ەلورداداعى تاۋەلسىزدىك سارايىندا قازاقستان توراعالىعىمەن شانحاي ىنتىماقتاستىق ۇيىمىنىڭ ءسامميتى وتۋدە, دەپ حابارلايدى astana-akshamy.kz.
ءىس-شاراعا قازاقستان, يران, قىتاي, قىرعىزستان, پاكىستان, رەسەي, تاجىكستان, وزبەكستان, بەلارۋس, موڭعوليا, ازەربايجان, قاتار, تۇركيا جانە تۇرىكمەنستاننىڭ مەملەكەت پەن ۇكىمەت باسشىلارى, ءباا-دەن راس ءال-حايما امىرلىگىنىڭ ءامىرى, ءۇندىستاننىڭ سىرتقى ىستەر ءمينيسترى, سونداي-اق شىۇ باس حاتشىسى جانە شىۇ وڭىرلىك تەرروريزمگە قارسى قۇرىلىمىنىڭ اتقارۋشى ديرەكتورى قاتىسىپ جاتىر.
سامميتكە سونىمەن قاتار بۇۇ باس حاتشىسى جانە تمد, ەىۇ, اوسشك, ۇقشۇ, ەەك جانە اقيۇ سياقتى حالىقارالىق ۇيىمداردىڭ باسشىلارى شاقىرىلعان.
شىۇ ءسامميتى العاش رەت «شىۇ-عا مۇشە مەملەكەت باسشىلارى كەڭەسىنىڭ وتىرىسى» جانە «شىۇ+» كەزدەسۋى فورماتىندا وتەدى.
شىۇ-عا مۇشە مەملەكەت باسشىلارى كەڭەسىنىڭ وتىرىسى بارىسىندا استانا دەكلاراتسياسى, 20 شەشىم, مەملەكەت باسشىلارىنىڭ 3 مالىمدەمەسى, ونىڭ ىشىندە «ءادىل بەيبىتشىلىك, كەلىسىم جانە دامۋ ءۇشىن الەمدىك بىرلىك تۋرالى», «شىۇ-نى جەتىلدىرۋ تۋرالى» باستاماسى قابىلدانباق. بەلارۋس رەسپۋبليكاسىن شىۇ مۇشەلىگىنە قابىلداۋ ءراسىمىن اياقتاۋ جانە وعان ۇيىمعا مۇشە مەملەكەت مارتەبەسىن بەرۋ تۋرالى تاريحي شەشىم دە بۇگىن جۇزەگە اسپاق.
جالپى, مەملەكەت باسشىلارى ۇيىمنىڭ كوپجوسپارلى ىنتىماقتاستىعىن, ونىڭ پەرسپەكتيۆالارىن ودان ءارى نىعايتۋعا جانە وزەكتى حالىقارالىق جانە وڭىرلىك پروبلەمالاردى شەشۋگە ىقپال ەتەتىن كوپتەگەن ماسەلەنى قاراستىرادى.
«شىۇ+» كەزدەسۋى «ءادىل بەيبىتشىلىك, كەلىسىم جانە دامۋ ءۇشىن الەمدىك بىرلىك تۋرالى» تاقىرىبىندا كەڭەيتىلگەن فورماتتا وتەدى.
