استانا قالاسى اكىمدىگىنىڭ تىلدەردى دامىتۋ جانە ارحيۆ ءىسى باسقارماسىنىڭ «رۋحانيات» كمم قازاق جانە اعىلشىن تىلدەرىندە وتكىزىلگەن كۋرستىڭ اياقتالۋىنا وراي بەلسەندى قاتىسۋشىلارعا سەرتيفيكاتتار تاپسىردى, دەپ حابارلايدى astana-akshamy.kz
كۋرس ەكى كەزەڭنەن تۇرادى. ۇزاقتىعى 4 اي. ساباقتار اپتاسىنا 3 رەت بولادى. قازاق ءتىلى 100 ساعاتتى, ال اعىلشىن ءتىلى 88 ساعاتتى قامتيدى.
«قازاق ءتىلى كۋرسى 2018 جىلدان بەرى جۇمىس ىستەپ كەلەدى. سودان بەرى ەرەسەكتەرگە قازاق جانە اعىلشىن تىلدەرىن ۇيرەتۋ جۇمىستارىن جۇرگىزەمىز. قازاقستان رەسپۋبليكاسىنىڭ 2023-2029 جىلدارعا ارنالعان تۇجىرىمداماسىنا سايكەس استانا قالاسىنىڭ جەكەلەگەن تۇرعىندارىن, مەملەكەتتىك قىزمەتشىلەردى جانە ۇلتتىق كومپانيالاردىڭ وكىلدەرىن قازاق تىلىنە ۇيرەتۋمەن اينالىسامىز.
جوسپارعا سايكەس, جىل بويىنا قازاق ءتىلى كۋرسى بويىنشا 1500 ادامدى, ال اعىلشىن ءتىلى بويىنشا 110 ادامدى قامتۋىمىز قاجەت. جىلدىق جوسپار بويىنشا مەجەگە جەتەمىز, ويتكەنى قازاق ءتىلىن ۇيرەنۋگە قىزىعۋشىلىق تانىتاتىندار وتە كوپ. وسى جىلى 877 ادام قازاق ءتىلىن كۋرسىن ءتامامدادى. اعىلشىن ءتىلى بويىنشا 38 ادام اياقتادى. بۇگىن ساباقتان قالماي قاتىسقان بەلسەندى وزگە ۇلت وكىلدەرىن العىسحاتپەن ماراپاتتاپ, ادەبي كىتاپتاردى سىيعا تارتتىق», – دەدى «رۋحانيات» كمم قازاق ءتىلىن وقىتۋ جانە ادىستەمەلىك جۇمىستار جونىندەگى ءبولىم باسشىسى سالتانات جايلاۋ.
ءىس-شارانىڭ ماقساتى – ءتىل ۇيرەنۋشىنىڭ تۇرمىستىق-كاسىبي سالالاردا قازاق ءتىلىن ساۋاتتى قولدانۋىن قالىپتاستىرۋ جانە ولاردى ءتىل دەڭگەيلەرى بويىنشا ءوز ويىن, پىكىرىن ەركىن ايتۋعا, ءىس-قاعازدارىن ساۋاتتى جۇرگىزۋ داعدىسىنا ۇيرەتۋ.
«مەن رەسپۋبليكالىق عارىشتىق بايلانىس ورتالىعىندا جۇمىس ىستەيمىن. قازاقستان رەسپۋبليكاسىنىڭ مەملەكەتتىك ءتىلى – قازاق ءتىلى. مەملەكەتتىك ءتىلدى مەڭگەرۋ – قازاقستان رەسپۋبليكاسىنىڭ ءاربىر ازاماتىنىڭ پارىزى. وسى پارىزىمىزدى ورىنداۋعا استانا قالاسى اكىمدىگى «رۋحانيات» كمم ۇلكەن كومەك كورسەتتى. اتالعان مەكەمەگە قازاق ءتىلىن وقىتۋدى ۇيىمداستىرۋ ىسىنە ءوز ۇلەسىن قوسقانى ءۇشىن رەسپۋبليكالىق عارىشتىق بايلانىس ورتالىعى اتىنان شىنايى العىسىمىزدى بىلدىرەمىز», – كۋرس قاتىسۋشىسى سەرگەي گاۆريلەنكو.
سونىمەن قاتار, اعىلشىن ءتىلىن ۇيرەنۋگە تىلەك بىلدىرۋشىلەر دە از ەمەس.
«ءوز ماماندىعىم – نەمىس ءتىلى ءپانى مۇعالىمى. بىراق اعىلشىن ءتىلىن ۇيرەنگەن دە ۇنايدى. 2-3 جىلدان بەرى ۇيرەنىپ تە كەلەمىن. دەگەنمەن سويلەمەسە, ءتىل ولەدى عوي, سوندىقتان وسى كۋرسقا جازىلدىم. بۇل كۋرستا كوپ نارسەنى ەسكە ءتۇسىرىپ قانا قويعان جوقپىز, ءبىراز جاڭا نارسەنى دە ۇيرەندىك» – دەدى كۋرس قاتىسۋشىسى مەيرامگۇل وتەگەنوۆا.
