۇرەس تۇرلەرىنىڭ دامۋ دەڭگەيىن سارالادىق.
كۇرەس تۇرلەرىنەن قاپ تاۋىنىڭ وكىلدەرىنىڭ دەڭگەيى جوعارى. اسىرەسە, داعىستان بالۋاندارىنىڭ بابى مەن باعى ارتىق. قازىر ەۆروپا مەن ازيا ەلدەرىنىڭ تۋ استىندا داعىستاندىقتار كوپتەپ ونەر كورسەتەدى. يراندا كۇرەس تۇرلەرى ۇلتتىق سپورت ساناتىنا جاتادى. ءتىپتى داڭقتى بالۋاندارىن «ۇلت باتىرىنا» بالاپ, جاستارعا ۇلگى-ونەگە ەتەدى. سوندىقتان يراندىقتار كۇرەستەن وسال ەمەس. كەيىنگى جىلدارى سپورت عىلىمى دامىعان اقش پەن جاپونيانىڭ بالۋاندارى باسەكەنى قىزدىرىپ ءجۇر. تۇركيا, ازەربايجان, قىرعىزستان جانە موڭعوليا بالۋاندارى التىن مەدالعا تالاسىپ, ارا-تۇرا تۇعىردىڭ بيىگىنەن كورىنۋدە. گرەك-ريم كۇرەسىنەن ءبىزدىڭ بالۋاندار 25 جىل بۇرىن افينادا وتكەن الەم چەمپيوناتىندا دارالانسا, اتلانتا وليمپياداسىندا چەمپيون شىقتى. ال ەركىن كۇرەستەن بىلتىر بەلگرادتا وتكەن الەم چەمپيوناتىندا تۇڭعىش رەت چەمپيون شىقتى. باسقا ماقتانارلىق جەتىستىگىمىز از.
ارينە, بۇعان سپورت ساراپشىلارى ءتۇرلى سەبەپ-سالدارىن كەلتىرەدى: بالۋاندار پسيحولوگيالىق تۇرعىدان دايىن ەمەس, فيزيكالىق الەۋەتى مەن تاكتيكالىق شەبەرلىگى جەتپەيدى, فۋنكتسيونالدىق دەنە دايىندىعىنا دەڭگەيى تومەن, سپورتتىق مەديتسينا مەن عىلىم دامىماعان. ولاي بولسا, جىل سايىن ميلليونداعان قارجىنى نە ءۇشىن, كىم ءۇشىن ءبولىنىپ جاتىر؟ الدىمەن, وسى كەمشىلىكتەردى جوياتىن جۇيەلى جۇمىس جۇرگىزۋ كەرەك ەمەس پە؟ ءبىر قۇراماعا ءبىر پسيحولوگ, ماسساجيست, ديەتولوگ ەمەس, بايراقتى باسەكەگە قاتىساتىن ءاربىر سپورتشىعا ءبىر-ءبىر ماماننان بەكىتىلسە قايتەدى؟ بۇل تاجىريبە جاپونيا مەن اقش-تا بار ەمەس پە؟
بيىل – وليمپيادالىق تسيكلدى تۇيىندەيتىن جىل. ەندى سپورتشىلار پاريج تورىندە ونەر كورسەتۋ ءۇشىن بارىن سالادى. جاقسىلىق ۇشكەمپىروۆ اتىنداعى سپورت سارايىندا وسىنداي اۋرانى سەزىندىك. الدىمەن 10 سالماق دارەجەسىندە بەلدەسكەن گرەك-ريم كۇرەسىنىڭ شەبەرلەرى كىلەمگە شىقتى.
55 كەلى سالماقتا التىن مەدالعا باستى ۇمىتكەر امانعالي بەكبولاتوۆ بولدى. بۇعان دەيىن ەكى رەت ازيا چەمپيوناتىندا جۇلدە العان بالۋان بىشكەك قالاسىندا وتەتىن ليتسەنزيالىق تۋرنيرگە بارۋعا ءۇمىتتى بولدى. جارتىلاي فينالدا امانعاليدىڭ وسال تۇسىن استانالىق ايبەك ايتبەكوۆ تاپتى. ءسويتىپ, ايبەك چەمپيوناتتىڭ العاشقى سەنساتسياسىن تىركەگەنىمەن, فينالدا جەتىسۋلىق قارسىلاسى نۇرزات قابدىراحيموۆقا شاماسى جەتپەدى.
60 كەلى سالماقتا بەلدەسكەن ازيا چەمپيونى, الەم چەمپيوناتىنىڭ جۇلدەگەرى ايدوس سۇلتانعالي جارىسقا بابىندا كەلىپتى. قارسىلاستارىن وڭاي جەڭىپ, التىن مەدالعا قول سوزدى. الەمدە بۇل سالماقتا قىرعىزستاندىق جولامان شارشەنبەكوۆ ۇستەمدىك قۇرىپ تۇر. 2022 جانە 2023 جىلعى بەلگرادتا وتكەن الەم چەمپيوناتىندا «اتوي سالدى». 2022 جىلى ايدوستىڭ جولى جارتىلاي فينالدا جولامانمەن ءتۇيىسىپ ۇتىلىپ قالعان ەدى. ايدوسقا شىن مىقتى ەكەنىن دالەلدەپ, وليمپيادا ويىنىنىڭ التىنىن الۋ ءۇشىن شارشەنبەكوۆ سىندى مىقتىلاردى مويىنداتۋى كەرەك.
ءبىزدىڭ نازارىمىز اۋعان تاعى ءبىر سالماق – 77 كەلى. بۇل سالماقتا ۇزاق جىلدان بەرى دەمەۋ جادراەۆ مىقتى ەكەنىن دالەلدەپ كەلەدى. الەم جانە ازيا چەمپيوناتىندا ەل نامىسىن قورعاپ, كۇمىس مەدال دا, قولا مەدال دا الدى. جەتىسپەي تۇرعانى – التىن مەدال. ول ءۇشىن قىرعىز داراسى اقجول ماحمۇدوۆ سىندى مىقتىنى ۇتۋى كەرەك. قازىر اقجول توكيو وليمپياداسىنداعى كۇمىستى التىن مەدالعا اۋىستىرۋ ءۇشىن دايىندالىپ جاتىر.
دەمەك ءبىزدىڭ ايدوس پەن دەمەۋ الاتاۋدىڭ ارعى بەتىندەگى بالۋاندارمەن تەڭ ونەر كورسەتكەن كەزدە عانا التىن مەدالدىڭ كەرمەك ءدامى سەزىلەدى…
سوڭعى رەت وليمپيادا جۇلدەسىن 87 كەلى سالماقتا دانيال گادجيەۆ العان-دى. سودان كەيىنگى ۋاقىتتا قازاق بالۋاندارىنىڭ جولى بولماي ءجۇر. بالكىم, دانيال باعىندىرعان بيىكتى 87 كەلىدەگى ەل چەمپيونى ازامات قۇستۋباەۆ باعىندىرار. ەلوردالىق بالۋاننان ءۇمىت كۇتەمىز. قاشاندا الەمدىك دەڭگەيدەگى تۋرنيرلەردە ءبىزدىڭ اۋىر سالماقتاعى گرەك-ريم وكىلدەرى مەدالعا تالاساتىن. سول ءداستۇردى ولجاس سىرلىباي پەن ءالىمحان سىزدىقوۆ جالعاستىرار.
ەندى ايەلدەر كۇرەسىنە كوشەيىك. ءبىزدىڭ بالۋان قىزدار ءۇش رەت وليمپيادا ويىندارىنا قاتىسىپ, التى رەت جۇلدە الدى. بۇل – ەركىن جانە گرەك-ريم كۇرەسى بالۋاندارىنىڭ ناتيجەسىنەن جوعارى كورسەتكىش. پەكين وليمپياداسىندا ەلەنا شالىگينا جۇلدەلى بولسا, لوندوندا – گۋزەل مانيۋروۆا, سونداي-اق ريو-دە-جانەيرودا – ەكاتەرينا لاريونوۆا مەن ەلميرا سىزدىقوۆا قۋانتتى.
ايەلدەر كۇرەسىندە ەلوردالىق بالۋاندار مىقتى ەكەنىن دالەلدەدى. 53 كەلى سالماقتى جىلدىز ەشيموۆا, 57 كەلىدە ەمما تيسينا, 76 كەلىدە ءجاميلا باكبەرگەنوۆا التىن مەدال السا, 68 كەلىدە بەلدەسكەن ءمادينا باكبەرگەنوۆاعا كۇمىس مەدال بۇيىردى.
كۇرەس جانكۇيەرلەرىنىڭ نازارى اۋعان ورتالىق كۇرەس 76 كەلىدە ورىن الدى. قارسىلاستارىنىڭ وسال تۇسىن تاپقان ەكى مىقتى – ەلميرا سىزدىقوۆا مەن ءجاميلا باقبەرگەنوۆا فينالدا كەزدەستى. ەكەۋىنىڭ دە اتاق-داڭقىنان ات ۇركيدى. ءبىرىنشىسى – وليمپيادا ويىندارىنىڭ جۇلدەگەرى, ەكىنشىسى – الەم چەمپيوناتىنىڭ ءۇش دۇركىن جۇلدەگەرى. ءبىر-ءبىرىنىڭ قىر-سىرىن جاقسى بىلەتىن بالۋاندار اڭدىسىپ جۇرمەي, ۇتىمدى ءادىس جاساۋعا بىردەن كىرىسىپ كەتتى. ءجاميلانىڭ سوڭعى سەكۋندتاردا جاساعان ءادىسى ءتورت بالعا باعالانىپ, جەڭىمپاز بولدى.
ەركىن كۇرەستە 57 جانە 65 كەلىدە سەنساتسيا ورىن الدى. جەڭىل سالماقتا بەلدەسكەن ەراسىل مۇحتارۇلى جەڭىس جولىندا راحات قالجان, مەيرامبەك كارتباي سىندى چەمپيونداردى ۇتتى. وليمپيادالىق سالماق – 65 كەلىدە 20 جاستاعى ماڭعىستاۋلىق مايس اليەۆ مىقتى ەكەنىن دالەلدەدى. ول جارتىلاي فينالدا حالىقارالىق دەڭگەيدەگى سپورت شەبەرى ادلان اسكاروۆتى, فينالدا بىلتىرعى چەمپيون سانجار مۇحتاردى جەڭدى. وسى سالماقتا شىمكەنت قالاسىنىڭ اتىنان كۇرەسكەن رەسەيلىك لەگيونەر ناچىن كۋلار ءۇشىنشى ورىن الدى.
كۇرەستىڭ بۇل تۇرىنەن ورتالىق كۇرەس 74 جانە 97 كەلىدە ورىن الدى. وليمپيادالىق ەكى سالماققا ىڭعاي مىقتىلار جينالدى. ماسەلەن, 74 كەلىدە بەس بىردەي ازيا چەمپيونى قاتىستى. ولار: سانجار دوسجانوۆ, دارحان ەسەنعالي, دانيار كايسانوۆ, سىرباز تالعات, نۇرقوجا قايپانوۆ.فينالعا سوڭعى ەكەۋى شىعىپ, نۇرقوجا جەڭىمپاز اتاندى. بۇل سالماقتا الەم چەمپيوناتىنىڭ كۇمىس جۇلدەگەرى نۇرلان بەكجانوۆ تا جۇلدەسىز قالدى. ياعني 74 كەلىدە باسەكە جوعارى. وسى باسەكە ازيا مەن الەمدە ءبىزدىڭ بالۋانداردى ۇزدىك ەتسە جاقسى. 97 كەلىدە الەم چەمپيونى ريزابەك ايتمۇحان مەن ازيا چەمپيوناتىنىڭ كوپ دۇركىن جۇلدەگەرى اليشەر ەرعالي بەلدەسىپ, 10:14 ەسەبى تىركەلدى. ءسويتىپ, بىشكەكتە وتەتىن ليتسەنزيالىق تۋرنيرگە اليشەر جولداما الدى.
ازيا كۇرەس فەدەراتسياسىنىڭ پرەزيدەنتى, قازاقستان كۇرەس تۇرلەرى فەدەراتسياسىنىڭ باسشىسى داۋلەت تۇرلىحانوۆ چەمپيوناتتىڭ جابىلۋ راسىمىندە پاريج وليمپياداسىنا جولداما العان, الەم چەمپيوناتىنىڭ جۇلدەگەرى ازامات داۋلەتبەكوۆكە «ەڭبەك سىڭىرگەن سپورت شەبەرى» اتاعىن بەرىپ, بايراقتى باسەكەدە ساتتىلىك تىلەدى.
