ءىس-شاراعا دەنساۋلىق ساقتاۋ مينيسترلىگىنىڭ وكىلدەرى, مەملەكەتتىك ورگاندار مەن قوعامدىق ۇيىمداردىڭ باسشىلارى, قان دونورلارىمەن قاتار, وتاندىق ەسترادا جۇلدىزدارى مەن قاتار باسقا دا رەسپۋبليكالىق, حالىقارالىق كونكۋرستاردىڭ لاۋرەاتتارى, بلوگەرلەر مەن باق وكىلدەرى قاتىستى. ال ماراپات يەلەرىنىڭ سىيلىقتارىن تابىستاپ ءسوز سويلەگەن ەسىل اۋدانىنىڭ اكىمى دارمەنيار قىدىربەكۇلى استانالىقتاردى مەرەكەمەن قۇتتىقتاپ, جاقسىلىق جاساۋدان شارشاماۋعا شاقىردى.
-سىزدەردى دۇنيەجۇزىلىك قان دونورى كۇنىمەن قۇتتىقتايمىن! قان دونورى بولۋ – قوعامنىڭ دەنساۋلىعى مەن ءال-اۋقاتىنا ۇلەس قوساتىن باتىر بولۋ دەپ بىلەمىن.
بارلىق مۇقتاج جاندى قاۋىپسىز قان ونىمدەرىمەن قامتاماسىز ەتۋ ءۇشىن ەرىكتى قان مەن پلازما دونورلىعىنىڭ ماڭىزى زور,-دەپ اتاپ ءوتتى ول.
سونىمەن قاتار «AMANAT» پارتياسى استانا قالالىق فيليالىنىڭ اتقارۋشى حاتشىسى مۇحامەدجان ءابدىاشىمۇلى دا ءسوز سويلەپ, قاتىسۋشىلارعا ءوز العىسىن جەتكىزدى.
ال, ءىس-شارا بارىسىندا ۇزاق جىلدار بويى تۇراقتى تۇردە قان تاپسىرىپ كەلە جاتقان قۇرمەتتى دونورلار ماراپاتتالدى. اتاپ ايتار بولساق, قر دەنساۋلىق ساقتاۋ مينيسترلىگىنىڭ «دەنساۋلىق ساقتاۋ سالاسىنا قوسقان ۇلەسى ءۇشىن» توسبەلگىسىمەن مەككە ابدوللاەۆ, نيكيتين الەكساندر, قۇرمانعازى كورپەشوۆ ماراپاتتالدى. بۇل توسبەلى ءومىر بويى 40-تان استام رەت قان تاپسىرعان ادامدارعا بەرىلەدى.
سونداي-اق, ومىرىندە وننان استام, قىرىققا تاياۋ دوناتسيا جاساعان جانات ەلۋباەۆ, نۇرلان جاڭابەكوۆ, ۇلان ديانوۆ, نۇرسۇلتان قاجكەنوۆ, ارمان تۇياقپاەۆ, اندرەي پان, ايان بالتاشەۆ سياقتى ازاماتتارعا ەلوردالىق قان ورتالىعى مەن قالالىق ءماسليحات دەپۋتاتى نۇرلان ءمۇسلىمنىڭ اتىنان قۇرمەت گراموتاسى جانە ەستەلىك سىيلىقتار تابىستالدى.
ماراپات يەلەرى وزدەرىنىڭ ەڭبەكتەرىنىڭ ەلەنگەنىنە ريزاشىلىعىن ءبىلدىردى.
-مەن 18 جاسىمنان باستاپ بۇگىنگى كۇنگە دەيىن 13 جىل بويى قان تاپسىرىپ كەلە جاتىرمىن. ەڭ باستىسى بىرەۋگە ءوز قولىڭنان كەلگەن كومەگىڭ ارقىلى جاقسىلىق جاساۋ ادام جانىن تىنىشتاندىرادى. قۋانىش سىيلايدى,-دەدى ماراپات يەسى مەككە ابدوللاەۆ.
شاپاعات ءابدىر
