سوڭعى 5 جىلدا قازاقستاندا 400-گە جۋىق دەنساۋلىق ساقتاۋ نىسانى سالىندى, مەديتسينالىق جابدىقتاردى ساتىپ الۋعا 261 ملرد تەڭگەدەن استام قاراجات جۇمسالدى. بۇل رەتتە ينفراقۇرىلىمنىڭ توزۋ دەڭگەيى جوعارى 50% كۇيىندە قالىپ وتىر, جۇمىس ىستەپ تۇرعان نىسانداردىڭ جارتىسى 40 جىلدان استام ۋاقىت بويى پايدالانىلىپ كەلەدى. ەلىمىزدە مەديتسينالىق جابدىقتارمەن جاراقتاندىرۋ دەڭگەيى 80 پايىزدان اسسا, قىزمەت كورسەتۋ ساپاسى تەحنيكانى توزۋى سالدارىنان تومەندەپ وتىر, دەپ حابارلادى مينيستر. دەنساۋلىق ساقتاۋ جۇيەسىنىڭ قوسىمشا پروبلەمالارى اۋرۋحانا توسەك قورىن ءتيىمسىز پايدالانۋ, دارىگەرلەر مەن مەدبيكەلەردىڭ تاپشىلىعى بولىپ سانالادى.
ۇكىمەت باسشىسى ولجاس بەكتەنوۆ دەنساۋلىق ساقتاۋ ينفراقۇرىلىمىن دامىتۋعا كەشەندى كوزقاراس قاجەت ەكەنىن اتاپ ءوتتى. جاڭا تۇجىرىمداماعا سايكەس, مەديتسينالىق مەكەمەلەردىڭ قۇرىلىسىنا ارنالعان ورىنداردى انىقتاۋ پروتسەسى ۇزاق مەرزىمدى بولجامدار مەن حالىقتىڭ ءارتۇرلى كومەك تۇرلەرىنە قاجەتتىلىكتەرىن ەسكەرە وتىرىپ قايتا قارالاتىن بولادى.
بۇعان دەيىن دەنساۋلىق ساقتاۋ مينيسترلىگى 2,5 مىڭ دەنساۋلىق ساقتاۋ نىسانىن جاڭعىرتۋ قاجەتتىلىگىن انىقتادى. ءبىرىنشى كەزەڭ 11 440 توسەك-ورىندىق 34 نەگىزگى جوبا قۇرىلىسىن قامتيدى. بۇل جۇيە قۇراۋشى مەديتسينالىق مەكەمەلەر – اتاپ ايتقاندا, ۇلتتىق بالالار ونكولوگياسى جانە گەماتولوگيا ورتالىعى, بالالار كارديوحيرۋرگيالىق ورتالىعى, وڭىرلەردەگى كوپسالالى ۋنيۆەرسيتەتتىك اۋرۋحانالار. ەكىنشى كەزەڭدە جەرگىلىكتى اتقارۋشى ورگاندارمەن بىرلەسىپ نىسانداردى جاڭعىرتۋدى جالعاستىرۋ جوسپارلانۋدا.
پرەمەر-مينيستر جوبالاردى ىسكە اسىرۋ بارىسىندا قۇرىلىس ماتەريالدارىن, جيھازدار مەن جابدىقتاردى وتاندىق وندىرۋشىلەردى بارىنشا تارتۋ ماڭىزدى ەكەنىن اتاپ ءوتتى, بۇل وڭىرلەردىڭ ەكونوميكاسىنا وڭ اسەرىن تيگىزەدى. سونىمەن قاتار, حالىقارالىق ساپا ستاندارتتارى ساقتالۋى كەرەك.
«JCI (Joint Commission International) حالىقارالىق ستاندارتىنا قازاقستاندا تەك 9 مەديتسينا ۇيىمى سايكەس كەلەدى, ولاردىڭ قاتارىندا ۇلتتىق عىلىمي كارديوحيرۋرگيا ورتالىعى, انا مەن بالا ۇلتتىق ورتالىعى جانە باسقالارى بار. وسى ستاندارتتار بويىنشا اككرەديتتەلۋ دەنساۋلىق ساقتاۋ ساپاسىنىڭ “جوعارى دەڭگەيىن” كورسەتەدى. بارلىق دەنساۋلىق ساقتاۋ مەكەمەلەرى وسىنداي دەڭگەيگە ۇمتىلۋى كەرەك. سوندىقتان نەگىزگى وبەكتىلەردى جوبالاۋ كەزەڭىنەن باستاپ JCI حالىقارالىق ستاندارتىنىڭ تالاپتارى ەسكەرىلىپ كوزدەلۋگە تيىس», — دەپ اتاپ كورسەتتى ۇكىمەت باسشىسى.
دەنساۋلىق ساقتاۋ سالاسىنا جەكە ينۆەستيتسيالاردى تارتۋ بويىنشا الەمدىك تاجىريبەنى قولدانۋ قاجەتتىلىگى اتاپ ءوتىلدى. تاياۋ بولاشاقتا مەديتسينالىق نىسانداردى جاراقتاندىرۋ مەن باسقارۋداعى مۇنداي ءادىس ينفراقۇرىلىمدى دامىتۋدىڭ باسىم شاراسى بولۋعا ءتيىس. ۇكىمەت باسشىسى ماڭعىستاۋ, ۇلىتاۋ, جەتىسۋ وبلىستارى اكىمدەرىنىڭ نازارىن وسى ماسەلەگە اۋداردى – بۇل وڭىرلەر تارتىلعان قاراجات كولەمى بويىنشا ەڭ تومەن كورسەتكىشتەردى كورسەتۋدە. ينۆەستيتسيالاردىڭ باسىم بولىگى استانا مەن الماتىعا, سونداي-اق تۇركىستان جانە اتىراۋ وبلىستارىنا تيەسىلى.
تۇجىرىمدامانى ىسكە اسىرۋ قورىتىندىسى بويىنشا دەنساۋلىق ساقتاۋ وبەكتىلەرىنىڭ توزۋ دارەجەسىن 30%-عا دەيىن تومەندەتۋ, جاراقتاندىرۋدى 88%-عا دەيىن ۇلعايتۋ جانە نورماتيۆتەرگە سايكەس مەديتسينا كادرلارىمەن قامتاماسىز ەتۋ جوسپارلانۋدا.
