ەلوردا كۇنىنە وراي «جاستار» سارايىندا «جان جۇرەگىم – استانا» اتتى مەرەكەلىك كونتسەرت ءوتتى, دەپ حابارلايدى astana-akshamy.kz
كونتسەرت ەلوردانىڭ مادەنيەت باسقارماسىنىڭ قولداۋىمەن ۇيىمداستىرىلدى.
«بۇگىنگى ءىس-شارا قالا كۇنىنە وراي ۇيىمداستىرىلدى. زال تولى بولدى. ارتىستەرىمىز كورەرمەننىڭ ىستىق ىقىلاسىنا بولەندى. قالا تۇرعىندارى دا شات-شادىمان كۇي كەشتى. بارشاڭىزدى استانا كۇنىمەن قۇتتىقتاعىم كەلەدى. استانا – ەلىمىزدىڭ ەڭ ۇلكەن جەتىستىكتەرىنىڭ ءبىرى. از ۋاقىت ىشىندە ول قازاقستاننىڭ ادەمى جانە باعا جەتپەس سيمۆولىنا اينالدى. ءبىزدىڭ ارايلى استانامىز وركەندەي بەرسىن!» – دەدى «جاستار» سارايىنىڭ ديرەكتورى ءمادي تايپين.
ءىس-شارادا ەلوردالىق «استانا» ەسترادالىق-سيمفونيالىق وركەسترى, «سەرپەر» دومبىراشىلار ءانسامبلى, قر ۇلتتىق ۇلانىنىڭ ەرلەر حورى ونەر كورسەتتى.
سونىمەن قاتار باعدارلاماعا «ەرەن ەڭبەگى ءۇشىن» مەملەكەتتىك ناگراداسىنىڭ يەگەرى داۋرەن تولەۋباەۆ جانە حالىقارالىق بايقاۋلاردىڭ لاۋرەاتتارى ونەر قۇلوۆ, تاتيانا كيم, زارينا بوجاكوۆا, الىبەك الماديەۆ قاتىستى.
«دو Star» زاماناۋي ۆوكال مەكتەبىنىڭ جاس قاتىسۋشىلارىنىڭ مۋزىكالىق كومپوزيتسيالارىنىڭ ورىندالۋى كورەرمەندەردى قۋانىشقا بولەدى. سونداي-اق «تەررا» بي تەاترىنىڭ ۇجىمى حورەوگرافيالىق جاعىنان ونەرىن پاش ەتتى.
«بۇگىنگى كونتسەرتتىڭ ماقساتى ەلوردا تۇرعىندارى مەن قوناقتارىنا تاماشا كەش سىيلاۋ بولدى. وركەستردىڭ سۇيەمەلدەۋىمەن جاندى كونتسەرت كورەرمەندەرگە مۇلدەم باسقا ەموتسيا سىيلادى. زال تولى بولدى, كونتسەرتكە 700-دەن استام كورەرمەن كەلدى», – دەدى «تەررا» بي تەاترى كاسىبي ۇجىمىنىڭ جەتەكشىسى ديلبار سادىققىزى.
«جاستار» سارايىنىڭ ديرەكتورى ەلوردا كۇنىنە وراي باسقا دا ءىس-شارالاردى وتكىزۋ جوسپارلانىپ وتىرعانىن اتاپ ءوتتى. 5 شىلدەدە «Mereily Family-2024» جانە «ايالاعان استانا» بايقاۋلارى وتەدى. 7 شىلدەدە «كىرۋ كودى» سپەكتاكلى وتەدى.
