استانادا ىسكە قوسىلعان پاريج-2024 جازعى وليمپيادا جانە پاراليمپيادا ويىندارىنا دايىندىق بويىنشا جەدەل شتابتا الداعى جارىستارعا ارنالعان ءماجىلىس ءوتتى.
جاقسىلىق ۇشكەمپىروۆ اتىنداعى جەكپە-جەك سپورت سارايى الدىندا ورنالاسقان جەدەل شتابتا ۇلتتىق وليمپيادا كوميتەتى باس حاتشىسىنىڭ ورىنباسارى ەلسيار قاناعاتوۆ قازاقستان كومانداسىنىڭ پاريج ويىندارىنا دايىندىعى جايلى جان-جاقتى اڭگىمەلەپ بەردى. «بۇگىنگى تاڭدا ويىندارعا باراتىن قازاقستان دەلەگاتسياسى ءۇشىن پاريجدەگى وليمپيادا قالاشىعىنداعى ورنالاسۋ ماسەلەسى تۇگەلدەي شەشىلگەن. سپورتشىلاردىڭ جاتتىعۋ جاساۋىنا جانە دەمالۋىنا جاعداي جاسالعان. قازىرگى كۇندە وليمپياداعا قاتىساتىن سپورتشىلاردىڭ نەگىزى ىرىكتەلگەن, ازىرگە قازاقستان قورجىنىندا 70 ليتسەنزيا بار. الداعى اپتادا تاعى دا 4-5 جولداما الۋ مۇمكىندىگىمىز بار. جالپى ۇلتتىق قۇراما ەنشىسىندە 80 جولداما بولادى دەپ جوبالاپ وتىرمىز. شىلدە ايىنىڭ باسىندا قازاقستان دەلەگاتسياسىنىڭ كيىم فورماسى تولىق دايىن بولادى» دەپ اتاپ ءوتتى ەلسيار قاناعاتوۆ.
ءحححىىى جازعى وليمپيادا ويىندارى مەن حVII پاراليمپيادا ويىندارىنا قاتىسۋ بويىنشا تۋريزم جانە سپورت مينيسترلىگى سپورت كوميتەتى توراعاسىنىڭ ورىنباسارى ازامات يماشەۆ ايتىپ بەردى. ءدۇبىرلى دودادا ەل نامىسىن قورعايتىن سپورتشىلاردىڭ دايىندىعىنا تۋريزم جانە سپورت مينيسترلىگى, ۇلتتىق وليمپيادا كوميتەتى جانە سپورت فەدەراتسيالارى تاراپىنان كوپ جۇمىس اتقارىلىپ جاتقانىن جەتكىزدى.
جەدەل شتابتا بەرىلگەن مالىمەت بويىنشا وڭىرلەر بويىنشا وليمپياداعا قاتىسۋشىلار سانى بويىنشا 12 سپورتشىسىن قوسىپ وتىرعان شىمكەنت قالاسى الدا تۇر, الماتى قالاسىنان 10 سپورتشى, استانا قالاسىنان 9 سپورتشى پاريج الاڭدارىندا سىنعا تۇسەتىن بولىپ وتىر. ال پاۆلودار, قوستاناي, ۇلىتاۋ جانە ماڭعىستاۋ وبلىستارىنان بىردە-ءبىر سپورتشى بايراقتى باسەكەگە ىرىكتەلە المادى.
پاريج-2024 جازعى وليمپيادا جانە پاراليمپيادا ويىندارىنا دايىندىق بويىنشا جەدەل شتابتىڭ وتىرىسىنا ارنايى شاقىرىلعان مەملەكەت جانە قوعام قايراتكەرلەرى ءاليحان بايمەن مەن اباي تاسبولاتوۆ, ارداگەر سپورت جۋرناليستەرى نەسىپ ءجۇنىسباي, ءجۇسىپ حيسىموۆ, وڭداسىن ەلۋباي, قىدىربەك رىسبەك, سونداي-اق وليمپيادا ويىندارى مەن الەم چەمپيوناتىنىڭ جەڭىمپازدارى سەرىك ساپيەۆ, ۆاسيلي لەۆيت جانە مەرەي اقشالوۆ الداعى وليمپيادا ويىندارىنا قاتىستى ءوز ويلارىن ورتاعا سالىپ, سپورتشىلارىمىزعا تىلەكتەرىن ايتتى.
پاريجدە الەمنىڭ ەڭ ۇزدىك سپورتشىلارى سىنعا تۇسەتىن وليمپيادا ويىندارىنىڭ باستالۋىنا 42 كۇن قالدى. وسى بايراقتى جارىستان قازاقستان سپورتشىلارى الەم اسپانىندا ءانۇرانىمىزدى اسقاقتاتىپ, كوك تۋىمىزدى بيىكتەن جەلبىرەتەدى دەگەن سەنىمدەمىز.
