حالىقارالىق بالالاردى قورعاۋ كۇنى قارساڭىندا ەلورداعا ەلىمىزدىڭ بارلىق وڭىرلەرىنەن ءوز جەتىستىكتەرىمەن ەرەكشەلەنگەن بالالار, بالالار قوزعالىسىنىڭ كوشباسشىلارى جانە ءتۇرلى جاعدايلاردا ادام ءومىرىن اراشالاپ قالعان باتىر بالالار جينالدى. ولاردىڭ ارقايسىسى جوعارى باعالانىپ, قر وقۋ-اعارتۋ مينيسترلىگىنىڭ العىس حاتىمەن ماراپاتتالدى, دەپ حابارلايدى astana-akshamy.kz.
وقۋ-اعارتۋ ۆيتسە-ءمينيسترى ەدىل وسپان مەملەكەت تاراپىنان بالالاردىڭ قاۋىپسىزدىگى مەن جايلى ورتادا ءومىر ءسۇرۋى, ءبىلىم مەن تاربيە الۋى ءۇشىن بارلىق جاعدايدىڭ جاسالىپ وتىرعانىن ايتتى.
«بيىل ءبىز بالالاردى قورعاۋ كۇنى قارساڭىندا ءداستۇرلى تۇردە تالانتىمەن دارالانعان جانە شەشۋشى ساتتە باتىرلىق تانىتقان بالالاردى جينادىق. مەملەكەتىمىزدىڭ, حالقىمىزدىڭ, اتا-انالارىڭنىڭ ۇكىلەگەن ءۇمىتى وزدەرىڭ. بۇگىندە مەملەكەت بالالارىمىزدىڭ تاربيەلەنۋىنە, ءبىلىم الۋىنا جانە دامۋىنا قولايلى جاعداي جاساۋدا. وڭىرلەردە مەكتەپتەر, بالاباقشالار, مادەني جانە سپورتتىق نىساندار قۇرىلىسى قارقىندى جۇرۋدە, زاڭنامالىق بازا جەتىلدىرىلۋدە, پەداگوگتەردىڭ بىلىكتىلىگى ارتتىرىلۋدا. بالالار – ارقاشان ءبىزدىڭ قورعاۋىمىزدا. تەك ءبىلىم الۋعا, بيىك بەلەستەردى باعىندىرۋعا جانە ادال, ءادىل تۇلعا بولۋعا ۇمتىلۋ كەرەك, ويتكەنى ەلىمىزدىڭ بولاشاعى سەندەردىڭ قولدارىڭدا», – دەپ اتاپ ءوتتى ەدىل وسپان.
كەزدەسۋ ءارى قاراي اشىق ديالوگ فورماتىندا جالعاستى, وندا بالالار وزدەرى, وتباسى, مەكتەپتەگى جەتىستىكتەرى, قىزىعۋشىلىقتارى مەن ارماندارى تۋرالى ايتتى. «بولاشاقپەن كەزەسۋ. ديالوگ س بۋدۋششيم» تاقىرىبىنداعى ءىس-شاراعا قازاقستان رەسپۋبليكاسىنداعى بالا قۇقىقتارى جونىندەگى ۋاكىل قاتىستى. 
اسىرەسە, استانا قالاسى مەن قوستاناي وبلىسىنان كەلگەن باتىر بالالار اقان, راميل, ماتۆەي جانە يۆاندى اتاپ ايتۋعا بولادى. جۋىردا عانا بۇل بالالار ورتەنىپ جاتقان ۇيلەردەن ادامداردى الىپ شىعىپ, ولاردىڭ ءومىرىن ساقتاپ قالدى. جاس باتىرلار مەن ولاردىڭ اتا-انالارى قر وقۋ-اعارتۋ ءمينيسترىنىڭ العىس حاتتارىمەن ماراپاتتالدى.
«اتا-انام مەن ۇستازدارىما ماعان سىڭىرگەن تاربيەلەرى ءۇشىن العىسىمىدى بىلدىرەمىن. سونداي-اق مەملەكەتكە جانە پرەزيدەنتىمىزگە بىزگە ارتقان سەنىمى مەن قولداۋى ءۇشىن العىس ايتقىم كەلەدى», – دەيدى №31 مەكتەپ-گيمنازياسىنىڭ 7 سىنىپ وقۋشىسى اقان اكىمجانوۆ.
كەزدەسۋ سوڭىندا بارلىق قاتىسۋشىلارعا بالالار ساۋىقتىرۋ ورتالىعىنا جولدامالار مەن سىيلىقتار تابىستالدى, سونداي-اق كوشباسشىلىقتى دامىتۋ بويىنشا ترەنينگتەر وتكىزىلىپ, بالالار ءوزارا پىكىر الماسىپ, ۇسىنىستارىمەن ءبولىستى. سونداي-اق بالالار استانانىڭ مادەني-دەمالىس ورتالىقتارىن ارالادى.
