استانانىڭ بەس اۋدانىندا وقۋشىلارعا, اتا-انالارعا تەگىن پسيحولوگيالىق-كونسۋلتاتسيالىق كومەك كورسەتۋ كابينەتتەرى اشىلدى. بۇل تۋرالى استانا قالاسى ءبىلىم باسقارماسىنىڭ باسشىسى قاسىمحان سەنعازىەۆ كوممۋنيكاتسيالار قىزمەتىنىڭ الاڭىندا وتكەن بريفينگتە ايتتى.
ەلوردا مەكتەپتەرىندە بۋللينگكە قارسى باعدارلاما ىسكە قوسىلدى. كابينەتتەر قالانىڭ ادىستەمەلىك ورتالىعى, ۇستازدار ءۇيى, №22, 54, 88 مەكتەپتەردىڭ بازاسىندا قۇرىلدى.
– جىل باسىنان باستاپ 336 بالا مەن 377 اتا-انا كەڭەس الدى. قازىرگى ۋاقىتتا قالالىق پسيحولوگيالىق قولداۋ ورتالىعى اشىلۋدا. ورتالىق بازاسىندا دياگنوستيكا, تۇزەتۋ-دامىتۋ, كونسۋلتاتسيا, پسيحوپروفيلاكتيكا قىزمەتتەرى بار, – دەدى قاسىمحان سەنعازىەۆ.
قازىرگى ۋاقىتتا ەلوردانىڭ ءبىلىم بەرۋ ۇيىمدارىندا بۋللينگكە قارسى باعدارلاما ىسكە اسۋدا. ول ءۇشىن قاناتقاقتى جوباعا 5 مەكتەپ (الماتى اۋدانىنىڭ №72 مەكتەبى, بايقوڭىر اۋدانىنىڭ №16 مەكتەبى, نۇرا اۋدانىنىڭ №79 مەكتەبى, ەسىل اۋدانىنىڭ №24 مەكتەبى, سارىارقا اۋدانىنىڭ №6 مەكتەبى) ەندى.
– باعدارلاما اياسىندا قورقىتۋدىڭ الدىن الۋ جانە ازايتۋ, بۋللينگتىڭ انىقتالعان جاعدايىن شەشۋ بويىنشا ءىس-شارالار جۇرگىزىلەدى. سونداي-اق مۇعالىمدەردى وقۋشىلاردىڭ جاي-كۇيىنىڭ دارەجەسىن انىقتاۋ داعدىسىنا وقىتۋ جوسپارلانىپ وتىر. ەلوردانىڭ بەس مەكتەبىندە وقۋشىلار اراسىندا قورقىتۋدىڭ الدىن الۋ ماقساتىندا (№4, 24, 25, 72, 74) قاناتقاقتى رەجيمدە وقۋ-اعارتۋ مينيسترلىگىنىڭ «دوسبولLike» باعدارلاماسى ىسكە اسىپ جاتىر, – دەدى باسقارما باسشىسى.
