استانا قالاسىنىڭ اكىمى جەڭىس قاسىمبەك Instagram پاراقشاسىندا جاڭادان اشىلاتىن تارتىمدى ورىندار تۋرالى جازدى, دەپ حابارلايدى astana-akshamy.kz.
«اۋلالار مەن قوعامدىق كەڭىستىكتەردى اباتتاندىرۋ جۇمىسى قارقىندى ءجۇرىپ جاتىر. ماسەلەن, حالىقارالىق بالالاردى قورعاۋ كۇنىنە وراي 20-دان استام اۋلا مەن قوعامدىق كەڭىستىكتى اشتىق. بيىل بارلىعى 170 اۋلا مەن قوعامدىق كەڭىستىكتى (ساياباقتار, گۇلزارلار, جەلەكجولدار) اباتتاندىرامىز. بۇل جۇمىسپەن قالانىڭ بارلىق اۋدانىن, ونىڭ ىشىندە ەلدى مەكەندەردى دە قامتيمىز.
الماتى اۋدانىندا اقبۇلاق وزەنىنىڭ جاعالاۋىن اباتتاندىرۋ جۇمىسى ءجۇرىپ جاتىر. بىلتىر ش.قۇدايبەردىۇلى داڭعىلىنان ابىلاي حان داڭعىلىنا دەيىنگى ارالىق قامتىلعان. بيىل ابىلاي حان داڭعىلىنان اممان كوشەسىنە دەيىن جۇرگىزىلىپ جاتىر. ولاردىڭ قاتارىندا بوس ۋاقىت وتكىزۋگە ارنالعان ورىندار, سپورت الاڭى, كوگالداندىرۋ, جارىقتاندىرۋ جانە ت.ب. بار. سونداي-اق, بيىل تاۋەلسىزدىك داڭعىلى مەن اممان كوشەسى اراسىندا جاياۋ جۇرگىنشىلەر كوپىرى اشىلادى.
سول سياقتى تاۋەلسىزدىك داڭعىلىنىڭ (اقبۇلاق وزەنىنىڭ جاعاسىنان ب.مومىشۇلى داڭعىلىنا دەيىن) جاياۋ جۇرگىنشىلەر بولىگى قولعا الىندى. مۇندا جاياۋ جۇرگىنشىلەر بولىگىن اباتتاندىرۋ, كوگالداندىرۋ, جارىقتاندىرۋ جۇرگىزىلۋدە, داڭعىل بويىندا كەدەرگىسىز ورتا قۇرىلىپ جاتىر. سونىمەن قاتار, جاياۋ جۇرگىنشىلەرگە ىڭعايلى بولۋ ءۇشىن كولەڭكەلى شاتىرلار دا ورناتىلادى.
بۇدان بولەك, وسىعان دەيىن ساۋدا ورتالىقتارىنىڭ قۇرىلىسى جوسپارلانعان تۇران داڭعىلىندا ەكى جاڭا قوعامدىق كەڭىستىك اشىلادى, جۇرگەنوۆ كوشەسىندە جاسىل جەلەك ورناتىلادى, ال مىڭجىلدىق اللەياسىندا 70 مىڭ شارشى مەتر اباتتاندىرىلادى.
سونداي-اق, ت.جۇرگەنوۆ كوشەسىن (ايناكول كوشەسىنەن ج. ناجىمەدەنوۆ كوشەسىنە دەيىن), ەسكى ۆوكزال اۋماعىن جانە وعان ىرگەلەس گەتە مەن ءبىرجان سال كوشەلەرىن اباتتاندىرامىز, «جاعالاۋ» تۇرعىن ءۇي كەشەنىن اباتتاندىرۋ اياسىندا 18 گەكتار اۋماق جانە ت.ب. اباتتاندىرىلادى», – دەپ جازدى جەڭىس قاسىمبەك.
