بۇگىن استانا قالاسىندا «وتانداستار قورى» كەڭسەسىندە «ۇلى دالا» سەرياسىمەن جارىق كورگەن كىتاپتاردىڭ تۇساۋكەسەرى ءوتتى, دەپ حابارلايدى astana-akshamy.kz.
قر ءسىم قاراستى «وتانداستار قورى» قازاقستان جازۋشىلار وداعىمەن بىرلەسە وتىرىپ, شەتتەگى قازاق قالامگەرلەرىنىڭ ۇزدىك تۋىندىلارى مەن شىعارماشىلىعىن اتاجۇرتتاعى وقىرمانعا تانىستىرۋ ماقساتىندا بىلتىرعى جىلدان باستاپ «ۇلى دالا» سەرياسىمەن كىتاپتار شىعارۋدى قولعا العان ەدى. ارنايى بايقاۋ جاريالانىپ, قۇرامىندا بىلىكتى ماماندار مەن قالامگەرلەر ەنگەن قازىلار القاسى ىرىكتەگەن 10 كىتاپ ارقايسىسى 500 دانادان العاشقى لەكپەن وقىرمانعا جول تارتتى. بۇلار – موڭعوليا, رەسەي, وزبەكستان, قىتاي ەلدەرىندەگى قازاق قالامگەرلەرىنىڭ بۇرىن ەلىمىزدە جارىق كورمەگەن ەڭبەكتەرى. ونىڭ ىشىندە ولەڭدەر جيناعى, كوركەم پروزا, تاريحي-تانىمدىق زەرتتەۋ, ەستەلىكتەر بار.
سالتاناتتى شاراعا كىتاپ اۆتورلارى مەن قۇراستىرۋشىلار, زيالى قاۋىم وكىلدەرى قاتىستى. العاشقى ءسوزدى «وتانداستار قورى» كەاق پرەزيدەنتى ابزال ساپاربەكۇلى سويلەپ, جوبانىڭ ماڭىزى مەن ەرەكشەلىكتەرىنە توقتالىپ, بۇل قازاق ادەبيەتىنە قوسىلعان ۇلكەن رۋحاني قازىنا ەكەندىگىن اتاپ ءوتتى. مەملەكەت باسشىسى قاسىم-جومارت توقاەۆ تۇركىستاندا وتكەن ۇلتتىق قۇرىلتايدا «شەتەلدەگى قانداستارىمىزبەن تىعىز قارىم-قاتىناس ورناتىپ, رۋحاني بايلانىستى نىعايتا بەرەمىز. بۇل ماسەلە مەنىڭ جەكە نازارىمدا» دەگەن ءسوزىن نەگىزگى الىپ, سول باعىتتا قوعامنىڭ جۇمىس جۇرگىزىپ جاتقانىن مالىمدەدى.
اقىن, قازاقستان جازۋشىلار وداعىنىڭ حاتشىسى, قازاقستان جازۋشىلار وداعىنىڭ استانا قالاسى فيليالىنىڭ ديرەكتورى داۋلەتكەرەي كاپۇلى «وتانداستار قورى» مەن قازاقستان جازۋشىلار وداعىنىڭ بىرلەسكەن بۇل جوباسى وتە وزەكتى ەكەنىن, ءالى دە شەتەلدەگى تۇگەندەلەر ادەبي مۇرامىزدىڭ كوپ ەكەندىگىن تىلگە تيەك ەتتى.
ونەر زەرتتەۋشى, جازۋشى, قازاقستان جانە مونعوليا تەاتر قايراتكەرلەرى وداقتارىنىڭ مۇشەسى تايف تاۋكەيۇلى موڭعولياعا بارعان قازاق كوشىنىڭ تاعدىرىن, ول جاقتاعى ۇلتتىق تەاتردىڭ قۇرىلۋى جونىندە كەڭىنەن اڭگىمەلەپ بەردى. «كەرۋەن-عۇمىر» اتتى تاريحي تانىمدىق ەڭبەگىن شىعارىپ بەرگەن «وتانداستار قورىنا» جۇرەكجاردى العىسىن ءبىلدىردى.
بەلگىلى تۇركولوگ, عالىم, فيلولوگيا عىلىمدارىنىڭ دوكتورى قارجاۋباي سارتقوجاۇلى شەتەلدەگى قازاق ءباسپاسوزىنىڭ تاريحىنا توقتالىپ, ەلىمىزگە جەتكىزۋ ماسەلەسىن كوتەردى.
اباي اتىنداعى قازۇپۋ-ءنىڭ پروفەسسورى, فيزيكا عىلىمىنىڭ دوكتورى, قازاقستاننىڭ ۇلتتىق جاراتىلىستانۋ عىلىمدارى اكادەمياسىنىڭ كوررەسپوندەنت مۇشەسى دوسان بايمولدا ەۋروپادا 20 جىلدان ارتىق تۇرعان قالامگەر رەتىندە سول جاقتاعى قازاقتاردىڭ تاريحىن زەرتتەگەنىن, بۇل ەڭبەكتى «وتانداستار قورىنىڭ» جارىققا شىعارعانىنا شىنايى ريزاشىلىعىن جەتكىزدى.
قازاقستان جانە موڭعوليا جازۋشىلار وداعىنىڭ مۇشەسى, تاريح عىلىمدارىنىڭ كانديداتى, اقىن سۇراعان راحمەتۇلى بيىل مونعوليادا العاشقى اتا زاڭنىڭ قابىلدانعانىنا 100 جىل تولعانىن, ونىڭ العاشقى اۆتورلارىنىڭ ءبىرى تۇرار رىسقۇلوۆ ەكەنىن, كەيىننەن 1991 جىلعا دەيىنگى كەزەڭدە مونعولياداعى قازاق زيالى قاۋىم وكىلدەرى وسى زاڭعا كوپتەگەن تولىقتىرۋلار مەن وزگەرتۋلەر ەنگىزگەنىن اتاي كەلىپ, مۇنى تاريحى-ادەبي مۇرا رەتىندە قازاقستاندا شىعارۋ مۇمكىندىگىن قاراستىرۋدى ۇسىندى.
بەلگىلى اقىن, كۇيشى, قازاق ادەبيەتى مەن مادەنيەتىنىڭ جاناشىرى كادىرحان قيزاتۇلى قىتايداعى قازاقتار اراسىنداعى ايتىس ونەرىنىڭ تاريحىنا توقتالىپ, الداعى ۋاقىتتا سول مۇرانى تولىقتىرىپ شىعارساق دەگەن ويىمەن ءبولىستى.
ايتىس اقىنى, سازگەر, مادەنيەت قايراتكەرى ابدىعاني ءبازىلحان «ۇلى دالا» سەرياسىمەن جارىق كورگەن كىتاپتارىنىڭ شەتەلدەگى قازاق ادەبيەتىن ناسيحاتتاۋداعى رولىنە توقتالىپ, كىتاپ اۆتورلارىنىڭ ەڭبەكتەرىنە قارجىلاي قولداۋ ءبىلدىرۋ مۇمكىندىگىن قاراستىرۋ تۋرالى ۇسىنىسىن ءبىلدىردى.
كوشى-قون قاۋىمداستىعىنىڭ ارداگەرى بوتاگوز ۋاتقان «وتانداستار قورىنىڭ» اتقارىپ وتىرعان ءىس-شارالارىنا ساتتىلىك تىلەپ, قوعامعا شەتەلدەگى قازاق ادەبيەتىنىڭ بەلگىلى تۋىندىلارىنىڭ اۋديو نۇسقالارىن سىيعا تارتتى.
كەزدەسۋ سوڭىندا «وتانداستار قورىنىڭ» باسشىسى كەلگەن قوناقتارعا شىنايى العىسىن ءبىلدىردى. «ۇلى دالا» جوباسىنا وقىرماندار تاراپىنان ۇلكەن قىزىعۋشىلىق تۋعانىن, بۇل جوبانىڭ الداعى ۋاقىتتا دا جالعاساتىنىن اتاپ ءوتتى. ايتىلعان وي-پىكىرلەردىڭ وزەكتى جانە ورىندى ەكەندىگىن, وسى باعىتتا قوعام تاراپىنان جۇمىستار جۇرگىزىلەتىنىنە سەنىم ءبىلدىردى.
