استاناداعى «بوزوق» ارحەولوگيالىق پاركىنە كەمەل اقىشەۆتىڭ ەسىمى بەرىلۋى مۇمكىن, دەپ حابارلايدى astana-akshamy.kz
قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ قازاق ەلىنىڭ ۇلتتىق ارحەولوگياسىن ۇيىمداستىرۋشى, مەملەكەتتىك سىيلىقتىڭ لاۋرەاتى, قازاقستاننىڭ ەڭبەك سىڭىرگەن عىلىم قايراتكەرى, «التىن ادامدى» تاپقان اتاقتى ارحەولوگ-عالىم كەمەل اقىشەۆتىڭ 100 جىلدىعىنا ءىس-شارالاردى ۇيىمداستىرۋ بويىنشا سەنات دەپۋتاتتارىنىڭ ساۋالىنا جاۋاپ بەردى, دەپ حابارلايدى اگەنتتىكتىڭ ءتىلشىسى.
«قازاق ارحەولوگياسىنىڭ نەگىزىن قالاۋشى عالىمداردىڭ ءبىرى – كەمەل اقىشەۆتىڭ ەڭبەگىن, شىعارماشىلىعىن, ءومىر جولىن ناسيحاتتاۋ بويىنشا مەرەيتوي اياسىندا كەشەندى جۇمىستار جۇرگىزىلۋدە. ۇكىمەت قاۋلىسىمەن استانا قالاسىنىڭ №69 مەكتەپ-گيمنازياسىنا كەمەل اقىشەۆتىڭ ەسىمى بەرىلدى», – دەپ مالىمدەدى ولجاس بەكتەنوۆ.
پرەمەردىڭ بەرگەن انىقتاماسىنا سايكەس, 2024 جىلعى 24 مامىردا وتكەن قالالىق ونوماستيكا كوميسسياسىنىڭ وتىرىسىندا استانا قالاسىنىڭ ا 42 كوشەسىنە كەمەل اقىشەۆتىڭ ەسىمىن بەرۋ ۇسىنىسى قولداۋ تاپتى. بەلگىلەنگەن تارتىپپەن كوميسسيالاردىڭ قاراۋىنا ەنگىزىلەدى.
سونداي-اق ول الماتى وبلىسىنىڭ ىلە, تالعار اۋداندارىندا ارحەولوگ-عالىمنىڭ اتىنداعى كوشەلەر بارىن جانە مەكتەپتەرگە عالىمنىڭ ەسىمىن بەرۋ جۇمىستارى الداعى ۋاقىتتا قاراستىرىلاتىنىن اتاپ ءوتتى.
ۇكىمەت باسشىسىنىڭ مالىمدەۋىنشە, الكەي مارعۇلان اتىنداعى ارحەولوگيا ينستيتۋتى 2024 جىلعى قىركۇيەكتە «ەۋرازيالىق ارحەولوگيانىڭ كوكجيەكتەرى مەن پاراديگمالارى» اتتى ءبىرىنشى حالىقارالىق ارحەولوگيالىق سيمپوزيۋم وتكىزەدى. عالىمنىڭ جاريالانباعان ارحيۆ ماتەريالدارى نەگىزىندە «اقتاس شاتقالىنداعى عۇن-ءۇيسىن ەسكەرتكىشتەر كەشەنى» كىتابىن, «ك. اقىشەۆتىڭ عىلىمي مۇراسىنداعى ارحەولوگيا عاسىرى» اتتى عىلىمي مونوگرافياسىن, جەكە فوتوالبومىن جارىققا شىعارۋ كوزدەلۋدە.
«قازىرگى ۋاقىتتا استانا قالاسىنداعى «بوزوق» ارحەولوگيالىق پاركىنىڭ قۇرىلىسى جالعاسۋدا. پارككە عالىمنىڭ ەسىمىن بەرۋ, كىرەبەرىسىنە ەسكەرتكىشىن ورناتۋ ماسەلەسى قۇرىلىس جۇمىستارى اياقتالعاننان كەيىن بەلگىلەنگەن تارتىپتە قارالادى», – دەپ حابارلادى پرەمەر-مينيستر.
سونىمەن قاتار, ۇكىمەت باسشىسى ارحەولوگ-عالىمنىڭ تۋعان جەرى پاۆلودار وبلىسىنداعى باياناۋىلدا بەلگىتاس ورناتۋ جانە وبلىس ايماعىنداعى مەكتەپتەر مەن كوشەلەرگە عالىمنىڭ ەسىمىن بەرۋ ماسەلەسى بويىنشا وبلىس اكىمىنە تاپسىرما بەرىلگەنىن ايتتى.
