استانا قالاسىنىڭ اكىمى جەڭىس قاسىمبەك Instagram پاراقشاسىندا سۋ باسىپ قالاتىن كوشەلەرىڭ ماسەلەسى قالاي شەشىلىپ جاتقانى تۋرالى جازدى, دەپ حابارلايدى astana-akshamy.kz.
«قازىرگى ۋاقىتتا استانانىڭ نوسەر كارىز جۇيەسى 18 تازارتۋ قۇرىلىسىنان جانە 1-ءشى جيناقتاۋشى توعاننان, اۋدانى 16,7 مىڭ گەكتاردان استام اۋماقتى الاتىن جەر ءۇستى اعىندارىن بۇراتىن 610,8 كم بولاتىن نوسەر, درەناج جانە ناۋا-ارىق كارىز جەلىسىنىڭ ماگيسترالدىق كوللەكتورلارىنان تۇرادى.
قالادا 2019 جىلدان 2023 جىلعا دەيىنگى ارالىقتا نوسەر, درەناج جانە ناۋا-ارىق كارىز جەلىسىنىڭ ماگيسترالدىق كوللەكتورلارىنىڭ 400 كم-دەن استام جەلىسى, 9 سورعى ستانتسياسى جانە 4 تازارتۋ قۇرىلىسى سالىندى جانە رەكونسترۋكتسيالاندى.
سۋ باسىپ قالاتىن ەكى نەگىزگى ۋچاسكە بويىنشا:
1) جاڭا مەگا اۋدانى.قۇرىلىس ۇيىمدارىنىڭ حۋسەين بەن تالال داڭعىلىنداعى نوسەرلى كارىز جەلىسىنە جەر استى سۋلارىن زاڭسىز قۇيۋى جانە توگۋى سالدارىنان 29/2 كوشەسىن سۋ باسىپ قالدى. سۋدى زاڭسىز تومەندەتۋدىڭ جالپى كولەمىنىڭ قۋاتى 4000 م3/ساع قۇرادى. قازىرگى ۋاقىتتا سۋ توككەن مەنشىك يەسى انىقتالىپ جاتىر. ماتەريالدار تابيعاتتى قورعاۋ پوليتسياسىنا بەرىلەدى.
2) تۇران داڭعىلى.تۇران داڭعىلى مەن ۇلى دالا كوشەسىندەگى كارىز كوللەكتورىنىڭ جۇمىسى جەكە قۇرىلىس سالۋشىلار مەن بىرقاتار ءۇيدىڭ زاڭسىز قوسىلۋىنا بايلانىستى شامادان تىس جۇكتەلەدى. سالدارىنان ونىڭ تولىپ كەتۋىنە اكەلەدى. سول سياقتى تۇرمىستىق زاتتار, قۇرىلىس ماتەريالدارى جانە ت.ب. كارىزگە تاستالادى, ال بۇل سورعى جۇيەسى مەن تازارتۋ قوندىرعىلارىنىڭ دۇرىس جۇمىس ىستەمەۋىنە اكەلەدى.
نىسان 16 جىل بۇرىن سالىنعان. بۇل ورىندا (تۇران جانە ۇلى دالا داڭعىلدارىنىڭ قيىلىسى) 40-تان استام ارنايى تەحنيكا جۇمىس ىستەيدى. جاعداي باقىلاۋدا.
بۇدان بولەك, وسىعان دەيىن اكىمدىك تۇران داڭعىلىندا تاعى ءبىر ماگيسترالدىق كارىز كوللەكتورىنىڭ قۇرىلىسىن باستاعان. ونىڭ ۇزىندىعى – 8 كم, بۇل قولدانىستاعى كوللەكتوردىڭ ۇزىندىعىنان ۇلكەن. ماگيسترالدىق كارىز كوللەكتورى تولىقتاي وسى جىلدىڭ كۇزىندە اياقتالادى دەپ جوسپارلانىپ وتىر. جۇمىستىڭ ءبىر بولىگى اياقتالدى.
2023 جىلى نوسەرلى كارىز جۇيەلەرىن سالۋ بويىنشا ءۇش جوبانى ىسكە اسىرۋ اياقتالدى, ونىڭ اياسىندا 10 كم-دەن استام ماگيسترالدىق جانە تاراتۋشى نوسەرلى كارىز كوللەكتورلارى سالىندى.
بيىل نوسەر كارىزىنىڭ 5 جوباسى بويىنشا جۇمىس جالعاسىپ جاتىر, ونىڭ 3-ەۋىن اياقتاۋ جوسپارلانىپ وتىر. وسى جوبالار اياسىندا 5 كم-دەن استام كوللەكتور سالىنىپ, جاڭا تەمىرجول ۆوكزالى اۋدانىندا تازارتۋ قۇرىلىسىنىڭ جۇمىسى اياقتالادى. سونداي-اق, نوسەرلى كارىز جەلىلەرى مەن قۇرىلىستارىن سالۋ بويىنشا 8 نىساندى جوبالاۋ جۇرگىزىلىپ جاتىر.
سونداي-اق, قازىرگى ۋاقىتتا «استانا قالاسىندا 2035 جىلعا دەيىن نوسەرلى كارىز جۇيەسىن دامىتۋ» تەحنيكالىق-ەكونوميكالىق نەگىزدەمەسى ازىرلەنىپ جاتىر», – دەپ جازدى جەڭىس قاسىمبەك.
