بيىل 2,4 ميلليون قازاقستاندىق اكتيۆتەرى مەن مىندەتتەمەلەرى, 2,8 ميلليونى كىرىستەرى مەن مۇلكى تۋرالى دەكلاراتسيا تاپسىرۋى ءتيىس. مۇنى ولار تيىسىنشە 35 پايىزعا جانە 71 پايىزعا ورىنداعان, دەپ حابارلايدى astana-akshamy.kz
جالپىعا بىردەي دەكلاراتسيالاۋدىڭ ءۇشىنشى كەزەڭى 2023 جىلى باستالدى. وعان جەكە كاسىپكەرلەر, زاڭدى تۇلعالاردىڭ قۇرىلتايشىلارى مەن باسشىلارى, سونداي-اق ولاردىڭ جۇبايلارى العاش رەت قاتىسۋدا. بارلىق جاڭا قاتىسۋشىلار 250.00-نىسانى بويىنشا اكتيۆتەر مەن مىندەتتەمەلەر تۋرالى «كىرۋ» دەكلاراتسياسىن تاپسىرۋى قاجەت. جۇيەگە بۇرىن كىرگەن ازاماتتار 270.00-نىسانىندا تابىسى مەن مۇلكى تۋرالى دەكلاراتسيا تاپسىرادى.
مەملەكەتتىك كىرىستەر كوميتەتىنىڭ (مكك) حابارلاۋىنشا, بيىل 2,4 ميلليونعا جۋىق قازاقستاندىق «كىرۋ» دەكلاراتسياسىن تاپسىرۋى ءتيىس. سالىستىرۋ ءۇشىن: ءبىر جىل بۇرىن 2,1 ميلليون جاڭا قاتىسۋشىلار بولسا, ءبىرىنشى كەزەڭدە نەبارى 580 مىڭ ادام بولعان. دەگەنمەن قاتىسۋشىلاردىڭ ەڭ كوپ سانى جۇيەگە 2025 جىلى ەنەدى – 7,9 ميلليوننان استام ادام, ياعني ءالى كۇنگە دەيىن دەكلاراتسيا تولتىرماعان ەلدىڭ قالعان ەرەسەك تۇرعىندارى. ونىڭ ۇستىنە زەينەتكەرلەر دە, ستۋدەنتتەر دە, جۇمىسسىزدار دا قاتىسۋى كەرەك. ناتيجەسىندە جالپىعا بىردەي دەكلاراتسيالاۋ جۇيەسى شامامەن 13 ميلليون قازاقستاندىقتى قامتۋى ءتيىس.
وسىعان بايلانىستى دەكلارانتتار 250-نىسان بويىنشا اكتيۆتەر مەن مىندەتتەمەلەر تۋرالى دەكلاراتسيادا قانداي مالىمەتتەردى كورسەتۋ كەرەكتىگىن ءبىلۋى قاجەت:
شەتەلدە تىركەلگەن مۇلىك: جىلجىمايتىن مۇلىك, جەر ۋچاسكەلەرى, ياحتالار, اۆتوكولىكتەر, شەتەلدىك بانكتەردەگى اقشالار, شەتەلدىك كومپانيالارداعى اكتسيالار;
قازاقستاندا جانە ودان تىس تىركەلگەن مۇلىك: تۇرعىن ءۇي قۇرىلىسىنداعى ۇلەس, باعالى قاعازدار مەن تسيفرلىق اكتيۆتەر, ينۆەستيتسيالىق التىن, زياتكەرلىك مەنشىك جانە اۆتورلىق قۇقىق وبەكتىلەرى, سونداي-اق 10 000 ايلىق ەسەپتىك كورسەتكىش شەگىنەن اسپايتىن مولشەردەگى قولما-قول اقشا (2024 جىلى 36 920 000 تەڭگە).
سونداي-اق قازاقستاندىقتار باسقا تۇلعالارمەن نەسيەلىك شارتتاردى نوتاريالدى كۋالاندىرىپ, دەكلاراتسيالاۋى كەرەك. سونداي-اق قۇنى 1 000 اەك (3 692 000 تەڭگە) اساتىن باسقا مۇلىكتى, مىسالى, ءۇي جانۋارلارىن, ونەر تۋىندىلارىن نەمەسە زەرگەرلىك بۇيىمداردى ءوز قالاۋى بويىنشا كورسەتە الادى, تەك دەكلاراتسيانى تاپسىرار الدىندا ونىنڭ قۇنىن باعالاتۋ كەرەك.
مەملەكەتتىك كىرىستەر كوميتەتى قازىرگى ۋاقىتتا جالپىعا بىردەي دەكلاراتسيالاۋدىڭ ءۇشىنشى كەزەڭى اياسىندا جىل باسىنان بەرى 835,1 مىڭ ادام 250-نىسانى بويىنشا اكتيۆتەرى مەن مىندەتتەمەلەرى تۋرالى «كىرۋ» دەكلاراتسياسىن تاپسىرعانىن اتاپ ءوتتى, ياعني جاڭا قاتىسۋشىلاردىڭ جالپى سانىنىڭ 35 پايىزى. بۇرىن دا قاتىسقاندارعا كەلسەك, 2,8 ميلليون ازاماتتىڭ 2 ميلليونى 270.00-نىسان بويىنشا تابىسى مەن مۇلكى تۋرالى دەكلاراتسيا تاپسىرىپ ۇلگەردى, ياعني قاتىسۋشىلاردىڭ شامامەن 71 پايىزى.
ەسكە سالا كەتەيىك, بۇدان بۇرىن 270.00 نىسانىنداعى دەكلاراتسيا كەيبىر قاجەتسىز باپتاردى, ونىڭ ىشىندە تولەم كوزىنەن جەكە تابىس سالىعى سالىناتىن كىرىستى كورسەتۋ مىندەتتەمەسىن الىپ تاستاۋ ارقىلى جەڭىلدەتىلگەنى بەلگىلى بولعان.
