استانا قالاسىنىڭ ەسىل اۋداندىق بەلسەندى ۇزاق ءومىر ءسۇرۋ ورتالىعىنىڭ زەينەتكەرلەرى كوپتەگەن ءىس-شارالارعا قاتىسىپ, قوعامدىق تۇرعىدا بەلسەندىلىك تانىتىپ ءجۇر.
جالپى وسى ورتالىققا كىرگەن سايىن بارلىق قىزمەتكەرلەردىڭ زەينەتكەرلەرمەن قارىم-قاتىناسى, قىزمەت كورسەتۋلەرى ەرەكشە ەكەندىگىنىڭ كۋاسى بولىپ ءجۇرمىن. ماسەلەن, قازاقستان حالقىنىڭ بىرلىگى كۇنىنە وراي «ىنتىماعى جاراسقان» دەگەن اتاۋمەن ۇيىمداستىرىلعان تاماشا كونتسەرتتىك باعدارلاما, انالار كۇنى مەرەكەسىنە «انالار الەمى» سۋرەت كورمەسى جانە «قولونەر – توقىما» شەبەرلىك ساباعى, سونىمەن قاتار «باتىر انالار – ەل ماقتانىشى» اتتى «التىن القا», «كۇمىس القا» بەلگىسى بار انالاردى قۇرمەتتەۋگە ارنالعان ءىس-شارالار كوپتىڭ كوڭىلىنەن شىققانىنا كامىل سەنىمدىمىن.
استانا قالاسى م.وتەمىسوۆ اتىنداعى وقۋشىلار سارايىندا «ۇرپاقتار ساباقتاستىعى» جوباسى اياسىندا استانا قالاسى ارداگەرلەر كەڭەسىنىڭ جانە ەسىل اۋداندىق بەلسەندى ۇزاق ءومىر ءسۇرۋ ورتالىعىنىڭ ۇيىمداستىرۋىمەن «ارداگەرلەر كوكتەمى» اتتى كوكتەم مەرەكەلەرىنە ارنالعان فەستيۆال ءوتتى. ءىس-شارادا زەينەتكەرلەردەن قۇرالعان حالىقتىق جانە ونەر انسامبلدەرى ونەر كورسەتتى. قاتىسۋشى ونەر ۇجىمدارىنا استانا قالاسى اكىمىنىڭ اتىنان العىس ايتىلىپ, «ىقىلاس گۇلى» ۇسىنىلدى.
سونىمەن قاتار «سىر ساندىق» ەرىكتى زەينەتكەرلەر زياتكەرلىك كلۋبى ۇيىمداستىرعان «نە؟ قايدا؟ قاشان؟» 6-شى ينتەللەكتۋالدىق ءتۋرنيرى كوكتەمگى ويىنى بولىپ ءوتتى. مۇندا ەسىل, نۇرا, بايقوڭىر, سارىارقا, الماتى زەينەتكەرلەرى باس قوستى. ءىس-شارانى ەسىل اۋداندىق ءبولىم باسشىسى جانار ەسەنامانوۆا قۇتتىقتاۋ سوزبەن اشتى. كەزەگىمەن ءسوز العان زەينەتكەرلەر اراسىنداعى ينتەللەكتۋالدىق بىلىمدىلەر ءتۋرنيرىنىڭ العاشقى ۇيىمداستىرۋشىسى, جەتەكشىسى سەيدالين بولاتبەك قاتىسۋشى كوماندالارعا ساتتىلىك تىلەدى. «اقىل كوپكە جەتكىزەر, ونەر كوككە جەتكىزەر» ماقساتىمەن وتكەن كوكتەمگى ويىندا ەسىل جانە بايقوڭىر اۋداندارى فينالعا شىقتى. فينال قورىتىندىسى بويىنشا بايقوڭىر اۋدانى كۋبوكقا يە بولدى. ەسىل اۋدانى بويىنشا ەكىنشى مارتە قازاق تىلىندە وتكەن بىلىمدىلەر ءتۋرنيرى كوپشىلىكتىڭ كوڭىلىنەن شىقتى.
ەسىل اۋدانى بەلسەندى ۇزاق ءومىر ءسۇرۋ ورتالىعىنىڭ ۇيىمداستىرۋىمەن زەينەتكەرلەر تاريحتىڭ قارالى بەتىن ەسكە تۇسىرەتىن ورىنداردىڭ ءبىرى اقمول كەنتىندە ورنالاسقان ساياسي قۋعىن-سۇرگىن جانە توتاليتاريزم قۇرباندارىن ەسكە الۋعا ارنالعان «الجير» مۇراجايىنا ساياحاتقا باردىق. بۇل ساپارىمىزدا ەلۋ ورىندىق اۆتوبۋستى تەگىن ۇيىمداستىرىپ, بىزگە ءسات-ساپار تىلەپ شىعارىپ سالعان جانار ەسەنامانوۆاعا, ءبىزدىڭ باسى-قاسىمىزدا بولىپ, بەينە بالالارىنا قامقورلىق قىلعانداي جان-تانىمەن جۇگىرىپ جۇرگەن گۇلشات اۋباكيروۆانىڭ ەڭبەكتەرىنە تابىس, دەندەرىنە ساۋلىق, وتباسىلىق باقىت تىلەيمىن.
ارينە, اۋداندىق بەلسەندى ۇزاق ءومىر ءسۇرۋ ورتالىعىنىڭ دۇرىس جۇمىستارى تۋرالى ءالى دە كوپ جازا بەرۋگە بولار ەدى. بۇل ورتالىقتا قوعامدىق تۇرعىدان بەلسەندى زەينەتكەرلەر وتە كوپ. ولار استانادا ءوتىپ تۇراتىن قوعامدىق-ساياسي, الەۋمەتتىك-رۋحاني ءىس-شارالارعا تۇراقتى قاتىسىپ كەلەدى. وسىنداي ورتالىق اشىپ, زەينەتكەرلەرگە قوعاممەن ارالاسۋ ءۇشىن جاعداي جاساپ بەرگەن استانا قالاسىنىڭ اكىمدىگىنە ايتار العىسىمىز شەكسىز. سونىمەن قاتار مەكەمە جۇمىسىن شىنايى جاناشىرلىقپەن ۇيىمداستىرىپ جۇرگەن مۇحتار ەركەتاەۆقا دا ريزاشىلىعىمىزدى بىلدىرەمىز.
تۇيىندەپ ايتقاندا, زەينەتكەرلەر ءۇشىن وسىنداي جاعداي جاسالا بەرسە, اعا ۇرپاقتىڭ قوعامعا بەرەرى ءالى دە كوپ بولار ەدى. شىن مانىندە, ەلوردامىزدا بەلسەندى زەينەتكەرلەر كوبەيىپ كەلەدى.
كۇلاش شۇرەنوۆا,
ارداگەر-ۇستاز, ءبىلىم بەرۋ ءىسىنىڭ ۇزدىگى
