Maqsut Narikbayev University Times Higher Education Impact Rankings 2024 اتتى حالىقارالىق ءبىلىم بەرۋ رەيتينگىنە تۇڭعىش رەت ەندى. بۇل رەيتينگ 50 جىل قاتارىنان 171 ەلدەگى 7000 مەكەمەنى قامتىپ كەلەدى, دەپ حابارلايدى astana-akshamy.kz.
Maqsut Narikbayev University «Times Higher Education (THE) Impact Rankings 2024» اتتى الەمدىك رەيتينگىدە ءساتتى دەبيۋت جاسادى. ۋنيۆەرسيتەتتەردىڭ بۇۇ-نىڭ تۇراقتى دامۋ ماقساتتارىنا (تدم) قول جەتكىزۋگە قوسقان ۇلەسىن باعالاۋدا MNU لايىقتى ناتيجەلەر كورسەتتى. ۋنيۆەرسيتەت العاش رەت اتالمىش حالىقارالىق رەيتينگىگە كىرىپ, جالپى الەمدىك ءتىزىمنىڭ 1001-1500 ارالىعىندا كوش باستادى.
اتاپ ءوتۋ كەرەك, MNU بۇۇ تدم ساناتىنداعى «بەيبىتشىلىك, سوت تورەلىگى جانە ءتيىمدى ينستيتۋتتار» باعىتى بويىنشا جوعارى پوزيتسيالاردى ەنشىلەپ, الەمنىڭ ۇزدىك 201-300 جوعارى وقۋ ورىندارىنىڭ قاتارىنا كىردى.
ۋنيۆەرسيتەتتىڭ بۇۇ تدم باعىتتارىنداعى جەتىستىكتەرىنە مىنالار جاتادى:
– №8 تدم: لايىقتى جۇمىس جانە ەكونوميكالىق ءوسۋ – ۋنيۆەرسيتەت 401-600 ارالىعىندا; – №5 SDG: گەندەرلىك تەڭدىك – 601-800 دياپازونىنداعى پوزيتسيادا.
Maqsut Narikbayev University پروۆوستى سەرگەي پەننىڭ ايتۋىنشا, ۋنيۆەرسيتەت بۇل جەتىستىكپەن شەكتەلىپ قالمايدى.
«وسىمەن قارقىنىمىز باسەڭدەمەيدى جانە ورنىقتى دامۋ باعىتىندا ودان ءارى دامۋدى جوسپارلاپ وتىرمىز. قازىر بۇل باعىتتا ءبىزدىڭ MIND عىلىمي-قولدانبالى ورتالىعىمىز دا بەلسەندى جۇمىس اتقارۋدا. ول ءاربىر تدم-ن ساپالى زەرتتەۋلەر مەن اناليتيكا ارقىلى نىعايتا تۇسپەك», – دەپ اتاپ ءوتتى سەرگەي پەن.
سونىمەن قاتار, جاقىندا ۋنيۆەرسيتەتتىڭ رەسمي سايتىندا بۇۇ-نىڭ جاھاندىق ماقساتتارى اياسىندا اتقارعان جۇمىسىنا ارنالعان پاراقشا پايدا بولادى. سايتتاعى وسى پاراقشا ارقىلى كەز كەلگەن ادام ۋنيۆەرسيتەتتىڭ باستامالارى مەن جەتىستىكتەرىمەن تانىسا الادى. بيىلعى وقۋ جىلى ۋنيۆەرسيتەتتىڭ حالىقارالىق دەڭگەيدە مويىندالۋى تۇرعىسىنان ەرەكشە جەمىستى بولدى.
ايتا كەتۋ كەرەك, بيىل MNU QAA ينستيتۋتسيونالدىق اككرەديتاتسياسىنان وتكەن تمد مەن ورتالىق ازياداعى العاشقى ۋنيۆەرسيتەت اتاندى. بۇل اككرەديتاتسيا ۋنيۆەرسيتەتتىڭ ءبىلىم بەرۋ ساپاسىنىڭ جوعارى ستاندارتتارى مەن الەمدىك ماسشتابتا مويىندالۋىنا ۇمتىلىسىن ايقىندايدى.
