ەلىمىزدە جاساندى ينتەللەكت ۇلتتىق ورتالىعى اشىلادى

«جاقىندا ءبىز تسيفرلىق دامۋ, يننوۆاتسيالار جانە اەروعارىش ونەركاسىبى جانە Astana Hub ارىپتەستەرىمەن بىرگە قازاقستان رەسپۋبليكاسىندا جاساندى ينتەللەكتتى دامىتۋ تۇجىرىمداماسى شەڭبەرىندە دەرەكتەردى وڭدەۋ ورتالىعى مەن سۋپەركومپيۋتەر سالۋ جوباسى بويىنشا جۇمىس توبىنىڭ وتىرىسىن وتكىزدىك. بۇل پلاتفورمانىڭ ماقساتى — قازاقستان ەكونوميكاسىن دامىتۋ ءۇشىن تەحنولوگيالاردى ءتيىمدى ەنگىزۋ جانە AI الەۋەتىن بارىنشا تولىق پايدالانۋ. وسى تۇجىرىمدامانىڭ اياسىندا AI ۇلتتىق ورتالىعىن اشۋ جوسپارلانۋدا. جوبانىڭ ميسسياسى — الداعى جىلداردا قازاقستاننىڭ AI ترانسفورماتسياسىن جۇزەگە اسىرۋ», — دەپ جازدى الەۋمەتتىك جەلىدە ەسەكەەۆ.

ونىڭ ايتۋىنشا, AI-ءدىڭ ۇلتتىق ەكونوميكا مەن قوعامعا ينتەگراتسياسى — تۇراقتى دامۋدى ساقتاۋدىڭ جانە بولاشاقتىڭ سىن-قاتەرلەرىنە دايىندالۋدىڭ قاجەتتى شارتى بولىپ سانالادى. مەملەكەتتىڭ AI ۇلتتىق ورتالىعىن اشۋ جونىندەگى جوسپارلارى — ءبىلىم بەرۋ, ينفراقۇرىلىمدى دامىتۋ, ۆەنچۋرلىق ينۆەستيتسيالار, سونداي-اق IT شەشىمدەرىنىڭ ەكسپورتىن قولداۋ سالاسىنداعى بىرقاتار نەگىزگى باستاماسىن قامتيدى. وسى جوبا اياسىندا كەلەسى باستامالاردى قامتيتىن جول كارتاسى ازىرلەندى:

• AI سالاسىنداعى نەگىزگى جوبالار مەن زەرتتەۋلەردە ىنتىماقتاسۋ ءۇشىن ءبىلىم بەرۋ مەكەمەلەرىن, زەرتتەۋ زەرتحانالارىن, ستارتاپتار مەن تەحنولوگيالىق مەكەمەلەردى بىرىكتىرەتىن AI كامپۋسى;
• YNOV, 01EduSystem جانە Tumo مەكتەپتەرىنىڭ وزىق تاجىريبەسىن ەسكەرە وتىرىپ ازىرلەنەتىن وقۋ باعدارلامالارىن قولدانىپ, وقۋشىلار مەن ستۋدەنتتەر اراسىندا AI ماماندارىن دايارلاۋ;
• وقۋ كۋرستارى, شەبەرلىك ساباقتارى جانە جەلىلىك ءىس-شارالار ارقىلى AI قاۋىمداستىعىن دامىتۋعا ۇلەس قوساتىن P2P اكادەمياسىن اشۋ.

بۇل باستامالار ەلىمىزدە يننوۆاتسيالىق دامۋعا, ءبىلىم مەن وقىتۋ دەڭگەيىن ارتتىرۋعا, سونداي-اق جاھاندىق AI يندۋسترياسىنداعى ەلىمىزدىڭ پوزيتسياسىن نىعايتۋعا ىقپال ەتەتىن تۇراقتى AI ەكوجۇيەسىن قۇرۋعا باعىتتالعان.

سۋرەت:  vsyapravda.net