ءبىلىم بەرۋ سالاسىندا جاسالعان سىبايلاس جەمقورلىق ارەكەتتەردەن مەملەكەتكە بىلتىردان بەرى 15,1 ملرد تەڭگە شىعىن كەلگەن. تولىعىراق سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى دانيار بيگايداروۆ ايتىپ بەردى, دەپ حابارلايدى astana-akshamy.kz.
«سىبايلاس جەمقورلىققا قارسى قىزمەت ءبىلىم بەرۋ سالاسىنداعى جۇيەلى جەمقورلىق فاكتىلەرىنىڭ جولىن كەسۋ بويىنشا جۇمىستى جالعاستىرۋدا. 2023 جىلدىڭ باسىنان بەرى وسى سالادا بارلىعى 229 قىلمىستىق ءىس تىركەلگەن. ولار بويىنشا شىعىن 15,1 ملرد تەڭگەنى قۇرادى. جىمقىرۋدىڭ ەڭ كوپ سوماسى جەتىسۋ, تۇركىستان, قىزىلوردا, الماتى, اقتوبە وبلىستارى جانە الماتى قالاسىندا انىقتالدى», – دەدى دانيار بيگايداروۆ اگەنتتىكتە وتكەن ءباسپاسوز ءماسليحاتىندا.
ونىڭ ايتۋىنشا, وسى ۋاقىت ارالىعىندا 317 تۇلعا قىلمىس ۇستىندە اشكەرەلەنىپ, ونىڭ ىشىندە 144 ادام سوتتالعان.
«اقتوبە وبلىسى بويىنشا سىبايلاس جەمقورلىققا قارسى قىزمەت شالقار اۋدانىنداعى ءبىلىم ءبولىمىنىڭ باسشىسىنا قاتىستى قىلمىستىق ءىستى تەرگەۋدە. ول اۋداندىق جالپى ءبىلىم بەرەتىن ورتا مەكتەپتىڭ ديرەكتورى ارقىلى قىزمەت بويىنشا جالپى قامقورلىعى ءۇشىن ۆەدومستۆولىق باعىنىستى ۇيىمداردىڭ باسشىلارىنان جالپى سوماسى 18,5 ملن تەڭگە پارا الدى دەگەن كۇدىككە ءىلىندى. سوتتىڭ سانكتسياسىمەن ءبىلىم ءبولىمىنىڭ باسشىسى مەن اۋداندىق مەكتەپ ديرەكتورى قاماۋعا الىندى», – دەيدى ول.
