استاناداعى جاقسىلىق ۇشكەمپىروۆ اتىنداعى جەكپە-جەك سپورت سارايىندا بوچچادان ءىىى قازاقستان چەمپيوناتى ءوتىپ جاتىر, دەپ حابارلايدى astana-akshamy.kz
كەيىنگى 2 جىلدا بۇل سپورت ءتۇرى تانىمالدىققا يە بولا باستادى. سەبەبى قىسقا عانا ۋاقىتتا قازاقستان چەمپيوناتىنان بولەك, بىلتىر ءبىرىنشى رەت قازاقستان كۋبوگى, سۇلتانبەك ورىنباساروۆتى ەسكە الۋعا ارنالعان تۋرنير جانە ت.ب بىرقاتار جارىستار ۇيىمداستىرىلدى. قازاقستان ۇلتتىق قۇراماسى ساپىنا كىرگەن پارا سپورتشىلار 2023 جىلى ازيا پارا ويىندارىندا العاش رەت باق سىنادى.
«بوچچادان قازاقستان چەمپيوناتى جاڭا دەڭگەيگە كوتەرىلىپ وتىر. 2023 جىلى بىرىنشىلىككە 47 پارا سپورتشى قاتىسسا, بيىل ولاردىڭ سانى 90-عا جۋىقتادى. پاراليمپياداعا كىرەتىن پارا سپورت تۇرىنە قىزىعۋشىلىق ۋاقىت وتكەن سايىن ارتىپ جاتىر. قازىرگى ءساتتىڭ وزىندە رەسپۋبليكامىزدىڭ 10 وڭىرىندە فيليالدارىمىز جۇمىس ىستەپ جاتىر. ۇلتتىق قۇراما ساپىندا 41 وتانداسىمىز بار. ەندى عانا دامىپ جاتقان پارا سپورت تۇرىندە حالىقارالىق تۋرنيرلەردە العاشقى جۇلدەلەر دە قورجىنىمىزعا تۇسە باستادى. مامىر ايىنىڭ ورتاسىندا فينليانديادا وتكەن حالىقارالىق دودادا جەكە سايىستان قۋانىش اسقاربەكوۆ پەن كوماندالىق باسەكەدە قولا جۇلدەگە يە بولدىق. بۇل ءبىزدىڭ جەتىستىكتەرىمىزدىڭ باستاۋى دەپ بىلەمىن. الداعى ۋاقىتتا قولا جۇلدە كۇمىس پەن التىنعا اينالادى دەپ سەنەمىن. وسى پارا سپورت ءتۇرىن قولداپ وتىرعان قر پرەزيدەنتى قاسىم-جومارت توقاەۆقا العىسىمدى بىلدىرەمىن. بوچچامەن اينالىسىپ جاتقان بارشا جاندار مەن اتا-انالارعا ەرەكشە راقمەتىمدى ايتا وتىرىپ, بارىڭىزگە ساتتىلىك تىلەيمىن», – دەدى پارلامەنت سەناتىنىڭ توراعاسى, قازاقستان بوچچا فەدەراتسياسىنىڭ پرەزيدەنتى ماۋلەن اشىمباەۆ اشىلۋ سالتاناتىندا.
بيىلعى جارىستىڭ باستى ەرەكشەلىگى – كوماندالىق جانە جۇپتىق باسەكەدە جۇلدەلەر ساراپقا سالىنىپ جاتىر.
«باستاپقىدا بۇل سپورت تۇرىنە قىزىعۋشىلىعىم قاتتى بولمادى. سىرت كوزگە قاراپايىم دوپتى لاقتىرۋ سەكىلدى بولىپ كورىندى. بىراق ءبىرىنشى ويناعان ساتتە-اق بوچچا مەنى باۋراپ الدى. مەنىڭ بويىمداعى باستى قاسيەت – اينالىسقان دۇنيەمنەن ناتيجە شىعارۋ. سوندىقتان 2 جىلداي ۋاقىت ارالىعىندا ەل ىشىندە ۇزدىك ەكەنىمدى دالەلدەدىم. 2023 جىلى ازيا پاراويىندارىنا قاتىسىپ, الەمنىڭ ەڭ مىقتى ەلدەرىمەن كۇش سىناستىم. ارينە, جەڭىلىستەر وڭاي تيمەدى. بىراق حالىقارالىق دارەجەدەگى دودا مەنىڭ بويىمداعى قاتەلىكتەردى كورسەتىپ بەردى. قاتەلىكتەرمەن بولەك, بوچچا فەدەراتسياسىنىڭ قولداۋىمەن تايلاندتا وقۋ-جاتتىعۋىن وتكىزىپ, مىقتىلارمەن تاجىريبە الماستىم. بۇل جەتىستىكتەرىممەن توقتاپ قالعىم كەلمەيدى. پاراليمپيادا, الەمدىك دودالاردا توپ جارعىم كەلەدى», – دەدى فينليانديادا قولا جۇلدە العان قۋانىش اسقاربەكوۆ.
ايتا كەتەيىك, بوچچادان قازاقستان چەمپيوناتى 31 مامىرعا دەيىن جالعاسادى.
