بيىلعى 1 قاڭتاردان باستاپ ەلىمىزدە نە وزگەرەتىنىنە تاعى دا قىسقاشا شولۋ جاسايىق.
اۆتوگازدىڭ شەكتى باعاسى
ەنەرگەتيكا مينيسترلىگى سۇيىتىلعان مۇناي گازىن بولشەك ساۋدادا وتكىزۋدىڭ شەكتى باعالارىن بەكىتتى. ولار 2024 جىلعى 1 قاڭتاردان كۇشىنە ەندى.
وڭىرلەر بويىنشا بەكىتىلگەن شەكتى باعا:
استانا – 76 تەڭگە;
الماتى – 81 تەڭگە;
شىمكەنت – 64 تەڭگە;
الماتى وبلىسى, سولتۇستىك قازاقستان وبلىسى – 81 تەڭگە;
اتىراۋ, اقتوبە, ماڭعىستاۋ وبلىستارى – 54 تەڭگە;
اقمولا وبلىسى, شىعىس قازاقستان وبلىسى, قوستاناي, قاراعاندى وبلىسى – 76 تەڭگە;
جامبىل وبلىسى – 71 تەڭگە;
باتىس قازاقستان, قىزىلوردا, تۇركىستان وبلىستارى – 64 تەڭگە;
پاۆلودار وبلىسى – 74 تەڭگە.
اباي, جەتىسۋ, ۇلىتاۋ وبلىستارى – 76 تەڭگە.
ءار وبلىستىڭ شالعاي اۋداندارى ءۇشىن (وبلىس ورتالىقتارىنان 200 شاقىرىمنان استام) شەكتى باعالار 5 تەڭگەگە جوعارى بولادى.
دەكلاراتسيانى كىم تاپسىرادى؟
1 قاڭتاردا ەلىمىزدە جالپىعا بىردەي دەكلاراتسيالاۋدىڭ ءۇشىنشى كەزەڭى باستالدى. الداعى جىلدىڭ 15 قىركۇيەگىنە دەيىن كاسىپكەرلەر مەن ولاردىڭ جۇبايلارى, زاڭدى تۇلعالاردىڭ باسشىلارى مەن قۇرىلتايشىلارى, جەكە كاسىپكەرلەر جانە ولاردىڭ جۇبايلارى دەكلاراتسيا تاپسىرۋعا مىندەتتەلەدى. بۇل تالاپ جەكە كاسىپكەرلىگى مەن زاڭدى تۇلعاسى ءوز قىزمەتىن توقتاتقان نەمەسە مۇلدەم جۇمىس ىستەمەگەن جەكە كاسىپكەرگە دە قاتىستى. قازاقستاندا مۇلىك رەتىندە تىركەلگەن پاتەرلەردى, قالا سىرتىنداعى ۇيلەردى نەمەسە اۆتوكولىكتەردى دەكلاراتسياعا ەنگىزۋدىڭ قاجەتى جوق. بارلىق مەملەكەتتىك ورگانمەن ينتەگراتسيانىڭ ارقاسىندا مەملەكەتتىك كىرىستەر كوميتەتىندە ولار تۋرالى اقپارات بار.
موراتوري اياقتالدى
قازاقستاندا شاعىن كاسىپكەرلىك, سونىڭ ىشىندە ميكروكاسىپكەرلىك سۋبەكتىلەرىن تەكسەرۋگە موراتوري اياقتالدى. 1 قاڭتاردان باستاپ ورتالىق مەملەكەتتىك جانە جەرگىلىكتى اتقارۋشى ورگانداردىڭ تەكسەرىسى قايتا جانداندى. ەلىمىزدە بيزنەستى تەكسەرۋگە موراتوري 2020 جىلعى 1 قاڭتاردا جاريالانعان بولاتىن. بيىلدان باستاپ بيزنەستى تەكسەرۋگە ادام قاتىسپايدى. ويتكەنى ەلىمىزدە تاۋەكەلدەردى باسقارۋ جۇيەسى اۆتوماتتاندىرىلعان. ناتيجەسىندە بيزنەستى جوسپارلى تەكسەرۋ 2 ەسە جانە ايىپپۇلدار سانى بىرنەشە ەسە ازايادى دەپ كۇتىلۋدە.
قازاق تىلىنەن ەمتيحان
2024 جىلى 5-8 جانە 10-سىنىپ وقۋشىلارى قازاق تىلىنەن ەمتيحان تاپسىرادى. بۇل وزگەرىستەر 2023-2024 وقۋ جىلىنان باستاپ ەنگىزىلگەن, ياعني مامىر ايىندا بالالاردىڭ قازاق تىلىنەن ءبىلىمى تەكسەرىلەدى. ەمتيحان جازباشا جانە اۋىزشا وتەدى. تىڭداۋ, سويلەۋ, وقۋ جانە جازۋ سياقتى داعدىلار باعالانادى. ەمتيحان تاپسىرمالارىن مۇعالىمدەر اكادەميالىق ادالدىق قاعيداتتارىن ساقتاي وتىرىپ وزدەرى قۇراستىرادى. قازاق ءتىلى پانىنەن قورىتىندى باعا ەمتيحان جانە جىلدىق باعالاۋ ناتيجەسى بويىنشا قويىلادى. بۇعان دەيىن قازاق تىلىنەن ەمتيحاندى 9 جانە 11-سىنىپ وقۋشىلارى عانا تاپسىراتىن.
1 ساعاتقا ارتقا جىلجيدى
2024 جىلى كوكتەمدە قازاقستان اۋماعىندا بىرىڭعاي ۋاقىت بەلدەۋى ەنگىزىلەدى دەپ جوسپارلانىپ وتىر. ەلىمىزدىڭ 15 ءوڭىرى 29 اقپاننان 1 ناۋرىزعا قاراعان ءتۇنى جەرگىلىكتى ۋاقىتتى ءبىر ساعاتقا ارتقا جىلجىتادى. وسىلايشا ەلىمىز بىرىڭعاي UTC+5 ۋاقىت بەلدەۋىنە كوشەدى. اتىراۋ, اقتوبە, ماڭعىستاۋ, باتىس قازاقستان جانە قىزىلوردا وبلىستارى ءۇشىن ەشتەڭە وزگەرمەيدى.
