1 مامىر – قازاقستان حالقىنىڭ بىرلىگى كۇنى مەرەكەسىنە وراي استانا قالاسى اكىمدىگىنىڭ «رۋحانيات» كوممۋنالدىق مەملەكەتتىك مەكەمەسىنىڭ ۇيىمداستىرۋىمەن استاناداعى دوستىق ۇيىندە «دوستىعىمىز جاراسقان» اتتى وزگە ۇلت وكىلدەرىنىڭ اراسىندا بايقاۋ ءوتتى, دەپ حابارلايدى astana-akshamy.kz
ەلىن, جەرىن سۇيەتىن, سالت-ءداستۇردى ساقتاپ, مەملەكەتتىك تىلگە قۇرمەتپەن قارايتىن ۇلت وكىلدەرىن انىقتاۋ, ەلىمىزدە ءومىر سۇرەتىن وزگە ۇلت وكىلدەرىنىڭ دوستىعىن, بىرلىگىن, مادەنيەتىن جانە رۋحاني بايلىعىن ناسيحاتتاي وتىرىپ, قازاقستان حالقىن دوستىق پەن باۋىرمالدىققا تاربيەلەۋ, ءبىلىمدى بولۋعا, كوپ ءتىلدى مەڭگەرۋگە شابىتتاندىرۋ ماقساتىندا وتكىزىلگەن بۇل بايقاۋعا قازاقستان حالقى اسسامبلەياسىنىڭ وكىلدەرى مەن قازاق ءتىلىن بىلەتىن وزگە ۇلت وكىلدەرى قاتىستى.
«بىرلىكتەن بەكەم كۇش, دوستىقتان بيىك ماحاببات جوق. «بىرلىك بار جەردە تىرلىك بار» دەگەندەي, بىرلىگى جاراسقان ەلدىڭ قوعامى تىنىش, زامانى بەرەكەلى بولادى. ەلىمىزدەگى بارلىق ۇلت وكىلدەرى جۇدىرىقتاي جۇمىلىپ, بەرەكە-بىرلىكتى كوزىنىڭ قاراشىعىنداي ايالاعاندا عانا ءبىز بەرەكەلى عۇمىر كەشەمىز. ۇلتتار اراسىنداعى دوستىق پەن بەرەكە – ءبىزدىڭ قىمباتتى بايلىعىمىز. بۇگىنگى بايقاۋ دا دوستىقتى نىعايتىپ, وتانعا, ەلگە, مەملەكەتتىك تىلگە دەگەن قۇرمەتتى كۇشەيتۋ ءۇشىن وتكىزىلىپ وتىر. سوندىقتان بارلىق قاتىسۋشىلارعا ساتتىلىك تىلەيمىن», – دەدى استانا قالاسى اكىمدىگىنىڭ تىلدەردى دامىتۋ جانە اريحۆ ءىسى باسقارماسىنىڭ ءتىل ساياساتىن ۇيلەستىرۋ ءبولىمىنىڭ باسشىسى ءنۇرسيلا قاسقاتاەۆا.
بايقاۋ 7 ءبولىم بويىنشا وتكىزىلدى. «تانىستىرۋ» بولىمىندە ۇمىتكەرلەر ۇلتتىق كيىمىن كيىپ شىعىپ, ءوزىن قازاق تىلىندە تانىستىرسا, «ونەرلى ورگە» جۇزەر بولىمىندە قاتىسۋشىلار ءوز ونەرلەرىن كورسەتەتتى. «سۇراق-جاۋاپ» بولىمىندە قاتىسۋشىلار قازاقتىڭ ۇلتتىق سالت-داستۇرىنە قاتىستى سۇراقتارعا جاۋاپ بەردى. «تىلەك ايتۋ, باتا بەرۋ» بولىمىندە ۇمىتكەرلەر مەرەكەگە وراي ءوز تىلەكتەرىن ورتاعا سالسا, «جاعدايات» بولىمىندە بەلگىلەنگەن تاقىرىپتار بويىنشا قازاق تىلىندە ديالوكقا ءتۇستى. «ماقال ءسوزدىڭ مايەگى» بولىگىندە قاتىسۋشىلار ماقالدىڭ سوڭىن جالعاستىرىپ, ماعىناسىن ءتۇسىندىردى. «اس ادامنىڭ ارقاۋى» بولىمىندە ءار قاتىسۋشى ءوزىنىڭ ۇلتتىق تاعامىن دايىنداپ, ونىڭ قازاقتىڭ ۇلتتىق تاعامدارىمەن قانداي ۇقساستىعى بارىن ءتۇسىندىردى.
«بۇگىنى بايقاۋ وتە ماعىنالى ءوتتى. وزگە ۇلت وكىلدەرىنىڭ مەملەكەتتىك تىلدە سويلەپ, بەرەكە مەن بىرلىكتى تۋ ەتكەنى مەنى قاتتى اسەرلەندىردى. سونداي-اق بۇل بايقاۋدان وزگە ۇلت ەتنوستارىنىڭ سالت-ءداستۇرى, مادەنيەتى جونىندە دە كوپ نارسە ءتۇسىندىم. باسقا ۇلتتاردىڭ ماقالداپ سويلەگەنى قانداي كەرەمەت», – دەدى بايقاۋ كورەرمەنى, ل. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ەكىنشى كۋرس ستۋدەنتى ەنەلا ماحمۇتقىزى.
بايقاۋ سوڭىندا باعالاۋشىلار ۇزدىك دەپ تانىعان جەڭىمپازدارعا ءار نوميناتسيا بويىنشا باعالى سىيلىقتار تابىستالدى.
«قازاق حالقىنىڭ مەملەكەت قۇراۋشى ۇلت رەتىندەگى ءرولىن بەكەمدەپ, ەتنوسارالىق تاتۋلىق پەن دىنارالىق تۇسىنۋشىلىكتى قالىپتاستىرا بەرۋىمىز قاجەت. ءبىزدىڭ ۇستانىمىز ەل بىرلىگىنىڭ ءار الۋاندىلىعىندا. ەلىمىزدەگى ەتنيكالىق توپتاردىڭ ءتىلى مەن مادەنيەتىن دامىتۋعا جاعداي جاساي بەرەمىز. قازاق ءتىلىنىڭ مەملەكەتتىك ءتىل رەتىندەگى ءرولى كۇشەيىپ, ۇلتارالىق قاتىناس تىلىنە اينالاتىن كەزەڭى كەلەدى دەپ ەسەپتەيمىن», – دەپ مەملەكەت باسشىسى قاسىم-جومارت توقاەۆ ايتقانداي, بۇل بايقاۋ دا مەملەكەتتىك ءتىلدىڭ ەلدەگى بارلىق ەتنوس وكىلدەرىن ۇيىستىراتىن ۇلى كۇش ەكەنىن اڭعارتتى.
