مەملەكەت باسشىسى قاسىم-جومارت توقاەۆ «بولاشاقتىڭ ويىندارى» حالىقارالىق ءتۋرنيرىنىڭ اشىلۋ راسىمىنە قاتىستى. پرەزيدەنت رەسمي مىنبەردەن «بولاشاقتىڭ ويىندارى» ءتۋرنيرىنىڭ سالتاناتتى اشىلۋ ءراسىمىن تاماشالادى. رەسەيدىڭ مەملەكەتتىك ءانۇرانى ورىندالعاننان كەيىن ۆلاديمير پۋتين جارىستى اشىق دەپ جاريالادى.
قازاقستان پرەزيدەنتى تۋرنير قاتىسۋشىلارىنا ساتتىلىك تىلەدى.
«قۇرمەتتى ۆلاديمير ۆلاديميروۆيچ, ەڭ الدىمەن, سىزگە زور ريزاشىلىق بىلدىرگىم كەلەدى. بۇل – بىرەگەي ويىن. دۇنيەجۇزىندە مۇنداي ويىننىڭ بالاماسى جوق. بارشاڭىزعا ساتتىلىك تىلەيمىن. كەلەسى ويىندى قازاقستاندا وتكىزەيىك» دەدى قاسىم-جومارت توقاەۆ.
سونىمەن قاتار بەلارۋس, قىرعىزستان, تاجىكستان جانە وزبەكستان پرەزيدەنتتەرى كيبەرسپورتشىلارعا ىزگى تىلەكتەرىن جولدادى. سودان سوڭ جارىسقا قاتىسۋشى مەملەكەتتەر تۋلارىنىڭ شەرۋى ءوتتى. «فيدجيتال-كونتسەپتسياعا» نەگىزدەلگەن ءتۋرنيردىڭ فورماتى فيزيكالىق بەلسەندىلىكتى, زاماناۋي تەحنولوگيا مەن تسيفرلىق ورتانى ۇشتاستىرادى.
شوۋ بارىسىندا سپورت, ستراتەگيا, تاكتيكا, تەحنولوگيا, جىلدامدىق سەكىلدى 5 توپقا بىرىكتىرىلگەن سايىس تۇرلەرى تانىستىرىلدى. ويىنداردىڭ باعدارلاماسىنا كلاسسيكالىق سپورت تۇرلەرى مەن ولاردىڭ 21 تسيفرلىق بالامالارى بويىنشا گيبريدتى سپورتتىق جارىستار ەنگىزىلگەن. ۇيىمداستىرۋشىلاردىڭ مالىمەتى بويىنشا تۋرنيرگە 100-دەن استام ەلدەن 2 مىڭعا جۋىق كيبەرسپورتشى كەلگەن. قازاقستاننىڭ ويىنشىلارى مەن كوماندالارى سپورتتىڭ 13 ءتۇرى بويىنشا سايىسقا تۇسەدى. جالپى بۇل تۋرنيرگە ەلىمىزدىڭ 48 وكىلى قاتىسادى.
سالتاناتتى اشىلۋ راسىمىنەن كەيىن تاتارستان استاناسىنا كەلگەن مەملەكەت باسشىسى قاسىم-جومارت توقاەۆ پەن باسقا ەلدەردىڭ پرەزيدەنتتەرى «بولاشاقتىڭ ويىندارى» حالىقارالىق مۋلتيسپورت ءتۋرنيرىنىڭ نەگىزگى شارالارى وتەتىن «قازان ەكسپو» كەشەنىن ارالاپ كوردى. ەكسكۋرسيا بارىسىندا قوناقتارعا Dota 2 كونگرەسس-زالى, ارت-نىساندار, «فيدجيتال-زەرتحانا» كورسەتىلدى, سونداي-اق دەنە شىنىقتىرۋ مەن كيبەرسپورتتى (physical+digital) بىرىكتىرەتىن يننوۆاتسيالىق «فيدجيتال-قوزعالىستىڭ» ەرەكشەلىكتەرى تانىستىرىلدى.
الاڭداردىڭ بىرىندە قازاقستان پرەزيدەنتى «فۋتبول دوستىققا جول اشادى» باعدارلاماسىنا قاتىساتىن جاس سپورتشىلارمەن اڭگىمەلەستى. حالىقارالىق كوماندانىڭ قۇرامىندا «استانا» فۋتبول كلۋبىندا جاتتىعاتىن 10 جاستاعى جان ءالي ەرماعامبەتوۆ تە بار. قاسىم-جومارت توقاەۆ قازاقستاندا بالالار سپورتىنا مەملەكەت تاراپىنان تۇراقتى قولداۋ كورسەتىلەتىنىن اتاپ ءوتتى.
