ەلوردادا مەكتەپتەرىندە «تازا قازاقستان. استانا – تازالىق پەن ءتارتىپتىڭ ۇلگىسى» اۋقىمدى ەكولوگيالىق اكتسياسى اياسىندا «ەكو كۇن» ەكولوگيالىق فەستيۆالى ءوتتى, دەپ حابارلايدى astana-akshamy.kz.
كونكۋرستىق باعىتتا ۇيىمداستىرىلعان فەستيۆالدە وقۋشىلار ەكولوگيا تاقىرىبىندا تاپسىرمالاردى ورىندادى.
ماسەلەن, قالاداعى №72 مەكتەپ-ليتسەيدە الماتى اۋدانىنداعى 6 مەكتەپتىڭ 5-6 سىنىپ وقۋشىلارى ءوزارا باق سىناستى.
ەكولوگيا جانە جاسىل الەم» تاقىرىبىندا وتكەن ەكوسلەت ەكى كەزەڭنەن تۇردى. ءبىرىنشى كەزەڭدە وقۋشىلار ەكولوگيالىق باعىتتاعى بىلىمدەرىن شىڭداسا, پراكتيكالىق كەزەڭدە تۋريستىك باعىتتاعى تاپسىرمالاردى ورىندادى.
«بۇگىن «تازا قازاقستان» ەكولوگيالىق اكتسياسى اياسىندا قالالىق ءبىلىم باسقارماسىنىڭ ۇيىمداستىرۋىمىن قالاداعى بارلىق مەكتەپتە ءبىر ۋاقىتتا ەكوفەستيۆال ۇيىمداستىرىلدى. مۇنداي جيىن بالالاردىڭ ەكولوگيالىق دۇنيەتانىمىنا جانە شىعارماشىلىعىنا جاقسى اسەر ەتەدى. سونىمەن قاتار قورشاعان ورتانى قورعاۋ تۋرالى كوزقاراستارى قالىپتاسادى. جارىس تۇرىندە وتكىزىلگەن شارادا ۇزدىك ناتيجە كورسەتكەن مەكتەپ وقۋشىلارىنا ديپلوم مەن مەدال تابىستالىپ, ءتاتتى سىيلىقتار بەرىلدى», – دەدى استانا قالاسى اكىمدىگىنىڭ «بالالار مەن جاسوسپىرىمدەردىڭ تۋريزم جانە ولكەتانۋ ورتالىعى» مكقك ديرەكتورىنىڭ مىندەتىن اتقارۋشى اسلان كەنجەعاليەۆ.
اتالعان مەكتەپ-ليتسەي ديرەكتورىنىڭ تاربيە ءىسى جونىندەگى ورىنباسارى جانار كوپباەۆانىڭ سوزىنشە, ءبىلىم ورداسىندا ەكولوگيالىق باعىتتا ءارتۇرلى ءىس-شارالار ۇيىمداستىرىلادى.
«ءبىزدىڭ مەكتەبىمىزدە ەكولوگيالىق باعىتتا ءتۇرلى كونكۋرستار مەن شارالار ءوتىپ تۇرادى. وقۋشىلار قالدىقتاردى سۇرىپتاۋ, مەكتەپ اۋماعىن كوگالداندىرۋ جۇمىستارىنا اتسالىسادى. جىل سايىن ءساۋىر-مامىر ايلارىندا ەكولوگيالىق ايلىق وتكىزۋ داستۇرگە اينالعان. ءار اپتانىڭ تاقىرىپتىق اتاۋى بەكىتىلگەن. مىسالى «تازارۋ» اپتالىعىندا وقۋشىلارمەن بىرگە مەكتەپ اۋلاسىن جانە تۇرعىن ۇيلەردىڭ اۋلالارىن تازارتۋ جۇمىستارىن جۇرگىزەمىز. ودان بولەك بىزدە «وتباسىمەن بىرگە اعاش ەك» اتتى اپتالىق بار. وندا وقۋشىلار ءوز وتباسىمەن بىرگە مەكتەپ اۋلاسىنا اعاش وتىرعىزادى. ال بۇگىنگى فەستيۆالگە مەكتەپ جانىنداعى لاگەرگە قاتىسىپ جۇرگەن بالالار قاتىسۋدا. بىزدە بيىل سپورتتىق لاگەرگە 100-گە جۋىق, ال ءپروفيلدى لاگەرگە 315 بالا قاتىسىپ جاتىر. سونىمەن قاتار باستاۋىش سىنىپ وقۋشىلارىنا ارنالعان «بالدىرعان» لاگەرىنىڭ ءبىرىنشى كەزەڭىندە 357 بالا بار. سونداي-اق بالالار فۋتبول جانە ۆولەيبولدان تەگىن ۇيىرمەلەرگە قاتىسادى», – دەدى جانار كوپباەۆا.
