ءال-فارابي اتىنداعى وقۋشىلار سارايىندا تانىمال ءانشى, وزبەكستان مەن قاراقالپاقستان رەسپۋبليكالارىنىڭ ەڭبەك سىڭىرگەن ءارتىسى ماحسەتباي وتەمۇراتوۆتىڭ «مەن اۋىلدى ساعىندىم» اتتى ءان كەشى ءوتتى. جيىلعان جۇرتقا عاجايىپ كوڭىل-كۇي سىيلاعان, باۋىرلاس ەلدىڭ ىستىق سالەمىن الا كەلگەن ماحسەتباي وتەمۇراتوۆ ءوزىنىڭ شىعارماشىلىعىنداعى ەڭ تاڭداۋلى شىعارمالارىن ورىندادى.
ونەرپازدىڭ ءان كەشىندە استانالىق «جايحۋن» قاراقالپاق ەتنومادەني بىرلەستىگىنىڭ بيشىلەرى دە ساحناعا شىعىپ, ونەر كورسەتتى. سونداي-اق «Qazaqstan داۋىسى» جوباسىنىڭ II ماۋسىمىندا اقتىق سايىستا باق سىناپ جاتقان قاراقالپاقستاندا تۇراتىن تالانتتى قانداسىمىز مۇسا مارات ءان شىرقاپ, تىڭداۋشى قاۋىمدى باريتون داۋسىمەن تاڭعالدىردى. كورەرمەندەردى ريزاشىلىق سەزىمگە بولەگەن ءبىر ءسات, قازاقى داستۇرمەن ماحسەتباي وتەمۇراتوۆ ونەردە ىزىنەن ەرگەن ىنىسىنە ءوزىنىڭ اقجولتاي كوستيۋمىن سىيلادى. قاسيەتتى ساحنادا جۇرگەن ەكى تولقىننىڭ وكىلىنىڭ ءوزارا سىيلاستىعى حالىقتى تولقىتىپ, ءانشىنىڭ مەرەيىن اسىردى.
ماحسەتباي وتەمۇراتوۆتىڭ الماتىدا وتكەن «جىل ادامى» بايقاۋىندا «التىن ادام» اتالىمىن يەلەنگەنىن بىرەۋ بىلسە, بىرەۋ بىلمەيدى. ءانشى قازىر نوكىس قالاسىنداعى قاراقالپاقستان كوركەم ونەر سارايىنىڭ ديرەكتورى قىزمەتىن اتقارادى. ول كوپ جىلدار بويى قازاق ەلىن ارالاپ, جەكە كونتسەرتىن بەرىپ جۇرگەنى ءمالىم. «ءامۋداريانىڭ سۋىن ىشكەن, بالا كەزدەن بىرگە وسكەن تالاي قاراقالپاق بالاسى بۇگىندە قازاقستاندا تۇرىپ جاتىر. سول قانداس جۇرتتىڭ تۋعان ەلگە, تۋعان جەرگە ساعىنىشىن باسىپ, اۋىلدىڭ سالەمىن جەتكىزەيىن دەپ جەكە كەشتەرىمدى ءجيى وتكىزۋگە تىرىسامىن. بيىل مەنىڭ شىعارماشىلىعىم ءۇشىن تابىستى بولدى. گاسترولدىك ساپارىم دا استانانىڭ تورىندەگى كەشىممەن اياقتالىپ جاتىر. پرەزيدەنت قاسىم-جومارت
كەمەلۇلىنىڭ العىس حاتىمەن ماراپاتتالدىم. بۇل – وزبەكستان مەن قازاقستان اراسىنداعى مىزعىماس بەرىك مادەني بايلانىستىڭ بەلگىسى» دەدى م.وتەمۇراتوۆ.
