قازاقستاندا شەگىرتكەنىڭ تارالۋىنا توسقاۋىل قويۋ باعىتىندا دروندار پايدالانىلادى. بۇل تۋرالى ۆيتسە-پرەمەر سەرىك جۇمانعارين ايتتى, دەپ حابارلايدى astana-akshamy.kz.
«كەلەسى جىلى شەگىرتكەنىڭ تارالۋ اۋماعى ەلىمىزدە ازايادى دەپ ۇمىتتەنەمىن, ياعني ەندى 2,5 ملن گەكتار ەمەس, ودان دا از بولادى. وسىعان كۇش سالىپ جاتىرمىز», – دەدى س. جۇمانعارين سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
وسى رەتتە پرەمەر-ءمينيستردىڭ ورىنباسارى اتالعان زيانكەستەرمەن ءتيىمدى كۇرەسۋ ماسەلەسىنە توقتالدى.
«ءتيىستى جابدىقتاردى ساتىپ الامىز, ياعني كەلەسى جىلدىڭ بيۋدجەتىندە 100-گە جۋىق درون ەسكەرىلەدى. وسى تەحنيكانىڭ جەردەگى شەگىرتكەنى انىقتايتىن ارنايى باعدارلاماسى بولادى. وسى ارقىلى زيانكەستەردى ناقتى انىقتاپ, ولاردى جويۋعا باعىتتالادى. بۇل دروننىڭ اقتوبە وبلىسىنداعى جۇمىسى كورسەتىلگەن ەدى. سودان دروننىڭ ءتيىمدى جۇمىسىن بايقاۋعا بولادى», – دەدى سەرىك جۇمانعارين.
بۇعان دەيىن شەگىرتكەگە قارسى كۇرەس شارالارىنا 2,5 مىڭنان استام ادام جۇمىلدىرىلعانى حابارلاندى.
