مادەنيەت جانە اقپارات مينيسترلىگىنىڭ تاپسىرىسىمەن «حابار» اگەنتتىگى تۇسىرگەن, دومبىرا مەن كۇي ونەرىن ناسيحاتتايتىن «قازىنا» تەلەجوباسىنىڭ تۇساۋكەسەرى ءوتتى. ءىس-شاراعا پارلامەنت دەپۋتاتتارى, شىعارماشىلىق زيالى قاۋىم وكىلدەرى قاتىستى.
مادەنيەت جانە اقپارات ءمينيسترى ايدا بالاەۆا قازاق حالقى عاسىرلار بويى تاريح پەن مادەنيەتتى ساقتاپ, كۇي ارقىلى جەتكىزگەنىن اتاپ ءوتتى.
«كۇي – قازاقتىڭ مىڭ جىلدىق تاريحىنىڭ كوركەم شەجىرەسى. مەملەكەت باسشىسى قاسىم-جومارت توقاەۆ: «دومبىرا ۇنىنەن ۇلتتىق تاريحتىڭ باستاۋى مەن ۇلى دالانىڭ سان عاسىرلىق شەجىرەسى ەستىلەدى. حالقىمىزدىڭ ءتول مادەنيەتى مەن ونەرىن دومبىراسىز ەلەستەتۋ مۇمكىن ەمەس. جۇرەكتەن شىققان كۇي ۇلتتىق رۋحتى كوتەرەدى. كونە داۋىردەن جەتكەن بۇل اسپاپ حالقىمىزدىڭ بولمىس-ءبىتىمىن, سالت-ءداستۇرى مەن مادەنيەتىن ايشىقتايدى. رۋحىمىزدى كوتەرىپ, مەرەيىمىزدى وسىرگەن قارا دومبىرا اسىل مۇرامىزعا, ۇلتتىڭ سيمۆولىنا اينالدى» دەپ تەگىن ايتپاسا كەرەك. شىنىندا دا, كۇي ونەرى ەل تاريحىمەن بىرگە ءومىر سۇرەدى. كيەلى دومبىرا حالقىمىزبەن بىرگە جاساپ, ەل باسىنان وتكەن ەرلىككە تولى تاريحىمىزدى قوس ىشەگىنەن كۇمبىرلەتە توگىپ, كۇڭىرەنتە ءورىپ كەلەدى. حالقىمىزدىڭ وسى اسىل مۇراسىن قالىڭ كوپشىلىككە كەڭىنەن ناسيحاتتاپ, جاس ۇرپاق پەن جالپى جۇرتتىڭ ساناسىنا ءسىڭىرۋ تاريحقا تاعزىم, ەلدىككە قۇرمەت ەكەنى بەلگىلى. ءبىزدىڭ مىندەتىمىز – قاسيەتتى ونەرىمىزدى ناسيحاتتاۋ جانە بولاشاق ۇرپاققا امانات ەتۋ» دەدى مينيستر.
«قازىنا» تەلەجوباسى دومبىرانى ناسيحاتتاۋعا, ەسىمى مۋزىكا تاريحىنا التىن ارىپپەن جازىلعان كۇيشىلەردىڭ مۇراسىن قازاقستاندىقتاردىڭ ساناسىندا جاڭعىرتۋعا باعىتتالعان. دەرەكتى فيلمدە 7 مەكتەپتىڭ تاريحى, وقيعالارى مەن ەرەكشەلىگى تۋرالى باياندالادى. تەلەجوباعا ونەرتانۋ, مۋزىكاتانۋ, ەتنوگرافيا جانە تاريح عىلىمدارىنىڭ ماماندارى قاتىسادى. وندا التىن وردا زامانىنان بۇگىنگە دەيىنگى ورىنداۋ مانەرى مەن قۇرىلىمدىق دامۋ تۇگەلدەي قامتىلادى. جوبا 20 قاڭتاردان باستاپ ءار سەنبى سايىن ساعات 14:00-دە ەفيرگە شىعادى.
