ەلوردا كۇنىن مەرەكەلەۋ اياسىندا استانا اكىمدىگى جانە ەركەعالي راحماديەۆ اتىنداعى مەملەكەتتىك اكادەميالىق فيلارمونيا «FILARMONIA FEST – 2024» مۋزىكالىق ءىس-شاراسىن وتكىزدى, دەپ حابارلايدى astana-akshamy.kz
«FILARMONIA FEST» استانا كۇنىن مەرەكەلەۋ اياسىندا قالانىڭ مۋزىكا الەمى اينالاسىندا جۇرتشىلىقتى بىرىكتىرۋگە ارنالعان. بۇل قازاقستاندىق مۋزىكالىق مادەنيەتتى دارىپتەۋ, وتاندىق ونەردىڭ گۋمانيستىك جانە رۋحاني باعىتى ارقىلى حالىقتىڭ ءتۇرلى توپتارىن كوركەمدىك شىعارماشىلىققا باۋلۋ ماقساتىندا وتكىزىلەدى.
28 جانە 29 ماۋسىم كۇندەرى كەنەسارى كوشەسى, 32 مەكەنجايىنداعى فيلارمونيا عيماراتىنىڭ الدىنداعى الاڭنان ەسىل وزەنىنىڭ جاعالاۋىنا دەيىن ءتۇرلى ءىس-شارالار ءوتتى.
ءبىرىنشى كۇنى جوبا اياسىندا فيلارمونيا الدىنداعى الاڭدا «بورمەن سۋرەت سالۋ», «جيۆوپيس» ەكى نوميناتسياسى بويىنشا «مەن مۋزىكا سالامىن» بالالار سۋرەت بايقاۋى ءوتتى. ۇزدىك جۇمىستاردىڭ اۆتورلارىنا سىيلىقتار تابىستالدى. ال جاس مۋزىكانتتار ءۇشىن بۇل الاڭدا فيلارمونيا ارتىستەرىنەن «سارىارقا» حالىق مۋزىكاسى ءانسامبلى مەن سيمفونيالىق وركەستردىڭ «مۋزىكالىق اسپاپتار الەمىنە ساياحات» اتتى شەبەرلىك ساباقتارى ۇيىمداستىرىلدى, وندا بالالار ادەمى دىبىستاردىڭ تۋى مەن ولاردىڭ اۋەن بوپ قايتا شىعۋ قۇپيالارىن ءبىلدى.
ەكىنشى كۇنى سول الاڭدا فيلارمونيانىڭ بارلىق ۇجىمدارىنىڭ قاتىسۋىمەن ەلوردانىڭ 26 جىلدىعىنا ارنالعان ء«تىرى» 26 سانى سالىنعان جاپپاي فلەش-موب ءوتتى. ەسىل وزەنىنىڭ جاعالاۋى مەن ەلوردالىق اربات ارقىلى شەرۋ دە ءوتتى. ۇلكەن مۋزىكالىق شەرۋگە «سارىارقا» حالىق مۋزىكالىق ءانسامبلى, «قورقىت» ەتنو-ءانسامبلى, Alem زاماناۋي حورەوگرافيا بالەتى, كامەرالىق حور, قازاق, سيمفونيالىق جانە ۇرمەلى وركەسترلەر, ەسترادالىق, كلاسسيكالىق ۆوكال جانە حالىق ءانى ءبولىمى قاتىستى.
بۇل ۇجىمدار شەرۋدەن كەيىن قوناقتار الدىندا مۋزىكالىق نومىرلەرمەن ونەر كورسەتىپ, كەنەسارى ەسكەرتكىشىنىڭ جانىندا «اتامەكەن» ءانىن بىرگە ورىندادى.
