استانادا بيزنەس-قوعامداستىق ءۇشىن جاڭا سالىق كودەكسى جوباسىنىڭ تانىستىرىلىمى ءوتتى, دەپ حابارلايدى astana-akshamy.kz
ۇلتتىق ەكونوميكا ۆيتسە-ءمينيسترى ازامات ءامرين مەن قارجى ۆيتسە-ءمينيسترى ەرجان ءبىرجانوۆ بيزنەس قوعامداستىعىنا جاڭا سالىق كودەكسى جوباسىنىڭ نەگىزگى تاسىلدەرىن تانىستىردى. ءىس-شارا «اتامەكەن» ۇلتتىق كاسىپكەرلەر پالاتاسىنىڭ الاڭىندا ءوتتى. شاراعا قازاقستاننىڭ بارلىق وڭىرىنەن 400-دەن استام كاسىپكەر, قاۋىمداستىق ءارى قوعامدىق ۇيىمدار مەن باق وكىلدەرى قاتىستى.
ازامات ءامرين ءوز سوزىندە بارلىق جاڭا تاسىلدەر مەن جوسپارلانعان وزگەرىستەردى سالىق ساياساتى تۇجىرىمداماسىندا كورسەتۋ ۇسىنىلاتىنىن, ال تۇيىتكىلدى ماسەلەلەردى بىرىڭعاي ءتۇسىندىرۋ ءۇشىن پرەمەر-ءمينيستردىڭ ورىنباسارى دەڭگەيىندە ادىستەمەلىك كەڭەس قۇرۋ جوسپارلانىپ وتىرعانىن اتاپ ءوتتى.
ۆيتسە-مينيستر بيىل اكىمشىلەندىرۋگە كوپ كوڭىل بولىنگەنىن, سونداي-اق سالىق ساياساتىن وزگەرتۋ اياسىندا ۇسىنىلاتىن نەگىزگى وزگەرىستەر تۋرالى ايتىپ بەردى.
اتاپ ايتقاندا, قولدانىستاعى ارنايى سالىق رەجيمدەرىن – وڭايلاتىلعان رەجيمدى جانە بولشەك سالىقتى بىرىكتىرۋ جوسپارلانۋدا.
كورپوراتيۆتىك تابىس سالىعىنىڭ سارالانعان مولشەرلەمەسىن ەنگىزۋ ۇسىنىلادى: بازالىق مولشەرلەمە 20% ساقتالادى, بانك سەكتورى مەن ويىن بيزنەسى ءۇشىن مولشەرلەمەنى 25% دەڭگەيىندە بەلگىلەۋ, وڭدەۋ ونەركاسىبى, قارجى ليزينگى جانە الەۋمەتتىك سالا ءۇشىن مولشەرلەمەنى 10%-عا دەيىن تومەندەتۋ, اۋىل شارۋاشىلىعى تاۋارىن وندىرۋشىلەر ءۇشىن مولشەرلەمەنى 3% دەڭگەيىندە ساقتاۋ ۇسىنىلادى.
ينۆەستيتسيالاردى ىنتالاندىرۋ ماقساتىندا كتس-تان, جەر سالىعى جانە ينۆەستيتسيالىق كەلىسىمشارتتار مەن اەا قاتىسۋشىلارى بويىنشا مۇلىك سالىعىنان 100% بوساتۋ ءۇشىن سالىقتىق جەڭىلدىكتەر قاراستىرىلعان.
كەزدەسۋ بارىسىندا قاتىسۋشىلار جاڭا جوباعا قاتىستى ساۋالدارىن قويىپ, ءوز ۇسىنىستارىن ەنگىزۋگە مۇمكىندىك الدى. ايتا كەتۋ قاجەت, جاريالانعان جاڭاشىلدىقتاردىڭ باسىم بولىگىن كودەكس جوباسىن تالقىلاۋ بويىنشا جۇمىس توپتارىنا قاتىسقان كاسىپكەرلەردىڭ وزدەرى ۇسىنعان بولاتىن.
