جازعى دەمالىس – بالانىڭ ومىرىندەگى ماڭىزدى كەزەڭ. ول جاسوسپىرىمدەردىڭ فيزيكالىق جانە ەموتسيونالدى دامۋىنا ىقپال ەتۋى كەرەك. وسى ورايدا «وركەن» بالالاردىڭ ءال-اۋقاتىن ارتتىرۋ ۇلتتىق عىلىمي-پراكتيكالىق ينستيتۋتىنىڭ عىلىمي قىزمەتكەرى ەربولات شايلانوۆتىڭ بالالاردىڭ جازعى دەمالىسىن ۇيىمداستىرۋ بويىنشا اتا-انالارعا كەڭەسىن ۇسىنامىز.
– بالاڭىزبەن جازعى دەمالىستى جوسپارلاڭىز. مۇنى جوسپارلاعاندا بالاڭىزدىڭ ويىمەن ساناسىپ, پىكىرىن ەسكەرىڭىز. جوسپارىڭىزعا بەلسەندى دەمالىس, تازا اۋادا سەرۋەندەۋ, شىعارماشىلىق ساباقتار مەن تابيعاتتا دەمالۋ, ساياحاتتاۋ سەكىلدى ءتۇرلى شارانى قوسىڭىز. بالانىڭ ەموتسيونالدى جاعدايىنا ەرەكشە زەيىن اۋدارىڭىز. قيىن ساتتەردە ونى قولداڭىز. ونىڭ جەتىستىكتەرى مەن باستان وتكەرگەن سەزىمدەرىنە دەن قويىڭىز.
جاز – بالاڭىزدىڭ جاڭا نارسەلەردى يگەرۋ ءۇشىن كەرەمەت مۇمكىندىك. بالاڭىزعا ءتىل ۇيرەنۋ, مۋزىكالىق اسپاپتا ويناۋ, ۇيىرمەلەر مەن شەبەرلىك ساباقتارىنا قاتىسۋ بويىنشا بىرنەشە ۇسىنىس جاساڭىز, اقىل-وي بەلسەندىلىگىن ساقتاۋعا جانە جاڭا وقۋ جىلىنا دايىن بولۋىنا كومەكتەسىڭىز. بالالارعا ۇيىقتاۋ, تاماقتانۋ, ويناۋ جانە وقۋ ۋاقىتىن قوسا العاندا تۇراقتى كۇن ءتارتىبىن قالىپتاستىرۋعا كومەكتەسىڭىز. قالىپتاسقان كۇن ءتارتىبىن جاز بويى ساقتاۋىن قاداعالاۋعا تىرىسىڭىز.
بالانىڭ قاۋىپسىزدىگىنە ەرەكشە نازار اۋدارۋ قاجەت. بالا جازاتايىم وقيعا نەمەسە باسقا توتەنشە جاعداي كەزىندە ارەكەت ەتۋ الگوريتمىن بىلگەنى ءجون. ەگەر ءسىز بالاڭىزبەن دەمالىستى سۋ جاعالاۋىندا جوسپارلاساڭىز, بالالارىڭىزدىڭ جۇزە الاتىنىنا كوز جەتكىزىڭىز جانە شومىلۋ كەزىندە قاۋىپسىزدىك ەرەجەلەرىن ءتۇسىندىرىڭىز. وزىڭىزبەن العاشقى كومەك كورسەتۋگە ارنالعان قۇرالداردى الىپ ءجۇرىڭىز. بالاڭىزعا كوشەدە, كولىكتە, سۋدا, تابيعاتتا جانە باسقا دا ورىنداردا قاۋىپسىزدىك ەرەجەلەرىن ساقتاۋدى ۇنەمى ەسىنە سالىپ وتىرىڭىز, – دەيدى ەربولات شايلانوۆ.
