استانادا ۆانداليزم جانە قوعامدىق ءتارتىپتى بۇزۋ جاعدايلارىمەن كۇرەس ءجۇرىپ جاتىر. ءتارتىپ ساقشىلارى ۆاندالداردى انىقتاپ, ولاردى جاۋاپكەرشىلىككە تارتادى, دەپ حابارلايدى اstana-akshamy.kz.
قالانىڭ 71 جاستاعى تۇرعىنى 3 مامىر كۇنى تۇستەن كەيىن اباي داڭعىلىنداعى №47 ءۇيدىڭ جانىندا تۇراقتا بولعان. ول تۇراقتا تۇرعان «تويوتا كوروللا» كولىگىنىڭ الدىڭعى تەرەزەسىن زاقىمداپ, بوتەن ادامنىڭ مۇلكىنە زيان كەلتىردى.
ءتارتىپ ساقشىلارى ونى تاۋىپ, «بوتەننىڭ مۇلكىن قاساقانا جويۋ نەمەسە ءبۇلدىرۋ» قازاقستان رەسپۋبليكاسى اكىمشىلىك قۇقىق بۇزۋشىلىق تۋرالى كودەكسىنىڭ 147-بابى-1-بولىگى بويىنشا جاۋاپقا تارتتى. وعان 20 اەك ايىپپۇل سالىنادى نەمەسە 15 تاۋلىككە دەيىن قاماۋعا الىنادى.
وسىنداي جاعداي 17 ماۋسىمدا مولداعۇلوۆا كوشەسى, 22/1 مەكەنجايىندا ساعات 23.30-دا بولدى. 47 جاستاعى ازامات Chery Tiggo 7 كولىگىنىڭ فاراسىن ادەيى زاقىمدادى. كەلتىرىلگەن زالال سوماسى 600 مىڭ تەڭگەنى قۇرادى.
22 ماۋسىمدا ساعات 19.40-تا 41 جاستاعى ايەل ەكىنشى قالالىق بالالار ەمحاناسىندا دارىگەرمەن جانجال كەزىندە ونىڭ تەلەفونىن سىندىرىپ, باسقا بىرەۋدىڭ مۇلكىنە زيان كەلتىردى.
بارلىق قۇقىق بۇزۋشىلار اكىمشىلىك جاۋاپكەرشىلىككە تارتىلدى.
ەستەرىڭىزگە سالا كەتەيىك, استانادا «Stop, ۆاندال!» اكتسياسى ءوتىپ جاتىر. ونى ەرىكتىلەر, بەلسەندىلەر, بەلگىلى سپورتشىلار, ۇەۇ وكىلدەرى, قالا تۇرعىندارى, اۋداندىق اكىمدىكتەر مەن قالالىق پوليتسيا دەپارتامەنتىنىڭ ەسىرتكى قىلمىسىنا قارسى كۇرەس باسقارماسىنىڭ قىزمەتكەرلەرى, ءماسليحات دەپۋتاتتارى قولدادى.
اكتسيا اياسىندا قالادا كۇندىزگى جانە تۇنگى رەيدتەر, سونداي-اق تۇرعىندار اراسىندا قوعامدىق ءتارتىپتى ساقتاۋ جانە قالا مۇلكىنە ۇقىپتى قاراۋ قاجەتتىلىگى تۋرالى ءتۇسىندىرۋ جۇمىسى جۇرگىزىلەدى.
جىل باسىنان بەرى سوت 120-دان استام ادامدى بوتەننىڭ مۇلكىن قاساقانا بۇلدىرگەنى, جالپى قوعامدىق ورىنداردى لاستاعانى, عيماراتتار مەن تۇرعىن ءۇي-جايلاردى بۇلدىرگەنى ءۇشىن جازالادى. ولاردىڭ بارلىعى جاۋاپقا تارتىلدى.
ءۆانداليزمنىڭ الدىن الۋ جۇمىسى قالالىق پروكۋراتۋرا مەن پوليتسيا دەپارتامەنتىنىڭ ۇيلەستىرۋىمەن جۇرگىزىلەدى.
