استانا قالاسى اكىمدىگىنە قاراستى ەركەعالي راحماديەۆ اتىنداعى مەملەكەتتىك اكادەميالىق فيلارمونياسىنىڭ «كلاسسيكالىق ۆوكال» ءبولىمىنىڭ ءارتىسى ايگەرىم امانجولوۆا «كلاسسيكالىق مۋزىكا» اتالىمى بويىنشا «دارىن» مەملەكەتتىك جاستار سىيلىعىنىڭ بيىلعى لاۋرەاتى اتاندى.
«دارىنمەن» دارالانعان دارىندى ءانشى قازاق ۇلتتىق ونەر ۋنيۆەرسيتەتىندە قازاقستاننىڭ ەڭبەك سىڭىرگەن ءارتىسى, پروفەسسور گۇلنار حامزينادان ءدارىس الدى. ونەرىن شىڭداۋ ماقساتىندا ميلان ۋنيۆەرسيتەتىنىڭ پروفەسسورى, رەجيسسەرى جانە «Giacosa di Ivrea» تەاترىنىڭ كوركەمدىك جەتەكشىسى پاولو بوسيسيونىڭ, باروككو ءداۋىرىنىڭ ءان سالۋ مەكتەبىنىڭ وقىتۋشىسى ماەسترو ف.وپانىڭ, ودەسسا وپەرا تەاترىنىڭ ءسوليسى ە.پوگوسوۆتىڭ شەبەرلىك ساباقتارىنا قاتىستى. «استانا وپەرا» حالىقارالىق وپەرا اكادەمياسىندا وپەرالىق ءان سالۋ ماەستروسى, ميلان كونسەرۆاتورياسىنىڭ پروفەسسورى ا.گۋسەۆتىڭ سىنىبىندا ونەرىن شىڭدادى.
ايگەرىم امانجولوۆا – كوپتەگەن رەسپۋبليكالىق جانە حالىقارالىق بايقاۋلاردىڭ لاۋرەاتى. اتاپ ايتقاندا, 2017 جىلى «شابىت» شىعارماشىل جاستاردىڭ حح حالىقارالىق بايقاۋىندا, احمەت جۇبانوۆ جانە عازيزا جۇبانوۆا اتىنداعى ءى رەسپۋبليكالىق ۆوكاليستەر بايقاۋىندا لاۋرەات اتاندى. بيبىگۇل تولەگەنوۆانىڭ VIII حالىقارالىق ۆوكاليستەر بايقاۋىندا جانە «رومانسيادا» ءحىح حالىقارالىق ۆوكاليستەر بايقاۋىندا ەكىنشى ورىندى الدى. مۇقان تولەباەۆ اتىنداعى VI حالىقارالىق بايقاۋىنىڭ جانە كسرو حالىق ءارتىسى, حالىق قاھارمانى نۇرعيسا تىلەنديەۆ اتىنداعى V حالىقارالىق ۆوكاليستەر بايقاۋىنىڭ باس جۇلدەسىن يەلەندى. «Le concurse du Roi Louis» XIV حالىقارالىق بايقاۋىندا جانە «ورفەي» ءىى حالىقارالىق ۆوكاليستەر بايقاۋىندا ءبىرىنشى ورىندى الدى. جەڭىستىڭ 70 جىلدىعىنا ارنالعان رەسپۋبليكالىق پاتريوتتىق اندەر بايقاۋى مەن «Salve Regina» ءى رەسپۋبليكالىق ۆوكاليستەر بايقاۋىندا توپ جاردى. بۇعان قوسا, قازاقستاننىڭ ح جانە ءحى ۇلتتىق دەلفي ويىندارىنا ەكى رەت قاتارىنان قاتىسىپ, ەكەۋىندە دە ەكىنشى ورىن (كۇمىس مەدال) يەلەندى.
ايگەرىم قازاقستاننىڭ كوپتەگەن قالالارىندا جانە رەسەي, سلوۆاكيا, ۆەنگريا, اۆستريا, باسقا دا ەلدەردىڭ ساحنالارىندا ءان شىرقادى. ومىرلىك قوساعى التىنبەك ءابىلدا دا – ەركەعالي راحماديەۆ اتىنداعى مەملەكەتتىك اكادەميالىق فيلارمونياسىنىڭ ءانشىسى. ەكەۋىن ونەر تابىستىردى. التىنبەك تە – «دارىن» مەملەكەتتىك جاستار سىيلىعىنىڭ لاۋرەاتى. ول بۇل سىيلىقتى ەكى جىل بۇرىن الدى. سونىمەن ءبىر شاڭىراقتا «دارىننىڭ» قوس لاۋرەاتى بولدى. قۇتتىقتايمىز!
