بيىل 170-كە جۋىق اۋلا مەن قوعامدىق كەڭىستىك اباتتاندىرىلماق, دەپ حابارلايدى astana-akshamy.kz
«اۋا رايى جىلىنعاننان كەيىن ەلوردامىزدى كوركەيتۋ بويىنشا اۋقىمدى جۇمىس باستالىپ كەتتى. ناقتىراق ايتقاندا, اباتتاندىرۋ جانە كوگالداندىرۋ, جول جوندەۋ جانە سالۋ, سانيتارلىق تازالاۋ, جوندەۋ-قالپىنا كەلتىرۋ جۇمىسى جانە ت.ب.
بيىل 170-كە جۋىق اۋلا مەن قوعامدىق كەڭىستىكتى اباتتاندىرۋدى جوسپارلاپ وتىرمىز. سول سياقتى جوسپارىمىز بويىنشا, 1 ميلليون جاسىل جەلەك وتىرعىزىلادى. ماسەلەن, ۇلىتاۋ اللەياسىن, ماڭگىلىك ەل, تاۋەلسىزدىك داڭعىلدارىن اۋقىمدى دەڭگەيدە اباتتاندىرىپ, كوگالداندىرامىز. سونداي-اق, «قازاق ەلى» الاڭىن, «مىڭجىلدىق» اللەياسىن, جۇرگەنوۆ اللەياسىنداعى گۇلزاردى, «كەرۋەن» سوو جانىنداعى گۇلزاردى جانە ت.ب. اباتتاندىرامىز.
سونىمەن قاتار, ەسكى ۆوكزال مەن وعان ىرگەلەس گەتە مەن ءبىرجان سال كوشەلەرىنىڭ اۋماعى اباتتاندىرۋمەن قامتىلادى. جاعالاۋ شاعىن اۋدانى دا كەشەندى اباتتاندىرىلادى. بۇعان قوسا, اقبۇلاق جاعالاۋى, پرەزيدەنت ساياباعى جانە «بەيبىتشىلىك پەن كەلىسىم» ساياباعى ەنەتىن ەسىل وزەنىنىڭ بويىنداعى ساياباق كلاستەرىن اباتتاندىرۋدى جوسپارلاپ وتىرمىز.
اۋلالار مەن قوعامدىق كەڭىستىكتەردى اباتتاندىرۋ جۇمىسى بارلىق اۋداندا, ونىڭ ىشىندە ەلدى مەكەندەردە دە جۇرگىزىلەدى.
جول جۇمىستارىنا توقتالار بولسام, بيىل 50-دەن استام كوشەنى جوندەۋدى جوسپارلاپ وتىرمىز. تاعى 200-دەن استام كوشە اعىمداعى جوندەۋمەن قامتىلادى. سونىمەن قاتار, كۇندەلىكتى نەگىزدە جوندەۋ-قالپىنا كەلتىرۋ جۇمىسى, سانيتارلىق تازالاۋ, ەكواكتسيا جانە ت.ب. جۇرگىزىلىپ جاتىر». – دەپ جازدى استانا قالاسىنىڭ اكىمى ءوزىنىڭ الەۋمەتتىك پاراقشاسىندا.
