3 ماۋسىمدا استانادا «جامبىل. جاڭا ءداۋىر» ءفيلمىنىڭ الدىن الا كورسەتىلىمى وتەدى, دەپ حابارلايدى astana-akshamy.kz/.
ال 4 ماۋسىمدا ءفيلمنىڭ الماتىداعى كورسەتىلىمى جۇرەدى. 6 ماۋسىم كۇنى تۋىندى ەل كينوتەاترلارىنا جول تارتپاق. فيلم مادەنيەت جانە اقپارات مينيسترلىگىنىڭ تاپسىرىسى بويىنشا ۇلتتىق كينو ورتالىعىنىڭ قولداۋىمەن تۇسىرىلگەن. فيلم اقىن ءومىرىنىڭ سوڭعى 9 جىلىن قامتيدى. ءدال وسى كەزەڭدە جامبىل جاباەۆتىڭ اتى بۇكىل كەڭەس وداعىنا تانىلعان بولاتىن.
فيلمدە جامبىلدىڭ ومىرىنە اسەر ەتكەن وقيعالار باياندالادى: اقىندار سلەتى, اقىن ولەڭدەرىنىڭ گازەتتەر مەن جۋرنالداردا جاريالانا باستاۋى, وراز جاندوسوۆپەن, ساكەن سەيفۋللينمەن جانە تاعى باسقا قازاقتىڭ اتاقتى قوعام قايراتكەرلەرىمەن كەزدەسۋى.
-باستى ءرولدى سومدايتىن اكتەردى كوپ ىزدەدىك. رەجيسسەر ءۇشىن ەڭ ماڭىزدى بولعانى – اكتەر ءتۇر-الپەتىنىڭ اقىن بەينەسىنە سايكەس كەلۋى. ول ءۇشىن ءبىز باستى رولگە ۇمىتكەردىڭ فوتوسۋرەتىن الىپ, ونىڭ ءتۇرىن «قارتايتتىق». اكتەرلار قۇرامىنا الماس شاياحمەتوۆ, اننا ستارچەنكو, اسان ءماجىت, ەرىك جولجاقسىنوۆ, فارحاد ماحمۋدوۆ, فيليپپ ۆولوشين مەن اسىلبەك ايتيش كىردى, – دەيدى رەجيسسەر جاندوس قۇسايىنوۆ.
ايتا كەتۋ كەرەك, «جامبىل. جاڭا ءداۋىر» تاريحي كارتيناسى 2021 جىلى اقىننىڭ 175 جىلدىعى مەرەيتويى تۇسىندا تۇسىرىلە باستادى.
