ىشكى ىستەر ورگاندارى ەل اۋماعىندا 5-9 اقپان ارالىعىندا “توسقاۋىل” جەدەل-پروفيلاكتيكالىق ءىس-شاراسىن وتكىزدى. سونىڭ بارىسىندا پوليتسەيلەر 4 ەسىرتكى زەرتحاناسىن جويدى, دەپ حابارلايدى astana-akshamy.kz.
-ءىس -شارا كەزىندە اسىرەسە جوعارى سىنىپ وقۋشىلارى مەن ستۋدەنت جاستارعا باسا نازار اۋدارىلدى. ەسىرتكىگە قارسى ءىس-شارالارعا ىشكى ىستەر ورگاندارىنىڭ جانە ۇلتتىق ۇلاننىڭ جەكە قۇرامى, اكىمدىكتەردىڭ قىزمەتكەرلەرى, دەنساۋلىق ساقتاۋ جانە ءبىلىم بەرۋ سالالارىنىڭ وكىلدەرى, جاستار ساياساتىنىڭ جەتەكشىلەرى, ۇكىمەتتىك ەمەس سەكتور جانە ەرىكتىلەر جۇمىلدىرىلدى. پوليتسيانىڭ باستاماسى بويىنشا حالىقپەن كەزدەسۋلەر, وقۋ مەكەمەلەرىندە 356 ءدارىس, 18 اكتسيا, 10 دوڭگەلەك ۇستەل جانە ناركولوگ-دارىگەرلەردى, تاجىريبەلى ۇستازدار مەن پسيحولوگتاردى, سونداي-اق ازاماتتىق قوعام وكىلدەرىن شاقىرۋمەن 55 كەزدەسۋ وتكىزىلدى. بارلىعى 538 ءتۇرلى پروفيلاكتيكالىق, ونىڭ ىشىندە 12 سپورتتىق-بۇقارالىق ءىس-شارا, 87 تۋرنير جانە فلەشموب وتكىزىلدى. ەسىرتكىنىڭ گراففيتي-جارناماسىن جويۋدا ۆولونتەرلىق قوزعالىس وكىلدەرى ءوز ۇلەستەرىن قوستى, – دەدى ءىىم ەسىرتكى قىلمىسىنا قارسى ءىس-قيمىل دەپارتامەنتى باستىعىنىڭ ورىنباسارى باقىتجان ءامىرحانوۆ پوليتسيا ۆەدومستۆوسىنىڭ اپتالىق بريفينگىندە.
ەسىرتكىنىڭ زاڭسىز اينالىمىنا قارسى كۇرەس كۇشەيتىلدى. “توسقاۋىل” وپەراتسياسى كەزىندە ءتورت ەسىرتكى زەرتحاناسى جويىلدى. الماتىدا سينتەتيكا وندىرەتىن ەسىرتكى زەرتحاناسى تاراتىلدى. پوليتسەيلەر 13 كگ “مەفەدرون” سينتەتيكالىق پرەپاراتىن, سونداي-اق ولاردى وندىرۋگە ارنالعان رەاكتورلار مەن ءتۇرلى جابدىقتاردى تاركىلەدى. سونداي-اق ەلدىڭ ەڭ ءىرى مەگاپوليسىندە پوليتسيا قىزمەتكەرلەرىمەن Mercedes اۆتوكولىگى توقتاتىلىپ, ونى تەكسەرۋ كەزىندە جالپى سالماعى 3,7 كگ “الفا-رVر” سينتەتيكالىق ەسىرتكىسى سالىنعان 10 پوليەتيلەن پاكەت تابىلدى. اتىراۋ وبلىسىندا ينتەرنەت-دۇكەنگە كۋرەر بولىپ جۇمىسقا ورنالاسقان سينتەتيكالىق پسيحوتروپتىق زاتتاردى جاسىرۋشى ۇستالدى. ونىڭ جالدامالى پاتەرىن ءتىنتۋ بارىسىندا سالماعى 1,5 كگ “الفا-رVر” جانە “مەفەدرون” ەسىرتكى زاتتارى تاركىلەندى. شىمكەنتتە پوليتسيا قىزمەتكەرلەرى ەلدىڭ بىرقاتار ءىرى قالالارىندا سينتەتيكالىق ەسىرتكىنىڭ كوتەرمە ساۋداسىمەن اينالىسقان وڭىرلىك ەسىرتكى كۋرەرىن ۇستادى. الماتىدا جالدامالى پاتەرىن ءتىنتۋ بارىسىندا كۇدىكتىدەن جالپى سالماعى 1,5 كگ بولاتىن “امفەتامين”, “لسد” جانە “ەكستازي” ەسىرتكى زاتتارى تاركىلەندى. سولتۇستىك قازاقستان وبلىسىندا ۋچاسكەلىك پوليتسيا ينسپەكتورى ارنايى ءبولىنىس جاۋىنگەرلەرىنىڭ جانە كريمينالدىق پوليتسيا قىزمەتكەرلەرىنىڭ قاتىسۋىمەن جەرگىلىكتى تۇرعىندى ۇستادى, ودان 8,5 كگ “ماريحۋانا” ەسىرتكى زاتى تاركىلەندى.
– “توسقاۋىل” وپەراتسياسىنىڭ شەڭبەرىندە كوشى-قون پوليتسياسىنىڭ قىزمەتكەرلەرىمەن بىرلەسىپ كۇن سايىن شەتەلدىك ازاماتتار جانە ولاردىڭ تۇراتىن جەرلەرىنە تەكسەرىستەر جۇرگىزىلدى. وپەراتسيا باسىنان بەرى كوشى-قون زاڭناماسىن بۇزۋدىڭ 1321 دەرەگى انىقتالدى, 218 قۇقىقبۇزۋشى ەلدەن شىعارىلدى. قىزمەتتىك-ىزدەستىرۋ يتتەرىن قولدانۋمەن كولىك وبەكتىلەرىنە, اۆتوكولىك قۇرالدارىنا, باگاجعا, پوشتالىق بولىمشەلەرگە جانە باسقا دا نىساندارعا تەكسەرۋ جۇرگىزىلدى. ولاردىڭ كومەگىمەن 33 ەسىرتكى قىلمىسى اشىلدى. قارۋ-جاراقتى زاڭسىز ساقتاۋدىڭ 31 فاكتىسى انىقتالدى, – دەدى سپيكەر.
وپەراتسيانىڭ قورىتىندىسى بويىنشا بارلىعى 258 قۇقىق بۇزۋشىلىقتىڭ جولى كەسىلدى, ولاردىڭ ىشىندە ەسىرتكى وتكىزۋدىڭ 58 فاكتىسى, اسا ءىرى كولەمدە ساقتاۋدىڭ 40 فاكتىسى جانە ەسىرتكى كونترابانداسىنىڭ 7 فاكتىسى انىقتالدى. زاڭسىز اينالىمنان 144 كگ جۋىق ءتۇرلى ەسىرتكى زاتتارى, ونىڭ ىشىندە 30 كگ سينتەتيكا, 110 كگ ماريحۋانا, 3 كگ گاشيش جانە 800 گرامم ترامادول تاركىلەندى. ىشكى ىستەر مينيسترلىگىمەن وسى باعىتتاعى جۇمىس جالعاسىپ جاتىر.
