2024 جىلدىڭ 1-توقسانىندا قر ءپىب مەديتسينالىق ورتالىعىنىڭ اۋرۋحاناسى بازاسىنداعى يادرولىق مەديتسينا ورتالىعىندا 2 197 ادامعا دياگنوستيكا جاسالدى, دەپ حابارلايدى astana-akshamy.kz
جوعارى تەحنولوگيالىق پەت/كت تەكسەرىسكە ءوتىنىش بەرگەن پاتسيەنتتەردىڭ 94%-ى تەكسەرۋدەن تەگىن ءوتتى.
بۇل قىزمەتتەر پاتسيەنتتەرگە تەگىن مەديتسينالىق كومەكتىڭ كەپىلدەندىرىلگەن كولەمى شەڭبەرىندە كورسەتىلدى.
– ورتالىقتا پەت/كت دياگنوستيكا ادامنىڭ بارلىق دەنە بولىگىنە جاسالادى, ەڭ سۇرانىس جوعارى تەحنولوگيا سانالادى. ونىڭ كەزەگىن كۇتۋ ۋاقىتى 3 ايدان اسادى. ءبىز بار مۇمكىندىكتى پايدالانىپ, ەمدەلۋشىلەردى نەعۇرلىم كوبىرەك قابىلداۋعا, كەزەك ۋاقىتىن ازايتۋعا تىرىسامىز, – دەيدى يادرولىق مەديتسينا ورتالىعىنىڭ باسشىسى, مەديتسينا عىلىمدارىنىڭ دوكتورى ايگۇل سادۋاقاسوۆا.
قر ءپىب مەدورتالىعى اۋرۋحاناسىنىڭ يادرولىق مەديتسينا ورتالىعى – پەت/كت زەرتتەۋلەرىن جۇرگىزۋگە 6 راديوفارماتسەۆتيكالىق پرەپاراتتى قولداناتىن قازاقستانداعى جالعىز كلينيكا. وزىندىك ەرەكشەلىگى بار پرەپاراتتاردىڭ ارقايسىسى بەلگىلى ءبىر قاتەرلى اۋرۋلاردى دياگنوستيكالاۋعا ارنالعان.
بيىل يادرولىق ورتالىق ۇجىمى تاعى 2 راديوفارماتسەۆتيكالىق پرەپارات ءوندىرىسىن جولعا قويۋدى جوسپارلاپ وتىر. جاڭادان شىعارىلاتىن 18F-FLT جانە 18F-FET پرەپاراتتارى ميداعى ءارتۇرلى ىسىك زاقىمدارىن دياگنوستيكالاۋعا, سونداي-اق حيرۋرگيالىق جانە ساۋلەلىك ەمنىڭ تيىمدىلىگىن باعالاۋعا باعىتتالعان.
