ەلوردادا «تازا قازاقستان. استانا – تازالىق پەن ءتارتىپتىڭ ۇلگىسى» اۋقىمدى ەكولوگيالىق اكتسيا اياسىندا «تازا استانا» جاڭا الەۋمەتتىك جوبا ىسكە قوسىلدى, دەپ حابارلايدى astana-akshamy.kz.
«تازا استانا» جوباسىنىڭ ماقساتى – ءاربىر اۋلادا تازالىق پەن تارتىپكە سانالى, ادال كوزقاراس قالىپتاستىرۋ.
جوبا اياسىندا ارنايى قۇرىلعان ەكولوگيالىق كوميسسيا توقسان سايىن «ەڭ تازا اۋلا», «ەڭ ۇزدىك كاسىپورىن», «ەڭ ۇزدىك مەكەمە» اتاقتارىن بەلگىلەپ, بەرىپ وتىرادى.
كوميسسياعا استانا قوعامدىق كەڭەسىنىڭ وكىلدەرى, قوعامدىق پىكىر كوشباسشىلارى, وكرۋگتەر بويىنشا ءماسليحات دەپۋتاتتارى, اتامەكەن وكپ سالالىق كەڭەستەرىنىڭ, سالالىق قاۋىمداستىقتاردىڭ, مۇگەدەكتەر, ارداگەرلەر قوعامدارى بىرلەستىكتەرىنىڭ وكىلدەرى, ەكولوگتار جانە ت.ب. كىرەدى.
ەستەرىڭىزگە سالا كەتەيىك, استانادا «تازا قازاقستان. استانا – تازالىق پەن ءتارتىپتىڭ ۇلگىسى» اۋقىمدى ەكولوگيالىق اكتسياسى ءساۋىر ايىندا باستالعان بولاتىن. وعان قالا تۇرعىندارى, ەڭبەك ۇجىمدارى, مەملەكەتتىك ورگانداردىڭ قىزمەتكەرلەرى, شاعىن جانە ورتا بيزنەس سۋبەكتىلەرى (بازارلار, ساۋدا-ويىن-ساۋىق ورتالىقتارى, كافەلەر, مەيرامحانالار جانە باسقالار), ەرىكتىلەر, وقۋشىلار مەن ستۋدەنتتەر, ميب (پيك) جانە باسقالار قاتىسادى.
ەكواكتسيا شەڭبەرىندە ەلوردادا قالانى, نوسەر جانە ارىق كارىز جەلىلەرىن سانيتارلىق تازارتۋ, كوشەلەردى, تروتۋارلاردى, ورامىشىلىك اۋماقتاردى, قوعامدىق كەڭىستىكتەر مەن اۋلالاردى تازالاۋ جۇرگىزىلەدى. سونداي-اق جاسىل ەكپەلەردى كۇتىپ-باپتاۋ جانە وتىرعىزۋ بويىنشا ماۋسىمدىق اگروتەحنيكالىق جۇمىستار, ساۋدا نىساندارىنا ىرگەلەس اۋماقتاردى جيناۋ, كوگالدار مەن گۇلزارلاردى ورناتۋ بويىنشا ءىس-شارالار, رۇقسات ەتىلمەگەن پوليگونداردى جويۋ جۇرگىزىلۋدە.
سوڭعى جاڭالىقتار
