جاستار – قوعامنىڭ قوزعاۋشى كۇشى, ەلىمىزدىڭ ەرتەڭى. ولارعا جان-جاقتى قولداۋ كورسەتۋ – مەملەكەت مىندەتتەرىنىڭ باسىم باعىتىنىڭ ءبىرى.
ەلدەگى وقيعالاردىڭ بەل ورتاسىندا جاستار ءجۇر. ەلىمىزدە ورىن العان توتەنشە جاعدايلاردا توبە كورسەتەتىن دە جاستار, قولداۋشىلار دا جاستار. ال بىزدە ۇكىمەت تاراپىنان ولارعا ءتيىستى دەڭگەيدە كوڭىل ءبولىنىپ جاتىر ما؟ ەڭ باستى قاجەتتىلىك – باسپانا ماسەلەسى شەشىمىن تاپپاي وتىر.
جىرى باسىلماعان جاستارعا بەرىلگەن جالدامالى پاتەر جايىندا رومان ۆاسيلەۆيچكە سكليارعا دەپۋتاتتىق ساۋال جولداعانمىن. «جاستاردى تۇرعىن ۇيمەن قامتاماسىز ەتۋ ماسەلەسى ۇكىمەتتىڭ باقىلاۋىندا» دەپ قىسقا قايىرعان. جاستاردىڭ تالاپ-تىلەگىن ناقتى شەشىم مەن ارەكەت جاسايدى دەگەن نيەتپەن ماسەلەنى قايتا قوزعاپ وتىرمىن.
2019 جىلدان بەرى استانا, الماتى, شىمكەنت قالالارىندا جالدامالى پاتەرگە ورنىققان جاستاردىڭ سانى 10000-عا جۋىقتادى. 2019 جىلى باسپانا العان جاستاردىڭ باسپانانى بوساتۋىنا از ۋاقىت قالدى. بۇگىندە مەگاپوليستەردەگى جاستاردىڭ دالادا قالۋ قاۋپى جوعارى. تاعى ءبىر قوسارىم, وتكەن جىلى بەرىلۋى كەرەك بولعان پاتەرلەر الماتى قالاسىنىڭ جاستارىنا ءالى بەرىلمەدى. ناقتى ءتىزىم, ناتيجە شىقپادى.
جالدامالى پاتەر العان جاستاردىڭ قارجى جيناپ, ءوز باسپاناسىن الا الماۋدىڭ وزىندىك سەبەبى بار. 2019 جىلدان بەرى ينفلياتسيا دەڭگەيى شارىقتاپ, ءۇي باعاسى جىلدان-جىلعا ءوستى. وسىدان 5 جىل بۇرىن رەسپۋبليكا بويىنشا پاتەردىڭ ورتاشا شارشى مەترى 200 مىڭ تەڭگە بولسا, قازىر 400 مىڭ تەڭگەگە جۋىقتادى. ياعني 2 ەسە ءوستى. شىندىققا تۋرا قاراساق, باسپاناعا قارجى جيناۋدان گورى قىمباتشىلىق قىسپاققا الىپ, كۇنكورىس ماسەلەسى الدىڭعى ورىنعا شىقتى. بۇل – ءبىر. ەكىنشىدەن, ەلدە جاستارعا ارنالعان ءتيىمدى مەملەكەتتىك باعدارلاما جوق. ەلدە ءتيىمدى باعدارلامانىڭ جوعىنان جاستار باسپانا الۋ ءۇشىن شەتەل اسىپ جۇمىس ىستەۋگە ءماجبۇر. كەلمەي, سول جاقتا قالعانى قانشاما. بۇل ەلىمىزدە دارىندى, تالانتتى جاستاردىڭ ازايۋىنا الىپ كەلۋدە. ۇشىنشىدەن, جالدامالى پاتەر العان جاستار وزگە مەملەكەتتىك باعدارلامالار مەن ءۇي كەزەگىندە تۇرۋ مۇمكىندىگىنەن ايىرىلعان. اقشاسىن جيناپ, ءتۇيىپ وتىرعان جاستار باسقا باعدارلاماعا قاتىسا الماسا قالاي باسپانالى بولماق؟!
«ءبىز قاراپايىم ەڭبەك ادامىنا قۇرمەت كورسەتۋىمىز كەرەك» دەپ پرەزيدەنتىمىز قاسىم-جومارت كەمەلۇلى ايتقانداي, ەڭبەك ادامىنىڭ نەگىزگى باستاۋى وسى جۇمىسشى جاستار ەمەس پە؟! جۇمىسشى جاستارعا قولداۋ كورسەتسەك, وسىنداي ازاماتتار ەرتەڭ ەلىمىزدىڭ دامۋىنا زور ۇلەس قوسادى.
وسى ايتىلعان فاكتورلاردى ەسكەرە وتىرىپ, جاستاردىڭ ءتيىمدى باسپانا الۋىنا جاعداي جاساۋ جانە كەمى 10 پايىز باستاپقى جارنامەن وزدەرى تۇرىپ جاتقان باسپاناسىن ساتىپ الۋعا مۇمكىندىك بەرۋ ماسەلەسى شەشىمىن تاپسا ەكەن دەيمىن. پايىز مولشەرلەمەسى دە 5 پايىزدان اسپاۋى ءتيىس نەمەسە جالدامالى پاتەردە تۇرۋ مەرزىمىن ۇزارتۋ كەرەك.
داۋلەت مۇقاەۆ,
ءماجىلىس دەپۋتاتى
