استانالىق ءماسليحات دەپۋتاتتارى قر پارلامەنتى سەناتىنىڭ دەپۋتاتى بيبىگۇل جەكسەنبايمەن كەزدەستى. بۇل تۋرالى ءماسليحات توراعاسى ەرلان كاناليموۆ اقپارات جاريالادى.
«پارلامەنتتىڭ جوعارعى پالاتاسىنىڭ وكىلدەرىمەن كەزدەسۋ ەلوردالىق ءماسليحات قابىرعاسىندا جالعاستى. سەناتور بيبىگۇل جەكسەنبايمەن بىرگە «ءتيىمدى ءماسليحاتتار» باعدارلاماسىن جۇزەگە اسىرۋدى تالقىلادىق. جاڭا جىلعا دەيىن بارلىق نورماتيۆتىك-قۇقىقتىق اكتىلەر ءماسليحات دەپۋتاتتارىنىڭ قاتىسۋىمەن قابىلداناتىنىن قاراستىراتىن جاڭا زاڭ قابىلدانادى. الايدا ول جوبالار دەپۋتاتتىق كورپۋس اكىمدىكتەرمەن جانە ساراپشىلارمەن بىرلەسىپ وتكىزەتىن قوعامدىق تىڭداۋلاردان ءوتۋى ءتيىس. بۇگىنگى تاڭدا استانا ءماسليحاتىنىڭ دەپۋتاتتارى 11 زاڭ جوباسىن قاراۋ بويىنشا جۇمىس توپتارىنىڭ قۇرامىنا كىرەدى. بۇدان باسقا, ءماسليحات قازاقستان رەسپۋبليكاسىنىڭ پارلامەنتىنە ەلوردانىڭ قوعامدىق كولىگىندە بيلەتسىز جول ءجۇرۋ ءۇشىن جاۋاپكەرشىلىككە تارتۋ تەتىگىن جەتىلدىرۋگە قاتىستى بىرقاتار زاڭنامالىق اكتىگە ۇسىنىس جولدادى. سونداي-اق ەلوردالىق ءماسليحات ماجىلىسكە مادەنيەت جانە سپورت, جاستار ساياساتى, ءبىلىم بەرۋ, دەنساۋلىق ساقتاۋ, ءتىل ساياساتى, جۇمىسپەن قامتۋ سالالارىندا زاڭنامالىق دەڭگەيدە شەشۋدى تالاپ ەتەتىن پروبلەمالىق ماسەلەلەر بويىنشا بىرقاتار ۇسىنىس جولدادى» دەپ جازدى توراعا الەۋمەتتىك جەلىدەگى پاراقشاسىندا.
