استانا قالاسىنىڭ مەكتەپ وقۋشىلارى سوڭعى جىلدارى رەسپۋبليكالىق جانە حالىقارالىق ءپان وليمپيادالارىنان جۇلدەسىز قايتقان ەمەس. «ەلوردانىڭ ءبىلىم بەرۋ جۇيەسىن دامىتۋدىڭ 2023-2029 جىلدارعا ارنالعان جول كارتاسى» اياسىندا قالاداعى مەكتەپتەر 100 پايىز ەلەكتروندى وقۋلىقتارمەن قامتاماسىز ەتىلگەن. مەملەكەت باسشىسىنىڭ تاپسىرماسى بويىنشا ەلوردادا 2029 جىلعا دەيىن 15 زاماناۋي قوسىمشا ءبىلىم بەرۋ مەكەمەلەرىن سالۋ جوسپارلانعان. وسىنداي ىلكىمدى ءىس-شارالاردىڭ قولعا الىنۋىنا بايلانىستى وقۋشىلاردىڭ ءبىلىم ساپاسى دا جىلدان-جىلعا ارتىپ كەلەدى.
جاقىندا ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە, ءا.بوكەيحان اتىنداعى جانە ا.بايتۇرسىنوۆ اتىنداعى BINOM مەكتەپتەرىندە 9-11 سىنىپ وقۋشىلارى اراسىندا رەسپۋبليكالىق وليمپيادانىڭ قالالىق كەزەڭى ءوتتى. كەشە ءال-فارابي اتىنداعى وقۋشىلار سارايىندا اتالمىش وليمپيادا جەڭىمپازدارى ماراپاتتالدى.
وليمپيادانى ۇيىمداستىرۋشى «استانا دارىنى» دارىندى بالالار مەن تالانتتى جاستاردى انىقتاۋ جانە قولداۋ ورتالىعىنىڭ مالىمەتىنشە, بيىل 762 ەلوردالىق وقۋشى اتالعان ءبىلىم سايىسىنان جەڭىمپاز اتانعان. ونىڭ ىشىندە 100 وقۋشى I ورىن, 218 وقۋشى II ورىن, 444 وقۋشى III ورىندى يەلەندى.
«15 ءپان بويىنشا ءداستۇرلى تۇردە وتەتىن وليمپياداعا قاتىسۋشى ەلوردالىق زياتكەر شاكىرتتەردىڭ سانى جىل سايىن ارتىپ كەلەدى. بيىل استانا قالاسى اۋداندارى بويىنشا 4000-عا جۋىق وقۋشى العاشقى كەزەڭگە قاتىسىپ, ولاردىڭ اراسىنان 2000 بالا كەلەسى كەزەڭگە جولداما الدى. ونىڭ ىشىنەن 762 جۇلدەگەر توپ جاردى. I ورىن العان زياتكەر وقۋشىلار رەسپۋبليكالىق كەزەڭگە وتەدى, – دەدى «استانا دارىنى» دارىندى بالالار مەن تالانتتى جاستاردى انىقتاۋ جانە قولداۋ ورتالىعىنىڭ ديرەكتورى جانار بيسەمباەۆا.
