بەلسەندى ۇزاق ءومىر ءسۇرۋ ورتالىعىنىڭ «ەسىل» اۋدانى بويىنشا الەۋمەتتىك قىزمەت كورسەتۋ بولىمىندە باق وكىلدەرىنىڭ كاسىبي مەرەكەسىنە وراي «جۋرناليست – جارقىن ىستەر جارشىسى» اتتى مادەني ءىس-شارا ۇيىمداستىرىلدى, دەپ حابارلايدى astana-akshamy.kz
قازاقستان جۋرناليستەرىنىڭ كۇنىنە ورايلاستىرىلعان ءىس-شاراعا باق وكىلدەرى مەن ارداگەر جۋرناليستەر قاتىستى.
ءىس-شارادا بەلسەندى ۇزاق ءومىر ءسۇرۋ ورتالىعىنىڭ قىزمەتىن ناسيحاتتاپ, زەينەتكەرلەردىڭ بەلسەندى ءومىر سالتىن قالىپتاستىرۋ ىسىنە تاباندىلىقپەن ۇلەس قوسىپ كەلە جاتقان بىرقاتار جۋرناليستەر ماراپاتتالدى.
ورتالىقتىڭ ەگدە جاستاعى ادامدار ءۇشىن اتقارىپ جاتقان يگى ىستەرىن باق-تا بەلسەندى جاريالاپ جۇرگەن «قازاق راديوسىنىڭ» رەداكتور-جۇرگىزۋشىسى جانبولات شاكىمنىڭ, «ەگەمەن قازاقستان» رەسپۋبليكالىق گازەتىنىڭ اعا ءتىلشىسى ەسكەندىر زۇلقارنايدىڭ, «Bag.kz» اقپاراتتىق اگەنتىگىنىڭ اعا ءتىلشىسى گۇلجان رامانقۇلوۆانىڭ, «ايقىن» گازەتىنىڭ ءتىلشىسى نۇرلان ورازعاليەۆتىڭ, «Qazaqstan» ۇلتتىق تەلەارناسىنىڭ «تاڭشولپان» اقپاراتتىق-سازدى باعدارلاماسىنىڭ شىعارماشىلىق ۇجىمىنىڭ جەتەكشىسى ارگەنتينا جانىبەكتىڭ, «اstana akshamy» گازەتىنىڭ شولۋشىسى امانعالي قالجانوۆتىڭ جانە «ۆەچەرنيايا استانا» گازەتىنىڭ ءتىلشىسى ەكاتەرينا تىششەنكونىڭ ەڭبەكتەرى ەرەكشە اتاپ ءوتىپ, ولارعا سىي-سياپاتقا جاسالدى.
سونىمەن قاتار مەرەكەلىك شاراعا بەيبىتبەك ابدىكاريموۆ, قارلىعاش نيگمەتوۆا مەن ايكەرىم سەيسەنبينا سىندى ارداگەر-جۋرناليستەر شاقىرىلىپ, ماراپاتتالدى.
جۋرناليستەر قاۋىمىنا ەسىل اۋدانىنىڭ زەينەتكەرلەرىنەن قۇرالعان ونەر ۇجىمدارى كونتسەرت كورسەتتى. «اسىل مۇرا» دومبىرا وركەسترى مەن «ەسىل تولقىندارى» ارداگەرلەر ءانسامبلى ءان مەن كۇيدى تارتۋ ەتتى.
«سىزدەر ارقىلى استانا قالاسىنىڭ تۇرعىندارى ەگدە جاستاعى ادامداردىڭ باس قوساتىن, مادەني, ساۋىقتىرۋ, زەرىگۋ, دەمالىس ورنى بار ەكەنى جانە زەينەتكەرلەر ءۇشىن كورسەتىلەتىن تەگىن قىزمەت تۇرلەرى تۋرالى حاباردار بولۋدا. قازىرگى تاڭدا وتاندىق باق وكىلدەرى اعا بۋىن وكىلدەرىنىڭ ونەگەلى ىستەرى مەن ۇرپاقتار ساباقتاستىعىن قالىپتاستىرۋدا جاستارعا مورالدىق-ادامگەرشىلىك تاربيە بەرۋ ءىسىن ناسيحاتتاۋدا ۇلكەن ءرول اتقارادى» – دەپ جۋرناليستەر جۇمىسىنىڭ ماڭىزدىلىعىنا توقتالدى ورتالىق ديرەكتورى مۇحتار ەركەتاەۆ.
كەش سوڭىندا بەلسەندى ۇزاق ءومىر ءسۇرۋ ورتالىعىنىڭ قىزمەتكەرلەرى مەن قىزمەت الۋشىلارعا جۋرناليستەردى كاسىبي مەرەكەلەرىمەن قۇتتىقتاپ, قىزمەتتەرىنە تابىس تىلەپ, وقىرماندار مەن تىڭدارمانداردىڭ, كورەرمەندەردىڭ ىستىق ىقىلاسىنا بولەنە بەرۋلەرىن تىلەدى.
