استاناداعى ۆياچەسلاۆ سۋ قويماسى, 2-جەو (تەتس-2)… بۇل – «مەحكولوننا-56» جشس ىسكە قوسقان ەلورداداعى ستراتەگيالىق ماڭىزدى نىساندار. وسى كاسىپورىندى جارتى عاسىردان استام كسرو قۇرمەتتى ەنەرگەتيگى, قاز كسر ەڭبەك سىڭىرگەن ەنەرگەتيگى, استانا قالاسىنىڭ قۇرمەتتى ازاماتى بولات قۋانىشەۆ باسقاردى. جالپى بولات سۇلتانۇلىنىڭ باس قالانىڭ ەنەرگەتيكالىق كەشەنىنىڭ قالىپتاسۋىنا, ەلوردانىڭ گۇلدەنىپ, كوركەيۋىنە قوسقان ۇلەسى زور. كەيىپكەرىمىز 1999-2003 جىلدارى استانا قالاسى ءماسليحاتىنىڭ ءىى شاقىرىلىمىنىڭ دەپۋتاتى بولدى. وسى كەزەڭدە باس قالانىڭ بولاشاققا دەگەن قارىشتى قادامدارى باستالىپ, استانانىڭ دامۋىنا نەگىز قالاعان تالاي ماڭىزدى ىستەر جاسالدى. سونىڭ باسى-قاسىندا بولات سۇلتانۇلى ءجۇردى.
بولات قۋانىشەۆ – اشارشىلىقتىڭ سوڭى قۋعىن-سۇرگىنگە ۇرىندىرعان وتكەن عاسىردىڭ وتىزىنشى جىلدارىنىڭ پەرزەنتى. ەڭبەكپەن ەسەيگەن ازاماتتىڭ اناسى وزات جۇمىسشى بولىپ, حالىق شارۋاشىلىعى جەتىستىكتەرى كورمەسىنە (ۆدنح) قاتىستى. ال ناعاشىسى رىسبەك داريمانوۆ سول زامانداعى وقىعان ازاماتتاردىڭ ءبىرى ەدى. الايدا ەكاتەرينبۋرگ ۋنيۆەرسيتەتىن ءبىتىرىپ, سولتۇستىك ولكەنىڭ جەر كوميتەتىن باسقارىپ جۇرگەندە رەپرەسسياعا ۇشىرادى. اناسى بالا بولاتقا «سەن مىنەزىڭ مەن ىسكەرلىك قابىلەتىڭمەن ناعاشىڭا ۇقسايسىڭ» دەيتىن. سول ايتقانداي, ىسكەرلىگى ەرتە ءبىلىنىپ, قاراپايىم جۇمىسشىدان كاسىپورىن باسشىسىنا دەيىن كوتەرىلدى.
بولات سۇلتانۇلىنىڭ ەڭبەك جولىنىڭ باستالۋى تىڭ يگەرۋدىڭ العاشقى جىلدارىنا سايكەس كەلدى. وسىدان 70 جىل بۇرىن اتباسار اۋدانى بوريسوۆكا ەلدى مەكەنى لەنين اتىنداعى كولحوزدا تراكتورشى بولىپ جۇرگەندە تىڭ يگەرۋشىلەردىڭ ءبىرىنشى لەگىن قارسى الدى. سول ۋاقىتتا اۋداندىق كومسومول كوميتەتىنىڭ بيۋرو مۇشەسى ەدى, سوندىقتان وسى ۇيىمنىڭ ءبىرىنشى حاتشىسى ۆيكتور پوليانسكيمەن بىرگە اۋدانداعى بۇكىل شارۋاشىلىقتاردى ارالاپ, تىڭ يگەرۋشىلەردىڭ جاعدايىمەن تانىستى.
مەحانيزاتسيا مەن ەلەكترلەندىرۋ تەحنيكۋمىن ءبىتىردى. تەلمان اتىنداعى سوۆحوزدا اۆتوپارك, شەبەرحانا مەڭگەرۋشىسى, باس ينجەنەردىڭ مىندەتىن اتقارۋشى بولدى. جالپى بولات قۋانىشەۆ – ارقاشاندا ءوزىن جەتىلدىرگەن ازامات. تەحنيكۋمنان كەيىن حالىق شارۋاشىلىعى ينستيتۋتىن, كسرو ەنەرگەتيكا مينيسترلىگى جانىنداعى جوعارعى تەحنيكالىق مەكتەپتى اياقتادى. ول باسقارعان «مەحكولوننا-56» كاسىپورنى كەشەگى تسەلينوگراد – اقمولانىڭ, بۇگىنگى استانانىڭ ەنەرگەتيكا كەشەنىن جولعا قويعانمەن قاتار تورعاي, قوستاناي, قاراعاندى, جەزقازعان وڭىرلەرىنىڭ شارۋاشىلىقتارىن بىرىڭعاي مەملەكەتتىك ەنەرگيا جۇيەسىنە قوسىپ, ەكىباستۇز – تسەلينوگراد ەلەكتر تاراتۋ جەلىسىن سالدى. بۇعان قوسا, الىپ وداق ىشىندەگى ماسكەۋ, ليپەتسك, تامبوۆ, ۆلاديمير وبلىستارىنىڭ بىرقاتار شارۋاشىلىقتارىنىڭ وسى جۇيەگە قوسىلۋىنا اتسالىستى. ال اقمولا استانا اتانعاندا وسىندا ءتورت قوسالقى ستانسا سالدى. بۇل ستانسالارعا اتاقتى Siemens كومپانياسىنىڭ قۇرال-جابدىقتارىن ورناتتى. وسى ستانسالارعا قوسا, ونداعان شاقىرىم ەلەكتركابەلدەر تارتىلدى.
بولات قۋانىشەۆ استانا قالاسى ءماسليحاتىنىڭ ءىى شاقىرىلىمىنىڭ دەپۋتاتى بولعاندا ارىپتەستەرى ونى تۇراقتى كوميسسيانىڭ توراعاسى ەتىپ سايلادى. وسى شاقىرىلىم دەپۋتاتتارىنىڭ قىزمەتى جاس استانانىڭ بەلسەندى قۇرىلىسى كەزەڭىمەن سايكەس كەلدى. سەسسيالاردا دەپۋتاتتار ەلوردانى اباتتاندىرۋ, ءتيىستى ينفراقۇرىلىمدى ازىرلەۋ, تۇرعىن ءۇي قۇرىلىسى, جولداردى جوندەۋ ماسەلەلەرىن شەشۋمەن اينالىستى. سول كەزەڭدە استانا تۇرعىندارىنىڭ ومىرىنە قولايلى جاعدايلار جاساۋعا, استانالىقتاردىڭ ءال-اۋقاتىن ارتتىرۋعا باعىتتالعان الەۋمەتتىك جانە ەكونوميكالىق دامۋ باعدارلامالارىن بەكىتتى. كولىك ينفراقۇرىلىمىن دامىتۋ, ەسكى جانە اپاتتى تۇرعىن ۇيلەردى ءسۇرۋ, شاعىن كاسىپكەرلىكتى دامىتۋ مەن قولداۋ, استانا قالاسىندا يپوتەكالىق نەسيەلەۋ جانە تۇرعىن ءۇي قۇرىلىسىن دامىتۋ باعدارلاماسى, 2010 جىلعا دەيىنگى استانا قالاسىنىڭ ورتالىقتاندىرىلعان جىلۋمەن قامتاماسىز ەتۋ باعدارلاماسى, ت.ب. ۇزاقمەرزىمدى باعدارلامالار بەكىتىلدى. كيسە كۋروكاۆا ازىرلەگەن استانا قالاسىن دامىتۋدىڭ باس جوسپارىن ءدال وسى شاقىرىلىم دەپۋتاتتارى بەكىتىپ, ۇكىمەتكە جىبەردى. ارينە, وسىنىڭ ءبارىنىڭ باسى-قاسىندا بولات سۇلتانۇلى دا ءجۇردى.
ەلەكترلەندىرۋ مەن ەكولوگيا. بۇل – كەيىپكەرىمىز ەرەكشە دەن قويعان سالالار. ەلوردانىڭ جاسىل جەلەككە ورانىپ, ابات قالاعا اينالۋىنا دا بولات قۋانىشەۆتىڭ قوسقان ۇلەسى زور. كاسىپورىن باسشىسى ءوز كەزىندە «مەحكولوننا-56» اۋماعىن تىنىستى كەڭەيتەتىن ورمانعا اينالدىردى. ءبىر جىلدارى شىعىس قازاقستان وبلىسىنان شىرشالاردى الدىردى. سەرىكتەستىك اۋماعىندا وسى كۇندەرى قايىڭ, ۇيەڭكى, شەتەن, ەمەن, تەرەك جايقالىپ تۇر. قارت جۋرناليست مويسەي گولدبەرگپەن ءبىر اڭگىمەسىندە بولات سۇلتانۇلى كاسىپكەرلەردى جاڭا ساياباقتار مەن گۇلباقتاردىڭ قۇرىلىسىنا ينۆەستيتسيا سالۋعا شاقىردى.
ءوزى باسقارعان كاسىپورىن قىزمەتكەرلەرىنىڭ الەۋمەتتىك جاعدايىنا, جايلى تۇرمىسىنا, جانعا راحات سىيلايتىن دەمالىسىنا شەيىن ەرەكشە كوڭىل بولگەن ءبىر باسشى بولسا, بۇل – بولات قۋانىشەۆ. الىپ وداق قۇلاعاندا كاسىپورىندى ساقتاپ قالعانمەن قاتار بىردە-ءبىر جۇمىسشىنى قىسقارتپادى. ولاردىڭ ءبارىن دە پاتەرمەن قامتاماسىز ەتتى. سونىمەن قاتار ت.بيگەلدينوۆ كوشەسىندە قوناق ءۇي, استانا ىرگەسىندە جۇمىسكەرلەر دەمالاتىن «نۇرا» دەمالىس ءۇيىن سالدى. «مەحكولوننا-56» مەكەمەسىندە جۇمىس ىستەپ, باسقا ەلگە قونىس اۋدارعاندار استاناعا كەلگەندە ولاردىڭ دەمالىسىنا دا جاعدايلار جاسالعان كەزدەر بولعان. ماسەلەن, «ەكسپو-2017» حالىقارالىق مامانداندىرىلعان كورمەسى ۋاقىتىسىندا گەرمانيادان ەلورداعا كەلگەن ەكى بۇرىنعى قىزمەتكەردىڭ قوناق ۇيگە ورنالاسۋى دا, تاماقتانۋى دا تەگىن بولدى.
2002 جىلدىڭ 26 ماۋسىمىندا بولات قۋانىشەۆقا ەلوردانىڭ ەنەرگەتيكالىق كەشەنى, الەۋمەتتىك سالاسىنىڭ دامۋىنا قوسقان وراسان ۇلەسى جانە بەلسەندى قوعامدىق قىزمەتى ءۇشىن استانا قالاسىنىڭ قۇرمەتتى ازاماتى اتاعى بەرىلدى. اقمولا وڭىرىندە دۇنيەگە كەلىپ, تۋعان جەرگە تۋىن تىگىپ, تۋعان قالاسىنىڭ وركەندەۋى جولىندا ايانباي ەڭبەك ەتكەن ازامات ءۇشىن بۇل – لايىقتى ماراپات.
