ەلوردادا مۇگەدەكتىگى بار ادامداردىڭ ەڭبەك قۇقىقتارىن قامتاماسىز ەتۋ ماسەلەلەرى تالقىلاندى

ەلوردادا «قازاقستانداعى مۇگەدەكتىگى بار ادامداردىڭ ەڭبەك قۇقىقتارى مەن مۇمكىندىكتەرى» تاقىرىبىندا ديالوگ الاڭى ءوتتى. قر ەڭبەك جانە حالىقتى الەۋمەتتىك قورعاۋ مينيسترلىگىنىڭ (بۇدان ءارى – ەڭبەكمينى), قر وقۋ-اعارتۋ مينيسترلىگىنىڭ, ۇەۇ جانە بيزنەستىڭ وكىلدەرى ەرەكشە قاجەتتىلىكتەرى بار ادامداردى جۇمىسقا ورنالاستىرۋ جانە ينكليۋزيۆتى ساياساتتى دامىتۋ ماسەلەلەرىن تالقىلادى, دەپ حابارلايدى astana-akshamy.kz. 

قر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ولجاس انافين ءوزىنىڭ العى سوزىندە قازاقستان ينكليۋزيۆتى قوعام قۇرۋعا ۇمتىلاتىنىن, وندا ءاربىر ادام, دەنە مۇمكىندىكتەرىنە قاراماستان, تەڭ قۇقىقتار مەن ەڭبەككە قول جەتكىزە الاتىنىن اتاپ ءوتتى.

«مۇگەدەكتىگى بار ادامدار جۇمىسقا ورنالاسۋ جانە ءوزىن-ءوزى جۇزەگە اسىرۋ جولىندا بىرقاتار كەدەرگىلەرگە ءجيى تاپ بولادى. بۇل فيزيكالىق كەدەرگىلەر عانا ەمەس, سونىمەن قاتار ستەرەوتيپتەر, الالاۋشىلىق جانە اقپاراتتىڭ جەتىسپەۋشىلىگى بولۋى مۇمكىن. ءبىزدىڭ مىندەتىمىز – ءاربىر ازامات قوعامنىڭ دامۋىنا ءوز ۇلەسىن قوسىپ, ءوز الەۋەتىن ىسكە اسىرا الاتىن جاعدايلار جاساۋ.

ەلىمىزدە جاعدايدى جاقسارتۋ ءۇشىن ماڭىزدى قادامدار قابىلدانۋدا: جۇمىسپەن قامتۋدى قولداۋ باعدارلامالارى ازىرلەنۋدە جانە ەنگىزىلۋدە, ارنايى جۇمىس ورىندارى قۇرىلۋدا, زاڭنامالىق بازا جاقسارۋدا. وسى باعىتتاعى نەگىزگى جوبالاردىڭ ءبىرى مۇگەدەكتىگى بار ادامداردىڭ قوعامدىق جانە ەڭبەك ومىرىنە تولىققاندى قاتىسۋى ءۇشىن جاعداي جاساۋعا باعىتتالعان ينكليۋزيۆتى ساياسات تۇجىرىمداماسىن ازىرلەۋ بولىپ تابىلادى», – دەدى ول.

ءوز كەزەگىندە ەڭبەكمينى جۇمىسپەن قامتۋ دەپارتامەنتىنىڭ ديرەكتورى اسقار نيازوۆ قازاقستاندا مۇگەدەكتىگى بار ادامداردى جۇمىسپەن قامتۋ بويىنشا قابىلدانىپ جاتقان شارالار تۋرالى باياندادى.

«ەلىمىزدە 725 مىڭ مۇگەدەكتىگى بار ادامنىڭ ىشىنەن ەڭبەككە قابىلەتتى جاستاعى ازاماتتار سانى 385,8 مىڭ ادامدى (53,6%) قۇرايدى. ال جۇمىس ىستەپ جاتقان مۇگەدەكتىگى بار ادامداردىڭ سانى 138,8 مىڭ ادامدى, ياعني ەڭبەككە قابىلەتتى مۇگەدەكتىگى بار ازاماتتاردىڭ 36%-ىن قۇرايدى.

مۇگەدەكتىگى بار ادامداردى جۇمىسپەن قامتۋدىڭ قاجەتتى شاراسى رەتىندە اكىمدىكتەر شتات سانى 50 ادامنان اساتىن كاسىپورىندارداعى جۇمىس ورىندارىنا 2-دەن 4% – عا دەيىنگى كۆوتانى بەكىتۋ جونىندە شارالار قابىلدايدى. كۆوتانى ورىنداماعانى ءۇشىن زاڭنامادا ايىپپۇلدار قاراستىرىلعان.

بۇدان باسقا جۇمىسپەن قامتۋعا جاردەمدەسۋدىڭ بەلسەندى شارالارىنا كوزدەلگەن قاراجاتتىڭ 3,7%-ى نەمەسە 3,5 ملرد تەڭگە مۇگەدەكتىگى بار ادامداردى جۇمىسقا ورنالاستىرۋدى قامتاماسىز ەتۋگە جۇمسالادى», – دەدى اسقار نيازوۆ.

جالپى, ازاماتتاردى جۇمىسپەن قامتۋ جونىندەگى شارالار ۇلتتىق جوبالاردى ىسكە اسىرۋ اياسىندا, بوس جۇمىس ورىندارىنا, مەملەكەت باسشىسىنىڭ «ءاربىر 10 مىڭ تۇرعىنعا 100 جۇمىس ورنى» باستاماسى شەڭبەرىندە, مەملەكەت سۋبسيديالايتىن جۇمىس ورىندارىنا, سونداي-اق مەملەكەتتىك گرانتتار بەرۋ جولىمەن جۇرگىزىلەدى. وتكەن جىلدىڭ قورىتىندىسى بويىنشا 28,2 مىڭ مۇگەدەكتىگى بار ازامات جۇمىسقا ورنالاستىرىلدى.

«جۇمىسقا ورنالاسۋعا جاردەمدەسۋ ءۇشىن جەرگىلىكتى جۇمىسپەن قامتۋ ورگاندارىنا بارىپ تا, enbek.kz نەمەسە eGov ونلاين پورتالى ارقىلى ۇيدەن شىقپاي دا جۇگىنۋگە بولادى. بيزنەس-پروتسەسس وتە قاراپايىم: مانساپتىق ورتالىقتار جۇمىس ىزدەۋشىلەرگە ءبىر جۇمىس كۇنى ىشىندە جولداما بەرەدى, ودان ءارى اڭگىمەلەسۋ جۇمىس بەرۋشى مەن جۇمىس ىزدەۋشىنىڭ قاتىسۋىمەن وتەدى, وڭ شەشىم قابىلدانعان جاعدايدا ءتيىستى شارت جاسالادى», – دەپ تولىقتىردى اسقار نيازوۆ.

ءىس-شارا بارىسىندا ەرەكشە قاجەتتىلىكتەرى بار ادامداردى جۇمىسقا ورنالاستىرۋ تاجىريبەسى جانە ينكليۋزيۆتى ساياساتتى دامىتۋ بويىنشا ۇسىنىستار قارالدى.