ەلوردادان بۋراباي كۋرورتىنا ەلەكتر پويىزبەن 2,5 ساعاتتا جەتۋگە بولادى, دەپ حابارلايدى astana-akshamy.kz
جولاۋشىلاردىڭ ىڭعايلىلىعى ءۇشىن ۇلتتىق تاسىمالداۋشى «استانا-بۋراباي كۋرورتى» باعىتى بويىنشا جۇرەتىن ەلەكتر پويىزىنىڭ جول ءجۇرۋ ۋاقىتىن قىسقارتتى. ەندى ەلوردادان بۇل كورىكتى مەكەنگە بۇرىنعى 4 ساعاتتىڭ ورنىنا نەبارى 2,5 ساعاتتا جەتۋگە بولادى.
ول ءۇشىن №7553/7556 «قاراعاندى-استانا» ەلەكتر پويىزىنىڭ مارشرۋتى بۋراباي كۋرورتىنا دەيىن ۇزارتىلدى. قاراعاندىدان استاناعا دەيىن بۇل پويىز №7553/7556 نومىرىمەن جۇرەدى, ال استانادان بۋراباي كۋرورتىنا دەيىن №6811/6812 نومىرىمەن جالعاسادى.
14 ماۋسىمنان باستاپ وسى ەلەكتر پويىزىنىڭ ءجۇرۋ جيىلىگى اپتاسىنا ەكى رەتتەن بەس رەتكە دەيىن ۇلعايتىلادى. ەندى «قاراعاندى-استانا-بۋراباي» ەلەكتر پويىزى دۇيسەنبى, سارسەنبى, جۇما, سەنبى جانە جەكسەنبى كۇندەرى جۇرەدى.
بۇدان بولەك, №7507/7508 «استانا-كوكشەتاۋ» ەلەكتر پويىزىنىڭ مارشرۋتى ساۋمالكول ستانتسياسىنا دەيىن ۇزارتىلادى. ەندى بۇل پويىز اپتاسىنا ءۇش رەت – جۇما, سەنبى جانە جەكسەنبى كۇندەرى جۇرەدى. سونداي-اق, بۋراباي باعىتىندا كۇندەلىكتى №6829/6830 «استانا-كوكشەتاۋ» ەلەكتر پويىزى قاتىنايدى.
جولاۋشىلارعا قولجەتىمدى بولۋ ءۇشىن ەلەكتر پويىزدارىنىڭ بيلەت قۇنى 2 271 تەڭگەدەن 2 943 تەڭگە ارالىعىن قۇرايدى. قوسىمشا ەلەكتر پويىزدارىنىڭ بيلەتتەرى 11 ماۋسىمنان باستاپ bilet.railways.kz سايتىندا جانە تەمىرجول ۆوكزالدارىنداعى «جولاۋشىلار تاسىمالى» اق كاسسالارىندا قولجەتىمدى.
بيىل «جولاۋشىلار تاسىمالى» اق بۋراباي جانە يمانتاۋ-شالقار كۋرورتتىق ايماقتارىنا شامامەن 125 مىڭ جولاۋشىنى تاسىمالداۋدى جوسپارلاپ وتىر.
ۇلتتىق تاسىمالداۋشى جولاۋشىلاردان ساپارلارىن الدىن الا جوسپارلاپ, بيلەتتەردى ەرتەرەك ساتىپ الۋدى سۇرايدى.
بيلەتتەر بولماعان جاعدايدا جولاۋشىلار بيلەتتەردى ساتۋ سايتىندا نەمەسە «جولاۋشىلار تاسىمالى» اق كاسسالارىندا «كۇتۋ پاراعى» تەگىن قىزمەتىن پايدالانا الادى.
