استانادا العاش رەت بوچچادان قازاقستان كۋبوگى ءوتتى. جارىستىڭ جابىلۋ سالتاناتىنا پارلامەنت سەناتىنىڭ توراعاسى, قازاقستان بوچچا فەدەراتسياسىنىڭ پرەزيدەنتى ماۋلەن اشىمباەۆ, استانا قالاسى اكىمىنىڭ ورىنباسارى ەسەت بايكەن قاتىسىپ, جەڭىمپازدار مەن جۇلدەگەرلەردى ماراپاتتادى.
ءوز قۇتتىقتاۋ سوزىندە ماۋلەن اشىمباەۆ سايىستىڭ جوعارى دەڭگەيدە وتكەنىن جانە ەرەكشە سپورتشىلاردىڭ شەبەرلىگى مەن تاباندىلىعىن ايرىقشا اتاپ ءوتتى. سەنات توراعاسى قازاقستان بوچچا فەدەراتسياسىنىڭ قىزمەتىن قورىتىندىلاپ, الداعى جۇمىس جوسپارىنا توقتالدى.
– الدىمىزدا اۋقىمدى مىندەتتەر تۇر. كەلەسى جىلى بىرقاتار ءىس-شارا ۇيىمداستىرۋدى جوسپارلاپ وتىرمىز. العاش رەت بوچچادان ۇلتتىق جاسوسپىرىمدەر قۇراماسىن جاساقتايمىز. فەدەراتسيا تۋريزم جانە سپورت مينيسترلىگىنىڭ جانە دەمەۋشىلەردىڭ قولداۋىمەن كەلەسى جىلى ەل چەمپيوناتى, رەسپۋبليكا كۋبوگى, سۇلتانبەك ورىنباساروۆتى ەسكە الۋعا ارنالعان اشىق تۋرنير سياقتى كەم دەگەندە ءۇش ءىرى رەسپۋبليكالىق جارىس ۇيىمداستىرۋدى كوزدەپ وتىر. ودان بولەك, ۇلتتىق قۇرامامىز بىرقاتار حالىقارالىق دودالارعا قاتىسادى, – دەدى
ماۋلەن اشىمباەۆ.
ءتورت كلاسس بويىنشا وتكەن ەل كۋبوگىندا باس اياعى 57 پارا سپورتشى باق سىنادى. ەكى كۇندىك ۇزدىك ناتيجەلەرىمەن 34 بوچچا شەبەرى جەڭىس تۇعىرىنان كورىندى. ولاردىڭ قاتارىندا استانا قالاسىنىڭ بوچچا شەبەرلەرى دە بار.
ايەلدەر اراسىندا ەلوردالىق يتيانا شىڭعىسحانقىزى ۇزدىك شىقسا, ەرلەر اراسىنان پاۆلودارلىق الەكساندر قۇرمانتاي ۇزدىك اتاندى. ۇيىمداستىرۋشىلاردىڭ ايتۋىنشا, ءدۇبىرلى دودادا جەڭىسكە جەتكەندەر ۇلتتىق قۇراما ساپىنا قابىلدانىپ, الداعى حالىقارالىق باسەكەلەردە ەل نامىسىن قورعاۋعا مۇمكىندىك الدى.
