بۇل تۋرالى استانا قالالىق ءماسليحاتىنىڭ وتىرىسىندا ەلوردانىڭ ءبىلىم باسقارماسىنىڭ باسشىسى قاسىمحان سەنعازىەۆ مالىمدەدى. سونداي-اق ول قالادا قاي ءپان مۇعالىمدەرىنە قاجەتتىلىك بار ەكەنىن دە ايتىپ بەردى, دەپ حابارلايدى astana-akshamy.kz
«بۇگىنگى تاڭدا ەلوردانىڭ ءبىلىم بەرۋ سالاسىندا 21 مىڭنان استام پەداگوگ جۇمىس ىستەيدى. ونىڭ ىشىندە مەملەكەتتىك جالپى ءبىلىم بەرەتىن مەكتەپتەردە 12 مىڭنان استام پەداگوگ بار. ۇلتتىق ءبىلىم بەرۋ دەرەكتەرى بازاسىنىڭ مالىمەتىنشە, بۇگىنگى تاڭدا پەداگوگتارعا قاجەتتىلىك — 91 ادام. قاجەتتىلىك ورىس تىلىندە وقىتاتىن باستاۋىش سىنىپ مۇعالىمدەرى, ماتەماتيكا, ينفورماتيكا, تاريح, ورىس ءتىلى مەن ادەبيەتى, فيزيكا, حيميا مۇعالىمدەرىنە كوبىرەك بايقالادى», — دەدى قاسىمحان سەنعازىەۆ قالالىق ءماسليحات وتىرىسىندا.
سوعان قوسا ارنايى ءبىلىم بەرۋ ۇيىمدارىنداعى ارنايى پەداگوگتەرگە, مەكتەپكە دەيىنگى مەكەمە تاربيەشىلەرىنە دە قاجەتتىلىك بار. ەلوردادا 2029 جىلعا دەيىن 80 مەكتەپتى قولدانىسقا بەرۋ كوزدەلۋدە. سونىڭ ىشىندە «جايلى مەكتەپ» ۇلتتىق جوباسى بويىنشا 24 مەكتەپ سالىنادى.
«باس قالادا جىل سايىن بالا سانى 20 مىڭعا دەيىن وسەدى. جىلىنا 11-سىنىپتى 10-11 مىڭ بالا بىتىرەتىن بولسا, 1-سىنىپقا 28-29 مىڭ بالا كەلەدى. 2027 جىلى ەلوردا وقۋشىلارىنىڭ سانى 330 مىڭنان, ال پەداگوگتەرگە قاجەتتىلىك 3 مىڭنان اسادى دەگەن بولجام بار», — دەدى سپيكەر.
ورىن تاپشىلىعى ماسەلەسىن شەشۋ ءۇشىن 2018 جىلدان بەرى پەداگوگيكالىق ماماندىقتارعا استانا قالاسى اكىمدىگىنىڭ گرانتى بولىنەدى.
