بيىل ەلوردادا ينكليۋزيانى قولداۋ بويىنشا 8 كابينەت اشىلادى
استانادا ەرەكشە ءبىلىم بەرۋدى قاجەت ەتەتىن مەكتەپ جاسىنا دەيىنگى بالالارعا مەملەكەتتىك قىزمەت كورسەتۋ اياسى كەڭەيەدى. 2024 جىلى 4 بالاباقشادا (№ 35,63,86,98) جانە 4 شاعىن ورتالىقتا (№8, №11, №30,№76) ينكليۋزيانى قولداۋ كابينەتتەرىن اشۋ جوسپارلانىپ وتىر. بۇل تۋرالى ەلوردانىڭ كوممۋنيكاتسيالار قىزمەتىندە وتكەن بريفينگتە ءبىلىم باسقارماسىنىڭ باسشىسى قاسىمحان سەنعازىەۆ ءمالىم ەتتى, دەپ حابارلايدى astana-akshamy.kz.
ۆەدومستۆو باسشىسىنىڭ ايتۋىنشا, وتكەن جىلى 4 بالاباقشادا (№54, №60, №66, №95) ەموتسيالىق-ەركi جاعىنان جانە مىنەز-قۇلقىندا (اۋتيزم) بۇزىلىستارى بار بالالارعا ارنالعان ينكليۋزيانى قولداۋ كابينەتتەرى اشىلدى.
«العاش رەت, بيىل 1 قاڭتاردان باستاپ اتا-انالارعا قولايلى بولۋ ماقساتىندا, ەلورداداعى 8 پسيحولوگيالىق-مەديتسينالىق-پەداگوگيكالىق كەڭەس بەرۋ كابينەتتەرىنە جازىلۋ birge.astana.kz. سايتىندا ونلاين جۇزەگە اسىرىلىپ جاتىر», – دەدى قاسىمحان سەنعازىەۆ.