استانادا جوعالعان بالا قىزمەتتىك ءيتتىڭ كومەگىمەن تابىلدى, دەپ حابارلايدى astana-akshamy.kz.
كىشى ينسپەكتور-كينولوگ پوليتسيا سەرجانتى نۇرسۇلتان سانجار, دان ەسىمدى يتىمەن يمانوۆ كوشەسىندەگى اۋلالاردىڭ بىرىنەن 5 جاسار بالانى ىزدەپ تاپقان.
بەلگىلى بولعانداي تاڭعى ۋاقىتتا 102 ارناسىنا جوعالعان بالا تۋرالى حابار كەلىپ تۇسكەن. قوڭىراۋ شالعان بالانىڭ اناسى بالاسىن اۋلادا ويناپ جۇرگەن جەرىنەن تابا الماي قالعانىن ايتىپ جۇگىنگەن. ايەل بالانى ءوز بەتىمەن ىزدەپ كورگەنىمەن, ىزدەۋ ناتيجە بەرمەگەن.
جەدەل قوڭىراۋ قابىلداعان ءتارتىپ ساقشىلار بىردەن جىلدام ارەكەتكە كوشىپ, كامەلەتكە تولماعان بالانى ىزدەۋدى دەرەۋ ۇيىمداستىرعان. پوليتسەيلەر بالانىڭ بولۋى مۇمكىن بارلىق جەرلەردى تەكسەرۋگە كىرىسكەن. بۇل جەردە قىزمەتشى يتپەن بىرگە كينولوگ ينسپەكتورلار دا بالانى ىزدەۋگە جۇمىلعان. بالانىڭ كيىمىنەن شىققان يىسكە قاراپ, يت ءيىستى بىردەن قابىلداپ العان. ءبىراز ۋاقىتتان كەيىن دان, ءيىس ارقىلى بالانىڭ ىزىنە ءتۇسىپ, ىزدەي باستاعان. ناتيجەسىندە ول پوليتسيا قىزمەتكەرلەرىن بالا جۇرگەن ءۇيدىڭ اۋماعىنداعى ويىن الاڭىنا اپارعان. ءتارتىپ ساقشىلارىنا حابارلاسقان بالانىڭ اناسى كومەك كورسەتىپ, ۇلىن جەدەل ىزدەستىرگەنى ءۇشىن پوليتسەيلەرگە ەرەكشە العىسىن ءبىلدىردى.
نەمىس وۆچاركاسى دان, پوليتسيا بولىمشەسىنىڭ كينولوگيالىق قىزمەتىندە 4 جىلداي قىزمەت ەتۋدە. يت باقىلاۋ جۇمىستارىنا جاقسى ۇيرەتىلگەن جانە ءيىس ءىزىن پايدالانىپ ادامدى ىزدەۋگە ابدەن داعدىلانعان.
ەلوردالىق ساقشىلار اۋلادا ەرەسەكتەردىڭ قاراۋىنسىز ويناپ جۇرگەن بالالاردىڭ اداسىپ كەتەتىن جاعدايلار ءجيى ورىن الاتىنىن اتاپ ءوتتى. بۇعان دەيىن دە قىزمەتتىك يت دان تۇرعىن ءۇيدىڭ اۋلاسىنان شىعىپ كەتكەن 5 جانە 7 جاستاعى ەكى ۇل بالانى تاپقانىن قۋانا ايتۋعا بولادى.
