بريتاندىق ۋنيۆەرسيتەت جوعارى اكادەميالىق ناتيجەلەرىمەن قوسا سپورت پەن ونەردە جەتىستىكتەرگە جەتكەن ستۋدەنتتەرگە كونكۋرستىق نەگىزدە تەگىن ءبىلىم الۋ شاكىرتاقىسىن ۇسىنادى, دەپ حابارلايدى astana-akshamy.kz.
قازىرگى تاڭدا بيزنەس جانە كومپيۋتەرلىك عىلىمدار سالاسى بويىنشا وقۋ باعدارلامالارىنا قۇجاتتار قابىلدانۋدا. مۇنىمەن قوسا, 25 ماۋسىمنان باستاپ پەداگوگيكا باعدارلاماسىنا ءوتىنىم قابىلدانادى. وتىنىمدەردى ۋنيۆەرسيتەتتىڭ www.coventry.edu.kz سايتىندا ونلاين تۇردە بەرۋگە بولادى.
ۋنيۆەرسيتەتتىڭ اشىلۋىنا وراي جارناما جانە تسيفرلىق ماركەتينگ, بيزنەس جانە ادام رەسۋرستارىن باسقارۋ, كومپيۋتەرلىك عىلىمدار, اقپاراتتىق تەحنولوگيالاردى باسقارۋ سەكىلدى 8 باكالاۆريات جانە MBA Global Business باعدارلامالارى بويىنشا وقىتۋ جوسپارلانۋدا. سونداي-اق اكادەميالىق اعىلشىن ءتىلى كۋرسى جانە اعىلشىن تىلىندە قازاقستان فيلوسوفياسى مەن تاريحى, قازاق ءتىلى سياقتى پاندەر ەنگىزىلەدى.
قازاقستاننىڭ بولاشاق پەداگوگتەرىنە ءبىلىم سالاسىنداعى حالىقارالىق ديپلومنان كەيىنگى سەرتيفيكاتتاۋ باعدارلاماسى بويىنشا تاعىلىمدامادان ءوتۋ مۇمكىندىگى ۇسىنىلادى.
ۇشاق بيلەتى مەن كۇندەلىكتى ومىرگە قاجەتتى شىعىنداردى ەسكەرسەك, شەتەلدە ءبىلىم الۋمەن سالىستىرعاندا قازاقستاندا وقۋ الدەقايدا ءتيىمدى. وقۋ ورنى تۇلەكتەرىنە Coventry ۋنيۆەرسيتەتى ديپلومى بەرىلەدى. سونداي-اق ولار Coventry ۋنيۆەرسيتەتىنىڭ جەتەكشى كومپانيالارمەن جانە ۇيىمدارمەن ورناتقان سەرىكتەستىگى ناتيجەسىندە بىرەگەي جوبالار مەن تاعىلىمدامادان وتە الادى.
قازاقستاندىق كامپۋستاعى وقىتۋشىلاردىڭ نەگىزگى قۇرامى حالىقارالىق مامانداردان قۇرالادى. ۋنيۆەرسيتەتتەگى وقۋ جىلى 2024 جىلدىڭ 16 قىركۇيەگىندە باستالادى. 2026 جىلى ۋنيۆەرسيتەت كامپۋسىندا اكادەميالىق, سپورت جانە اكىمشىلىك عيماراتتارمەن قوسا جەكە جاتاقحانا ىسكە قوسىلادى. ال وسى مەرزىمگە دەيىن ستۋدەنتتەر العاشقى ەكى كۋرس بويىنشا استانانىڭ سول جاعالاۋىندا ورنالاسقان قالالىق كامپۋستا ءبىلىم الادى.
قازاقستانداعى Coventry ۋنيۆەرسيتەتى – دۇنيە جۇزىندەگى ۋنيۆەرسيتەتتەردىڭ جاھاندىق جەلىسىنىڭ ءبىر بولىگى. بۇگىندە ونىڭ كامپۋستارى ەگيپەت, قىتاي, ماروككو, ءۇندىستان سەكىلدى بىرقاتار ەلدەردە جۇمىس ىستەيدى. وقۋ ورنىندا الەمنىڭ ءتۇرلى ەلىنەن 21 مىڭنان استام ستۋدەنت وقيدى. ۋنيۆەرسيتەت جىل سايىن ءوز تۇلەكتەرىن جۇمىسقا ورنالاستىرۋ جاعىنان جوعارى كورسەتكىشكە يە.
