استاناداعى ەمحانالاردا 2008 جىلدان بەرى اشىلعان 24 جاستار دەنساۋلىعى جۇمىس ىستەيدى. ولاردىڭ باستى مىندەتتەرى – 10 جاستان 18 جاسقا دەيىنگى كامەلەتكە تولماعان بالالار مەن جاستار, ولاردىڭ اتا-انالارى مەن پەداگوگتەر اراسىندا سالاۋاتتى ءومىر سالتىن ناسيحاتتاۋ, رەپرودۋكتيۆتى جانە پسيحيكالىق دەنساۋلىقتى قورعاۋ ماسەلەلەرى بويىنشا اقپاراتتىق-ءتۇسىندىرۋ جۇمىستارىن جۇرگىزۋ, دەپ حابارلايدى astana-akshamy.kz.
سونىمەن قاتار مۇنداي ورتالىقتار ماماندارى جاستارعا اتالعان باعىتتاردا كونسۋلتاتسيالىق, ەمدەۋ-دياگنوستيكالىق, پسيحولوگيالىق كومەك بەرۋمەن, پسيحوالەۋمەتتىك جانە زاڭگەرلىك قىزمەتتەر كورسەتۋمەن اينالىسادى. فيزيكالىق جانە پسيحولوگيالىق زورلىق-زومبىلىق قۇرباندارىنا مەديتسينالىق كومەك بەرىپ, قۇقىقتىق اعارتۋ, دەنساۋلىق ساقتاۋ سالاسىنداعى قۇقىق ماسەلەلەرى بويىنشا كەڭەس بەرەدى جانە الەۋمەتتىك-قۇقىقتىق قورعاۋ قىزمەتتەرىن كورسەتەدى.
– 2023 جىلى جاستار دەنساۋلىق ورتالىقتارىنىڭ سانى 1,5 ەسە ارتتى, بۇل ءوز كەزەگىندە جاستار مەن جاسوسپىرىمدەرگە ارنالعان ورتالىق قىزمەتتەرىنە قولجەتىمدىلىكتىڭ وسۋىنە اكەلدى. ورتالىق ماماندارىنىڭ قىزمەتتەرىنە جۇگىنگەن جاسوسپىرىمدەر مەن جاستاردىڭ جالپى سانى 2022 جىلمەن سالىستىرعاندا 2,2 ەسە كوبەيدى. ەگەر الدىڭعى جىلى استانا قالاسىنىڭ جاستار دەنساۋلىق ورتالىقتارى كومەگىنە 52444 ادام جۇگىنگەن بولسا, بىلتىر ولاردىڭ سانى 116219 ادامعا جەتكەن, – دەيدى استانا قالاسى قوعامدىق دەنساۋلىق ساقتاۋ باسقارماسىنىڭ جاستار دەنساۋلىق ورتالىقتارى بويىنشا باس شتاتتان تىس ۇيلەستىرۋشىسى اقمارال بەگاەۆا.
مۇنداي ورتالىقتاردا دارىگەر پەدياتر, دارىگەر تەراپەۆت, دارىگەر اكۋشەر-گينەكولوگ, دارىگەر ۋرولوگ, پسيحولوگ, الەۋمەتتىك قىزمەتكەر, زاڭگەر, مەدبيكە سىندى ماماندار قىزمەت كورسەتەدى. سولاردىڭ ءبىرى قالاداعى №3 ەمحانادا 2008 جىلدان باستاپ جۇمىس ىستەيدى. «جاس تولقىن» دەپ اتالاتىن بۇل ورتالىق 14 جاستان جوعارى وقۋشىلار مەن ستۋدەنتتەردى قابىلدايدى.
